(កំពង់ចាម)​​៖ អតីត​​​បេក្ខជនក្រុមប្រឹក្សាឃុំ ក្នុងស្រុកកងមាស ខេត្តកំពង់ចាមសរុប៦នាក់ទៀត របស់គណបក្សសង្គ្រោះជាតិ ដែលទើបរលាយ​បានប្រកាសចុះចូលជាមួយ គណបក្សប្រជាជនកម្ពុជា ដោយសារតែពួក​គាត់​បានឃើញ នូវអំពើក្បត់ជាតិរបស់មេគណបក្សសង្គ្រោះជាតិ ដែលបម្រើបរទេស​។ នេះបើតាមលិខិតដែល​អង្គភាព Fresh News ទទួលបាននៅថ្ងៃទី២៥ ខែវិច្ឆិកា ឆ្នាំ២០១៧នេះ។

ការសម្រេចដើរចេញរបស់ អតីតមន្រ្តីគណបក្សសង្រ្គោះជាតិ​​​ទាំង៦រូបនេះ បានធ្វើឡើងបន្ទាប់ពីតុលាការកំពូល បានកាត់​រំលាយគណបក្សសង្រ្គោះជាតិ ដែលពាក់ព័ន្ធនឹង ការប្រព្រឹត្តអំពើក្បត់ជាតិ ព្រមទាំងបានហាមឃាត់សមាជិកជាន់ខ្ពស់របស់គណបក្សនេះ ចំនួន១១៨រូប មិនឱ្យធ្វើនយោបាយ រយៈពេល៥ឆ្នាំផងដែរ កាលពីថ្ងៃទី១៦ ខែវិច្ឆិកា ឆ្នាំ២០១៧។

អតីតមន្ដ្រីគណបក្សសង្គ្រោះជាតិ​​ទាំង៦រូបនេះ​ រួមមាន៖
ទី១៖លោក​ស្រី សួន ហួន អាយុ៦០ឆ្នាំ បេក្ខជន​ក្រុមប្រឹក្សាឃុំខ្ចៅ ស្រុកកងមាស
ទី២៖លោក សែម បាន អាយុ៧០ឆ្នាំ បេក្ខជន​ក្រុមប្រឹក្សាឃុំខ្ចៅ ស្រុកកងមាស
ទី៣៖លោក ឡូត ជាន អាយុ៧៨ឆ្នាំ បេក្ខជន​ក្រុមប្រឹក្សាឃុំខ្ចៅ ស្រុកកងមាស
ទី៤៖លោក ឆុំ យុន អាយុ៥១ឆ្នាំ បេក្ខជនក្រុមប្រឹក្សាឃុំរាយប៉ាយ ស្រុកកងមាស
ទី៥៖លោកស្រី ឈួន សុគន្ធ អាយុ៤៤ឆ្នាំ បេក្ខជនក្រុមប្រឹក្សាឃុំរកាគយ ស្រុកកងមាស
ទី៦៖លោក ហ៊ាន ដា អាយុ៤៨ឆ្នាំ បេក្ខជនក្រុមប្រឹក្សាឃុំអង្គរបាន ស្រុកកងមាស។

​​គណបក្សប្រជាជនកម្ពុជាខេត្តកំពង់ចាម ​បានប្រកាសស្វាគមន៍ និងទទួលសមាជិកសមាជិកាថ្មី មកពីអតីតគណបក្សសង្គ្រោះជាតិទាំង៦​​រូបនោះ ដែលសុំចូលរួមរស់ជីវភាពនយោបាយជាមួយ គណបក្សប្រជាជនកម្ពុជា បន្ទាប់ពីបានជ្រួតជ្រាបនូវអំពើក្បត់ជាតិរបស់មេបក្សខ្លួន។

​សូមជម្រាបថា ដោយសារតែសន្ទុះនៃការសម្រុកចុះចូលបាននិងកំពុងកើនឡើងយ៉ាងខ្លាំង ហើយម្យ៉ាងទៀតថ្ងៃកំណត់ទី២៤ ខែវិច្ឆិកា អាចមានការរៀបចំមិនទាន់ ដូច្នេះសម្ដេចតេជោ ហ៊ុន សែន នាយករដ្ឋមន្រ្តី នៃកម្ពុជា បានប្រកាសផ្តល់ឱកាសបន្តជូនមន្រ្តីគណបក្សសង្គ្រោះជាតិ នៅថ្នាក់មូលដ្ឋានទាំងអស់ មកចូលរួមជីវភាពនយោបាយ ជាមួយគណបក្សប្រជាជន រហូតដល់ម៉ោង៩យប់ ថ្ងៃទី២៦ ខែវិច្ឆិកា ឆ្នាំ២០១៧។

សម្តេចតេជោ ហ៊ុន សែន បាន​អំពាវនាវឲ្យអតីតមន្រ្តីគណបក្សសង្រ្គោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមយប់ថ្ងៃទី២៦​ ធ្វើឡើងតាមលក្ខខណ្ឌរបស់គ.ជ.ប៕