(កំពង់ធំ)៖ ស្ត្រីមេម៉ាយ ទ្រាំរស់នៅចិញ្ចឹមកូន៣នាក់ នៅក្រោមដំបូលខ្ទមធ្លុះធ្លាយយ៉ាងកំសត់ ដោយប្រកបមុខរបរដើរស៊ីឈ្នួលលាងចាន និងបោកខោរអាវឲ្យគេតាមផ្ទះ ដែលមានទីលំនៅនៅភូមិកំពង់គោ ឃុំកំពង់គោ ស្រុកកំពង់ស្វាយ ខេត្តកំពង់ធំ ត្រូវបានទទួលជម្រកស្នាក់នៅថ្មី ដែលមានទំហំ៤ម៉ែត្រគុណ៥ម៉ែត្រ ដែលបានចំណាយថវិកាក្នុងការសាងសង់អស់ទឹកប្រាក់ចំនួន២,៥៦០,០០០រៀល ដែលជាអំណោយរបស់សប្បុរសជន។
ពិធីប្រគល់ជម្រកស្នាក់នៅថ្មីនេះ ធ្វើឡើងនៅនាល្ងាចថ្ងៃទី១៩ ខែមិថុនា ឆ្នាំ២០១៨ក្រោមអធិបតីភាពលោកឧត្តមសេនីយ៍ទោ សោម ស៊ុន មេបញ្ជាការរង យោធភូមិភាគទី៤ មេបញ្ជាការ តំបន់ប្រតិបត្តិការសឹករងកំពង់ធំ រួមទាំងសហការី អាជ្ញាធរដែនដី និងប្រជាពលរដ្ឋយ៉ាងច្រើនកុះករ។
លោក សោម ស៊ុន បានឱ្យដឹងថា ក្រុមការងារយើងក្នុងនាមមនុស្សធម៌បានឧបត្ថម្ភជូនគាត់បន្ថែមទៀតនូវកង់ជិះចំនួន០១គ្រឿង សម្រាប់កូនជិះទៅរៀនដែលមានតម្លៃ១៥០,០០០រៀល រួមនិងសម្លៀកបំពាក់សិស្សចំនួន០៣សម្រាប់ សារ៉ុងចំនួន០២ កន្ទេល មុងភួយ ចានឆ្នាំង ស្លាបព្រា ធុងសម្រាប់ដាក់ទឹក បំពង់ទឹកក្តៅ ចានស្រាក់ សម្ភារៈផ្សេងៗមួយចំនួនទៀត និងថវិកាចំនួន១៥០,០០០ រៀល។
លោក សោម ស៊ុនបានឱ្យដឹងទៀតថាសប្បុរសជនដែរបានចំណាយនូវថវិការផ្ទាល់ខ្លួនជួយឧបត្ថម្ភនេះរួមមាន៖
១៖ ឧត្តមសេនីយ៍ទោ គីម សុផារុន និងលោកស្រី ថវិកា១លានរៀល
២៖ ឧត្តមសេនីយ៍ទោ គន់ រ័ត្នមុន្នី និងលោកស្រីថវិកា ៥០ម៉ឺនរៀល
៣៖ ឧត្តមសេនីយ៍ទោ គង់ កន្នារិទ្ធ ថវិកា ៥០ម៉ឺនរៀល
៤៖ លោក យន់ សុគន្ធ និង លោកស្រី ថវិកា ៤០ម៉ឺនរៀល
៥៖ លោកស្រី គីម ច័ន្ទសុលីណា និង ស្វាមី ថវិកា ២០ម៉ឺន
៦៖ លោកវរសេនីយ៍ឯក អ៊ីម ច័ន្ទសុភត្រា និង លោកស្រី ថវិកា ២០ម៉ឺនរៀល
សរុបថវិការទាំងអស់បានចំនួន ២.៨០០.០០០រៀល៕
នៅក្នុងពិធីប្រគល់នោះដែរ លោកឧត្តមសេនីយ៍ទោ សោម ស៊ុន និងសហការី រួមជាមួយអាជ្ញាធរដែនដី និងប្រជាពលរដ្ឋភូមិកំពង់គោ ឃុំកំពង់គោ បានថ្លែងអំណរគុណយ៉ាងជ្រាលជ្រៅបំផុត ចំពោះសប្បុរសជនទាំងអស់ដែលបានជួយឧបត្ថម្ភនូវថវិការជួយដល់ស្រ្តីមេម៉ាយកំសត់នេះផងដែរ៕
