(ព្រៃវែង)៖ ក្នុងពេលចុះទៅឃោសនាបោះឆ្នោត២លើកនាព្រឹកថ្ងៃទី១៨ និងព្រឹកថ្ងៃទី១៩ ខែកក្កដា ឆ្នាំ២០១៨ នៅតាមភូមិទាំង១៨ ក្នុងឃុំធាយ លោក ព្រុំ សុខា ប្រធានក្រុមការងារចុះជួយស្រុកបាភ្នំ បានជម្រាបជូនប្រជាពលរដ្ឋដែលបានចូលរួម ពេលនោះប្រមាណចំនួន ១.៦០០នាក់ ពីសារសំខាន់នៃការចូលរួមបោះឆ្នោតជ្រើសតាំង តំណាងរាស្ត្រនីតិកាលទី៦ ថ្ងៃទី២៩ ខែកក្កដា ឆ្នាំ២០១៨ ខាងមុខនេះ ដែលជាការធានាឱ្យសិទ្ធិ សេរីភាពរបស់បងប្អូនប្រជាពលរដ្ឋយើង ដូចមានចែងក្នុងរដ្ឋធម្មនុញ្ញត្រូវបានគោរព និងអនុវត្តត្រឹមត្រូវ ពេញលេញស្របតាមគោលការណ៍គ្រឹះ នៃលទ្ធិប្រជាធិបតេយ្យ។
ហេតុនេះការអំពាវនាវប្រជាពលរដ្ឋគ្រប់រូបដែលមានសិទ្ធិបោះឆ្នោត ឱ្យស្ម័គ្រចិត្តទៅចូលរួមបោះឆ្នោត គឺមិនមែនជាការគំរាមកំហែង ការបំភិតបំភ័យបងប្អូនដូចការមូលបង្កាច់បង្ខូច របស់ក្រុមប្រឆាំងខុសច្បាប់នោះឡើយ។
ផ្ទុយទៅវិញការញុះញង់ បោកបញ្ឆោត បន្លាចតាមគ្រប់រូបភាពរបស់ពួកគេ ក្នុងពេលបច្ចុប្បន្នដែលកំពុងបំពុលបរិយាកាស សេរី ត្រឹមត្រូវ យុត្តិធម៌នៃការបោះឆ្នោត សំដៅប៉ុនប៉ងធ្វើឱ្យប្រជាពលរដ្ឋរារែក អល់អែកក្នុងការសម្រេចចិត្តទៅចូលរួមបោះឆ្នោតតាមរយៈសង្គ្រាមចិត្តសាស្ត្រសព្វបែបយ៉ាងដូចជាថា៖ «ទៅឬមិនទៅ ភ័យឬមិនភ័យ» បន្ថែមលើល្បិចកលនានាដែលក្រុមប្រឆាំងខុសច្បាប់នេះ បានធ្វើកន្លងទៅតាមរយៈរបស់ដែលហៅថា «ដេកផ្ទះឈ្នះឯង ដេកផ្ទះឈ្នះស្អាត» ឬយុទ្ធនាការ«ម្រាមដៃស្អាត» ជាដើមនោះវិញទេ ដែលជាការរារាំងប្រជាពលរដ្ឋមិនឱ្យទៅចូលរួមបោះឆ្នោតហើយនោះ គឺជាការបំផ្លាញការបោះឆ្នោត បំផ្លាញលទ្ធិប្រជាធិបតេយ្យនៅកម្ពុជា។
ទោះជាយ៉ាងនេះក្តី ដោយបានយល់ច្បាស់ពីទឹកចិត្តរបស់ប្រជាជនទូទៅ នៅតាមមូលដ្ឋានភូមិឃុំ លោក ព្រុំ សុខា មានជំនឿយ៉ាងរឹងមាំប្រកបដោយសុទិដ្ឋិនិយមថា ទាំងបងប្អូនប្រជាពលរដ្ឋនៅក្នុងស្រុកបាភ្នំ ក៏ដូចជាប្រជាពលរដ្ឋនៅទូទាំងប្រទេសដែលធ្លាប់បានគោរពប្រតិបត្តិយ៉ាងខ្ជាប់ខ្ជួន នូវលទ្ធិប្រជាធិបតេយ្យតាមរយៈការបោះឆ្នោត ប្រាកដជានៅតែប្តេជ្ញានឹងទៅចូលរួមបោះឆ្នោតយ៉ាងច្រើនកុះករ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ដូចកាលពេលបោះឆ្នោតទាំង ៨លើកពីមុនកន្លងមកជាក់ជាមិនខាន។
ប្រជាជនភាគច្រើនលើសលប់ នៅតែគាំទ្រយ៉ាងមុតមាំ និងបន្តបោះឆ្នោតដើម្បីឱ្យគណបក្សប្រជាជនកម្ពុជាទទួលបានជ័យជំនះ ដើម្បីសម្តេចតេជោ ហ៊ុន សែន បន្តធ្វើជានាយករដ្ឋមន្ត្រី ដឹកនាំប្រទេសជាតិឱ្យមានសុខសន្តិភាព ស្ថេរភាព និងអភិវឌ្ឍលើគ្រប់វិស័យយ៉ាងរឹងមាំតទៅទៀតលើផ្លូវនៃលទ្ធិប្រជាធិបតេយ្យ សេរី ពហុបក្ស និងនីតិរដ្ឋដូចបច្ចុប្បន្ន សម្រាប់អនាគតរុងរឿងត្រចះត្រចង់របស់មាតុភូមិ និងប្រជាជនយើងគ្រប់រូបសម្រាប់ជំនាន់នេះ និងជំនាន់ក្រោយទៅមុខទៀត៕
