(ភ្នំពេញ)៖ អ្នកជិះបញ្ច្រាសនៅរង្វង់មូលវិមានឯករាជ្យ នៅតែបន្តកើតមានជារៀងរាល់ថ្ងៃ បើទោះបីជាសមត្ថកិច្ច និងអាជ្ញាធរដាក់កម្លាំងប្រចាំការស្ទាក់ចាប់ទាំងយប់ទាំងថ្ងៃក្តី ជាក់ស្តែងនៅយប់មិញថ្ងៃទី១៩ ខែកុម្ភៈ ឆ្នាំ២០១៨ សមត្ថកិច្ចអនុវត្តន៍ច្បាប់ និងអាជ្ញាធរបានឃាត់បាន យានយន្តចំនួន១៦គ្រឿង បញ្ជូនទៅស្នងការដ្ឋាននគរបាលរាជធានីភ្នំពេញ។

របាយការណ៍របស់អាជ្ញាធរខណ្ឌដូនពេញ បានឲ្យដឹងថា នៅថ្ងៃទី១៩​ ខែកុម្ភៈ ឆ្នាំ២០១៨ ចាប់ពីម៉ោង០៧៖០០នាទីព្រឹក ដល់ម៉ោង១០៖០០នាទីយប់ កម្លាំងគណៈបញ្ជាការឯកភាពខណ្ឌដូនពេញ សហការជាមួយការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ អនុវត្តយុទ្ធនាការឃាត់ម៉ូតូ និងរថយន្ត បើកបញ្ច្រាសទិសដៅចរាចរណ៍ នៅរង្វង់មូលជុំវិញវិមានឯករាជ្យ និងផ្លូវព្រះសុរាម្រឹត ស្ថិតក្នុងសង្កាត់ចតុមុខ ខណ្ឌដូនពេញ ឃាត់យានយន្តសរុបចំនួន១៦គ្រឿង ក្នុងនោះរួមមាន៖ ម៉ូតូចំនួន១២គ្រឿង​ និង រ៉ឺម៉ក់កង់បី៤គ្រឿង។

បច្ចុប្បន្នយានយន្តទាំងនោះ បានញ្ជូនទៅការិយាល័យចរាចរណ៍ ជើងគោកនៃស្នងការដ្ឋាននគរបាលរាជធានីភ្នំពេញ ដើម្បីធ្វើកាអប់រំណែនាំបន្តតាមនីតិវិធី។

ជាមួយគ្នានេះ​ នៅយប់មិញនេះដែរ​ កម្លាំងគណ:បញ្ជាការឯកភាពខណ្ឌ សហការជាមួយមន្ទីរសង្គមកិច្ចរាជធានីភ្នំពេញ ដែលដឹកនាំផ្ទាល់ដោយលោកស្រី មុំ ចាន់ដានី ប្រធានមន្ទីរសង្គមកិច្ចរាជធានីភ្នំពេញ បានដឹកនាំកម្លាំងចុះរដ្ឋបាល និងធ្វើការឃាត់ខ្លួនអ្នកប្រើប្រាស់គ្រឿងញៀនចំនួន០៦នាក់ នៅចំនុចផ្លូវលេខ ១៥៤កែងផ្លូវលេខ៤៩ ភូមិ៧ សង្កាត់ផ្សារថ្មីទី៣ (ប្លុកតាន់ប៉ា ) ខណ្ឌដូនពេញ រាជធានីភ្នំពេញ។

អ្នកប្រើប្រាស់គ្រឿងញៀន០៦នាក់នោះ ត្រូវបានបញ្ជូនទៅមជ្ឈមណ្ឌលឱកាសខ្ញុំ ដើម្បីស្តារនីតិសម្បទារ៕