(បាត់ដំបង)៖ ជើងក្រោម CNRP កាន់តែបែកបាក់ហើយ! សមាជិកក្រុមប្រឹក្សាឃុំមុខរាហ៍ ស្រុករុក្ខគិរី ខេត្តបាត់ដំបងម្នាក់ទៀតហើយ មកពីគណបក្សសង្រ្គោះជាតិ បានប្រកាសជាសាធារណៈ ដើរចេញេពីបក្សរបស់ខ្លួន ហើយមកសូំរួមរស់ ជាមួយគណបក្សប្រជាជនកម្ពុជា ដោយសារតែគាត់បានឃើញថា លោក កឹម សុខា ជាជនក្បត់ជាតិ សម្លាប់ជាតិឯង និងបម្រើបរទេស។ នេះបើតាមលិខិតដែលអង្គភាពព័ត៌មាន Fresh News ទទួលបាននៅព្រឹកថ្ងៃទី​០៣ ខែវិច្ឆិកា ឆ្នាំ២០១៧។

ថ្នាក់ដឹកនាំសំខាន់ជើងក្រោមរបស់បក្សប្រឆាំងរូបនេះ គឺលោក សាន់ ទូច អាយុ៥៣ឆ្នាំ ជាសមាជិកក្រុមប្រឹក្សាឃុំមុខរាហ៍ ស្រុករុក្ខគិរី ខេត្តបាត់ដំបង។

យោងតាមលិខិតផ្ញើជូនប្រធានគណបក្សប្រជាជនកម្ពុជា ខេត្តបាត់ដំបង ដែលបណ្តាញសារព័ត៌មាន Fresh News ទើបទទួលបាននៅមុននេះបន្តិច ទាំងលោក វ៉ា ចំរើន បានបញ្ជាក់ថា «ក្រោយពីខ្ញុំ បានមើលឃើញវីដេអូ ឃ្លីប និងសកម្មភាពជាក់ស្តែង ដែលដឹកនាំដោយលោក កឹម សុខា គឺពិតជាបម្រើបរទេស និងនាំឲ្យប្រទេសពិតជាធ្លាក់ក្នុងគ្រោះមហន្តរាយពិតប្រាកដមែនដូច្នេះ ខ្ញុំអស់ជំនឿលើការដឹកនាំរបស់លោក កឹម សុខា ហើយមកសុំរួមរស់ជាមួយគណបក្សប្រជាជនកម្ពុជា ដឹកនាំដោយសម្តេចតេជោ ហ៊ុន សែន ដែលធ្វើឲ្យប្រទេសជាតិ មានការរីកចម្រើន និងអភិវឌ្ឍន៍លើគ្រប់វិស័យ»

សម្តេចតេជោ ហ៊ុ​ន សែន ក្នុងពេលដែលសម្តេចអញ្ជើញ ជួបសំណេះសំណាលជាមួយ តំណាងកម្មករនិយោជិត កាលពីពេលកន្លងទៅ ក៏បានថ្លែងបញ្ជាក់ថា នៅពេលដែលគណបក្ស​សង្រ្គោះជាតិ ត្រូវរំលាយក្រោមការចោទប្រកាន់ថា «ប្រព្រឹត្តិអំពើក្បត់ជាតិ» មេឃុំ-ចៅសង្កាត់ មកពីគណបក្សប្រឆាំងមួយនេះ នៅតែរក្សាតំណែងដដែលប្រសិនបើ ពួកគេព្រមមករួមរស់ជាមួយ គណបក្សប្រជាជនកម្ពុជា។

គិតត្រឹមថ្ងៃទី៣ ខែវិច្ឆិកា ឆ្នាំ២០១៧នេះ តំណាងរាស្ដ្រ សមាជិកក្រុមប្រឹក្សា មេឃុំ ជំទប់ និងថ្នាក់ដឹកនាំមូលដ្ឋានសំខាន់ៗ សរុប៥៦នាក់ (គិតទាំងម្នាក់នេះទៀត) បានសម្រេចចិត្តដើរចេញពីគណបក្សសង្គ្រោះជាតិ ហើយសុំចូលរួមរស់ជាមួយគណបក្ស ប្រជាជនកម្ពុជា ដែលកំពុងដឹកនាំរាជរដ្ឋាភិបាល៕