(កណ្ដាល)៖ តំណាងនាយឧត្តមសេនីយ៍ ហ៊ីង ប៊ុនហៀង ប្រធានក្រុមការងារចុះជួយស្រុកកណ្ដាលស្ទឹង, លោក ណុប រ័ត្ននិមល ប្រធានគណៈអចិន្រ្តៃយ៍ គណៈពង្រឹងយុវជនស្រុកកណ្តាលស្ទឹង នៅព្រឹកថ្ងៃទី១៧ ខែមិថុនា ឆ្នាំ២០១៨នេះ បានអញ្ជើញជួបសំណេះសំណាលជាមួយសកម្មជន យុវជន កម្មករ កម្មការិនី សមាជិកបក្ស ចំនួន០៣ឃុំ គឺឃុំសៀមរាប ព្រែកស្លែង និងឃុំបឹងខ្យាង សរុបចំនួន១,២២០នាក់ ស្ថិតនៅបរិវេណវត្តវិហារត្រាញ់ (ឃុំព្រែកស្លែង) ស្រុកកណ្តាលស្ទឹង។
ថ្លែងនៅក្នុងពិធីដ៏មានអត្ថន័យនោះ លោក ណុប រ័ត្ននិមល បានដាស់តឿនក្រើនរំលឹកដល់សកម្មជន យុវជនទាំងអស់ថា ត្រូវធ្វើជាភ្នែក ជាច្រមុះឲ្យបក្ស ពោលគឺត្រូវចេះពន្យល់ណែនាំ កែតម្រូវ ដល់យុវជនដូចគ្នា រួមទាំងពុក ម៉ែបងប្អូនឲ្យយល់ពីគោលនយោបាយដឹកនាំរបស់បក្សប្រជាជនកម្ពុជា ក្រោមការដឹកនាំសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តី។
បើតាមលោក ណុប រ័ត្ននិមល ចំពោះបងប្អូនកម្មករ កម្មការិនីវិញ ត្រូវបានថ្នាក់ដឹកនាំគណបក្សប្រជាជនកម្ពុជា ក៏ដូចជារាជរដ្ឋាភិបាល ពិសេសសម្តេចតេជោ ហ៊ុន សែន ដែលបានយកចិត្តទុកដាក់ ចុះជួបសំណេះសំណាល និងដោះស្រាយបញ្ហាប្រឈមនានាជាប្រចាំ ព្រមទាំងបានផ្តល់នូវអត្ថប្រយោជន៍ជាច្រើន ជូនដល់បងប្អូនកម្មករ កម្មាការីនី។
ចំពោះបងប្អូនកម្មករ-កម្មការិនីវិញ ត្រូវបានថ្នាក់ដឹកនាំគណបក្សប្រជាជនកម្ពុជា ក៏ដូចជារាជរដ្ឋាភិបាល ពិសេសសម្តេចតេជោ ហ៊ុន សែន ដែលបានយកចិត្តទុកដាក់ ចុះជួបសំណេះសំណាល និងដោះស្រាយបញ្ហាប្រឈមនានាជាប្រចាំ ព្រមទាំងបានផ្តល់នូវអត្ថប្រយោជន៍ជាច្រើន ជូនដល់បងប្អូនកម្មករ-កម្មការីនីមានដូចជា៖
*ការចេញមុនម៉ោង១៥នាទី សម្រាប់កម្មការិនីមានផ្ទៃពោះ
*ទទួលបានប្រាក់ខែគោល អប្បរមា១៧០$/ខែ
*ជិះរថយន្តក្រុងដោយឥតគិតថ្លៃ សម្រាប់អ្នកធ្វើការនៅរាជធានីភ្នំពេញ
*ឈប់សម្រាកលំហែរមាតុភាពដោយទទួលបានប្រាក់ខែ១២០%
*ព្យាបាលជម្ងឺដោយមិនគិតប្រាក់នៅតាមបណ្តាមន្ទីរពេទ្យរដ្ឋ
*ទទួលបានប្រាក់សោធននិវត្តន៍ដូចមន្ត្រីរាជការចាប់ពីឆ្នាំ២០១៩តទៅ
*ទទួលបានប្រាក់ឧបត្ថម្ភ៤០០.០០០៛ (កូន០១), ៨០០.០០០៛ (ភ្លោះ០២), ១.២០០.០០០៛ (ភ្លោះ០៣) ក្នុងពេលឆ្លងទន្លេតាមរយៈបេឡាជាតិរបបសន្តិសុខសង្គម (ប.ស.ស) រីឯប្រាក់ខែនឹងបន្តឡើងជាបន្តបន្ទាប់ទៀតផងដែរ។
លោកបានអំពាវនាវដល់សកម្មជន យុវជន កម្មករ-កម្មការិនីអញ្ជើញទៅបោះឆ្នោតឲ្យបានគ្រប់ៗគ្នា ហើយជួយជំរុញពុក ម៉ែ បងប្អូន ពិសេសមិត្តភ័ក្រ្ត នៅកន្លែងការងារនៅតាមរោងចក្រនានា អញ្ជើញទៅបោះឆ្នោតជូន គណបក្សប្រជាជនកម្ពុជា ដែលមានលេខរៀងទី២០ ដើម្បីសម្តេចតេជោ ហ៊ុន សែន បន្តធ្វើជានាយករដ្ឋមន្ត្រីនៅអាណត្តិទី០៦នេះ និងអាណត្តិបន្តបន្ទាប់ទៀត ព្រោះមានតែគណបក្សប្រជាជនតែមួយគត់ រក្សាបាននូវសុខសន្តិភាព ស្ថិរភាពនយោបាយ ការអភិវឌ្ឍន៍ និងតែងតែរួមសុខរួមទុក្ខជាមួយប្រជាជនកម្ពុជាគ្រប់កាលៈទេសៈ៕
