(ស្វាយរៀង)៖ ស្ត្រីម្នាក់គិតខ្លីសម្រេចចិត្តចងកសម្លាប់ខ្លួន ចោលកូនទាំងនៅក្មេងខ្ចី ព្រោះតែមានជម្លោះជាមួយប្តីបន្តិចបន្តួច។ ហេតុការណ៍នេះ បង្កឲ្យមានការភ្ញាក់ផ្អើល នៅព្រឹកថ្ងៃទី០៥ ខែសីហា ឆ្នាំ២០១៨នេះ ស្ថិតនៅក្នុងភូមិសាម៉ ឃុំស្វាយរំពា ស្រុកស្វាយទាប ខេត្តស្វាយរៀង។
មន្ដ្រីនគរបាលប៉ុស្តិ៍រដ្ឋបាលឃុំស្វាយរំពារ បានឲ្យដឹងថា ជនរងគ្រោះមាន ឈ្មោះ យឹម សេដា អាយុ៣៩ឆ្នាំ មុខរបរធ្វើស្រែ រស់នៅភូមិសាម៉ ឃុំស្វាយរំពារ ស្រុកស្វាយទាប ខេត្តស្វាយរៀង បានចងកសម្លាប់ខ្លួនឯង ដោយប្រើក្រម៉ាពណ៌ខ្មៅ ចងជាប់ទៅនិងផ្ទោងក្នុងជង្រុកស្រូវ ខាងក្រោយផ្ទះចម្ងាយ៣ម៉ែត្រ។
បើតាមមន្ដ្រីនគរបាល មូលហេតុដែលស្ដ្រីរូបនេះ សម្រេចចិត្តបញ្ចប់ជីវិតដោយខ្លួនឯង ដោយសារតែមានទំនាស់ជាមួយប្ដីបន្តិចបន្តួច ក៏ខឹងប្ដីលួចទៅចងកសម្លាប់ឯងតែម្ដង។
តាមការសន្និដ្ឋានរបស់សមត្ថកិច្ចជំនាញជនរងគ្រោះពិតជាបានចងកសម្លាប់ខ្លួនឯងពិតប្រាកដមែន។ ក្រោយពីបានចងកសម្លាប់ខ្លួនឯងហើយ បានបន្សល់ទុកនូវសំបុត្រជាច្រើនសន្លឹក ដោយបានបង្កប់អត្ថន័យតូចចិត្ត និងគ្រួសារដែលមានជម្លោះស្ទើរាល់ថ្ងៃពុំដែលមានក្តីសុខឡើយ៕
