(ភ្នំពេញ)៖ លោក Robert Elliott អគ្គនាយកប្រតិបត្តិ និងនាយកចាត់ការទូទៅ នៃក្រុមហ៊ុន Manulife បានសំដែងនូវភាពវិជ្ជមាន ខណៈដែលក្រុមហ៊ុននេះ បានសម្រេចចិត្តជ្រើសរើសប្រទេសកម្ពុជា ក្នុងការបើកអាជីវកម្មធានារ៉ាបរង់អាយុជីវិតដ៏ធំនេះ។
លោកបានលើកឡើងថា ការជ្រើសរើសយកប្រទេសកម្ពុជា ក្នុងការបើកអាជីវកម្ម ជាការសម្រេចចិត្តដ៏ត្រឹមត្រូវ ព្រោះកម្ពុជាជាប្រទេស ដែលមានសេដ្ឋកិច្ចរីកចម្រើន រឹងមាំល្អ រួមជាមួយកំណើនដ៏ឆាប់រហ័ស នៃប្រជាជនដែលមានកម្រិតជីវភាពធូរធារ។
ការលើកឡើងបែបនេះ របស់លោក Robert Elliott ធ្វើឡើងក្នុងកម្មវិធី ប្រគល់ពានកិត្តិយស ជូនទីប្រក្សាធានារ៉ាប់រងឆ្នើម នាថ្ងៃទី២៤ ខែកុម្ភៈ ឆ្នាំ២០១៨ សម្រាប់ការចូលរួមចំណែកធ្វើឲ្យក្រុមហ៊ុន រីកចម្រើន និងទទួលបានជោគជ័យរហូតដល់ពេលបច្ចុប្បន្ន។
ក្រុមហ៊ុន Manulife ជាក្រុមហ៊ុនធានារ៉ាបរង់អាយុជីវិត អន្ដរជាតិដំបូងគេ បំផុតដែលបានចូលមកទីផ្សារកម្ពុជា និងបានចាប់ផ្ដើមវិស័យនេះដំបូងគេផងដែរ។ គិតមកដល់បច្ចុប្បន្នក្រុមហ៊ុន Manulife មានវត្តមាននៅក្នុងប្រទេសកម្ពុជា ប្រមានជាង៥ឆ្នាំមកហើយ និងបានធ្វើកិច្ចការជាច្រើន នៅក្នុងប្រទេសកម្ពុជា រួមមានការធ្វើវគ្គសិក្ខាសាលាស្ដីពីសារៈសំខាន់ នៃការធានារ៉ាបរង់អាយុជីវិត ក៏ដូចជាផ្ដោតការយកចិត្តទុកដាក់ ទៅលើការផ្សព្វផ្សាយកេរ្ដិ៍ឈ្មោះនៅក្នុងទីផ្សារកម្ពុជាផងដែរ។
លោក Robert Elliott បានថ្លែងឲ្យដឹងថា ការជ្រើសរើសយកប្រទេសកម្ពុជា ជាការសម្រេចចិត្តយ៉ាងត្រឹមត្រូវ មួយវិញទៀតវិស័យធានារ៉ាបរង់អាយុជីវិតនេះជាវិស័យដ៏មានសារៈសំខាន់ ក្នុងការជួយកសាងសេដ្ឋកិច្ចក្នុងប្រទេសដែលកំពុងរីកចម្រើន ដូចជាប្រទេសកម្ពុជានេះឯង។ វិស័យធានារ៉ាបរងអាយុជីវិត ក៏បានជួយសម្រាលបន្ទុករបស់រាជរដ្ឋាភិបាល ដោយក្រុមហ៊ុនបានជួយការពារអនាគតហិរញ្ញវត្ថុ ជូនដល់ប្រជាពលរដ្ឋក្នុងប្រទេស។
លោកបានបញ្ជាក់ទៀតថា វិស័យនេះក៏បានជំរុញជួយឲ្យប្រជាពលរដ្ឋកម្ពុជា ទាំងអស់រៀបចំផែនការហិរញ្ញវត្ថុដ៏ល្អសម្រាប់ខ្លួនគេផ្ទាល់ ឬក៏រៀបចំផែន
ការសម្រាប់ការអប់រំបុត្រធីតារបស់ពួកគាត់ និងអាចជួយកសាងសេដ្ឋកិច្ចនៅក្នុងស្រុក នេះជាពេលវេលា និងការសម្រេចដ៏ត្រឹមត្រូវក្នុងការចូលមកទីផ្សារនៃប្រទេសកម្ពុជា។
ក្នុងនោះដែរលោកអគ្គនាយក ក៏បានលើកសសើរពីការខិតខំប្រឹងប្រែងរបស់បុគ្គលិកក្រុមហ៊ុន ដែលបានជួយឲ្យក្រុមហ៊ុនរីកចម្រើនរហូតមកដល់បច្ចុប្បន្ន។ លោកថា «ខ្ញុំពិតជារីករាយខ្លាំងមែនទែននៅពេលដែលឃើញការកើនឡើង នៃចំនួនទីប្រក្សាឆ្នើមរបស់ក្រុមហ៊ុន Manulife ជារៀងរាល់ឆ្នាំ នេះសរបញ្ជាក់ពីការខិតខំប្រឹងប្រែង របស់ពួកគាត់ក្នុងការជួយឲ្យក្រុមហ៊ុនទទួលបានជោគជ័យ»។
សូមបញ្ជាក់ថា Manulife ជាក្រុមហ៊ុនផ្ដល់សេវាកម្មហិរញ្ញវត្ថុ ឈានមុខគេលំដាប់ថ្នាក់អន្ដរជាតិ ដែលផ្ដល់ដំណោះស្រាយសម្រាប់អនាគត ក្នុងការជួយអតិថិជនសម្រេចចិត្ត លើផែនការហិរញ្ញវត្ថុរបស់ពួកគេ។ ក្រុមហ៊ុន Manulife បានចាប់ផ្ដើមប្រតិបត្តិការរបស់ខ្លួននៅក្នុងប្រទេសកម្ពុជា កាលពីថ្ងៃទី២៨ ខែមិថុនា ឆ្នាំ២០១២ គិតមកដល់បច្ចុប្បន្ននេះ ក្រុមហ៊ុនបានប្រតិបត្តិការលើទីផ្សារកម្ពុជាប្រមាណជាង៥ឆ្នាំមកហើយ និងបានជួយដល់ប្រជាជនកម្ពុជាជាច្រើននាក់ផងដែរ៕
