(បាត់ដំបង)៖ គិតត្រឹមថ្ងៃទី២៤ ខែវិច្ឆិកា​ ឆ្នាំ​២០១៧ អតីតក្រុមប្រឹក្សាស្រុក មេឃុំ ជំទប់ទី១ ជំទប់ទី២ និងសមាជិកក្រុមប្រឹក្សាឃុំ-សង្កាត់ មកពីគណបក្សសង្គ្រោះជាតិ​ នៅទូទាំងខេត្តបាត់ដំបងមានចំនួន៩៥រូប បានសុំចូលរួមក្នុងជីវភាពនយោបាយ​ ជាមួយគណបក្សប្រជាជនកម្ពុជា​។ ក្នុងនោះក្រុមប្រឹក្សាស្រុក​៦នាក់​ មេឃុំ ជំទប់ទី១​ ជំទប់ទី២​ សមាជិកក្រុមប្រឹក្សាឃុំ-សង្កាត់សរុប៨៩នាក់។

ការសម្រេចចាកចេញរបស់ អតីតមន្រ្តីគណបក្សសង្រ្គោះជាតិទាំង៩៥រូប (ស្រី១៩នាក់) នេះ បានធ្វើឡើងមុននិងបន្ទាប់ពីតុលាការកំពូល បានកាត់ទោសរំលាយគណបក្ស សង្រ្គោះជាតិ ដែលពាក់ព័ន្ធនឹង ការប្រព្រឹត្តអំពើក្បត់ជាតិព្រមទាំងបានហាមឃាត់សមាជិកជាន់ខ្ពស់របស់គណបក្សនេះ ចំនួន១១៨រូប មិនឲ្យធ្វើនយោបាយ រយៈពេល៥ឆ្នាំផងដែរ កាលពីថ្ងៃទី១៦ ខែវិច្ឆិកា ឆ្នាំ២០១៧។

គណបក្សប្រជាជនកម្ពុជាខេត្តបាត់ដំបង បានប្រកាសស្វាគមន៍ និងទទួលសមាជិកសមាជិកាថ្មី មកពីអតីតគណបក្សសង្គ្រោះជាតិចំនួន៩៥រូប ដែលសុំចូលរួមក្នុងជីវភាពនយោបាយ ជាមួយគណបក្សប្រជាជនកម្ពុជា បន្ទាប់ពីបានជ្រួតជ្រាបនូវអំពើក្បត់ជាតិរបស់មេបក្សខ្លួន។

សម្រាប់ការចុះចូលពីសំណាក់អតីតមន្រ្តីគណបក្សសង្គ្រោះជាតិខាងលើនេះ ត្រូវបានសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រមុខដឹកនាំគណបក្សប្រជាជនកម្ពុជា បានប្រកាសតាមបណ្តាញសារព័ត៌មាន Fresh News ថា «ការស្ម័គ្រចិត្តចូលរួមជីវភាពនយោបាយមកគណបក្សប្រជាជនកម្ពុជា មានឱសានវាទត្រឹមម៉ោង៩យប់ថ្ងៃទី២៦ ខែវិច្ឆិកាប៉ុណ្ណោះ ព្រោះការរៀបចំបញ្ជីក្រុមប្រឹក្សាឃុំសង្កាត់ថ្មី ដើម្បីបញ្ជូនទៅកាន់ គជប នឹងត្រូវបិទត្រឹមថ្ងៃទី២៦ ខែវិច្ឆិកា, ប្រសិនបើចាប់ពីថ្ងៃទី២៧ ខែវិច្ឆិកាទៅ ការចូលរួមនៅតែបន្តដដែល ប៉ុន្តែមិនផ្តល់តួនាទីអ្វីនោះទេ»។

សម្តេចតេជោ ហ៊ុន សែន បានប្រសាសន៍អំពាវនាវឲ្យអតីតមន្រ្តីគណបក្សសង្រ្គោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចូលរួមជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមថ្ងៃទី២៦ ខែវិច្ឆិកា នេះ ធ្វើឡើងតាមលក្ខខណ្ឌរបស់ គ.ជ.ប៕