(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្រ្តីនៃ​កម្ពុជា បានប្រកាសជាសាធារណៈថា សម្ដេចនឹងសន្យាជួយព្យាបាលជំងឺ តារាកំប្លែង នាយ វីតាមីនសេ រហូតជាសះស្បើយ នឹងបន្តមកចូលរួមការងារសិល្បៈឡើងវិញ បានដូចធម្មតា ខណៈដែលតារាកំប្លែងរូបនេះ កំពុងតែមានជំងឺ​ថ្លើមធ្ងន់ធ្ងរ និងបានបញ្ជូនទៅព្យាបាល នៅក្នុងទីក្រុងបាងកក ប្រទេសថៃ កាលពីថ្ងៃទី១១ ខែធ្នូ​ ឆ្នាំ២០១៧នេះ។

ការមានប្រសាសន៍របស់សម្ដេចតេជោ គឺបានធ្វើឡើងក្នុងឱកាសដែលសម្ដេច អញ្ជើញចូលរួមជាអធិបតីភាព និងសំណេះសំណាល ក្នុងពិធីប្រគល់ប្រាក់រង្វាន់រាជរដ្ឋាភិបាល ជូនដល់កីឡាករ-កីឡាការិនី ជ័យលាភីមេដាយមាស ក្នុងការប្រកួតកីឡា Sea Games លើកទី២៩ និងការប្រកួតជើងឯក គ្រប់កម្រិតជាលក្ខណៈអន្តរជាតិ នៅវិមានសន្តិភាព នាព្រឹកថ្ងៃទី១៥ ខែធ្នូ ឆ្នាំ២០១៧នេះ។

សម្ដេចតេជោ ហ៊ុន សែន នាយក​រដ្ឋមន្រ្តីនៃកម្ពុជា​ មានប្រសាសន៍ថា «និយាយឲ្យច្បាស់ទៅ..យ៉ាណា ក៏ត្រូវតែព្យាបាលតាវីតាមីនសេឲ្យជាដែរ...! តាវីតាមីនសេ មិននិយាយខ្ញុំប្រកាសថ្ងៃនេះ.. ថ្ងៃមុនភរិយាខ្ញុំឲ្យប្រាក់មួយចំនួន​​ ទៅពិនិត្យ..ត្រឡប់មកវិញ​គាត់សម្ភាសន៍​ តាម CNC (ទូរទស្សន៍CNC) តម្រូវការនៃការវះកាត់ថ្លើម​ របស់គាត់​ត្រូវតែធ្វើ​. ខ្ញុំជូន៥ម៉ឺនដុល្លារភ្លាម ឲ្យទៅព្យាបាល ហៅទូរស័ព្ទទៅតាសេ..តាសេយំតែម្ដង..!»។

សម្ដេចតេជោ ហ៊ុន សែន បានបញ្ជាក់ទៀតថា ការជួយដល់តារាកំប្លែង នាយវីតាមីនសេ នៅពេលនេះ គឺជាការស្រោចស្រង់ជីវិត ជួយសង្គ្រោះឲ្យទាន់ពេលវេលា ព្រោះស្ថានភាពជំងឺកំពុងតែត្រូវការវះកាត់ភ្លាមៗ ហើយបើចាំរៃអង្គាសប្រាក់គ្នា ម្នាក់បន្តិចៗ នោះនឹងហួសពេលមិនខាន។

សូមរំឭកថា មុននឹងសម្ដេចតេជោ ហ៊ុន សែន​ ប្រកាសព្យាបាលតារាកំប្លែង នាយ វីតាមីនសេ ឲ្យជាសះស្បើយនៅពេលនេះ នាយវិតាមីនសេ និងក្រុមគ្រួសារ ក៏ធ្លាប់ទទួលបាននូវការឧបត្ថម្ភ នូវទឹកប្រាក់ប្រមាណ៥ពាន់ដុល្លារ ពីសម្ដេចកិត្តិព្រឹទ្ធបណ្ឌិត ​ប៊ុន រ៉ានី ហ៊ុន សែន កាលពីថ្មីៗនេះ រួចមកហើយដែរ ដើម្បីបញ្ចូននាយវីតាមីនសេ ទៅព្យាបាលនៅក្នុងប្រទេសថៃ កាលពីលើកទី១។

សូមបញ្ជាក់ថា តារាកំប្លែង នាយ វីតាមីនសេ កាលពីថ្ងៃទី១៥ ខែវិច្ឆិកា ឆ្នាំ២០១៧ ត្រូវបានក្រុមគ្រួសារសម្រេចបញ្ចូន ទៅព្យាបាលបន្តនៅមន្ទីរពេទ្យ ប្រទេសថៃ ដើម្បីធ្វើការវះកាត់ជំងឺដុំសាច់ ដែលដុះក្នុងថ្លើម។ មិនតែប៉ុណ្ណោះ នាយក៏មានជំងឺទឹកនោមផ្អែម និងមានដំបៅក្រពះធ្ងន់ធ្ងរផងដែរ៕