(ភ្នំពេញ)៖ ក្រោយការស្នើសុំពីម្ដាយសពលោកបណ្ឌិត កែម ឡី និងប្អួនប្រុសបង្កើត នៅល្ងាចព្រលប់ថ្ងៃទី២៧ ខែតុលា ឆ្នាំ២០១៧នេះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានបន្ដឧបត្ថម្ភថវិកាបន្ថែមចំនួន២ម៉ឺនដុល្លារ សម្រាប់បន្ដការសាងសង់ចេតិយ ក្រោយពីថវិកា៥ម៉ឺនដុល្លារមុនចំណាយសាងសង់អស់ហើយ។

ថវិកាចំនួន២ម៉ឺនដុល្លារសហរដ្ឋអាមេរិកនេះ ត្រូវបានសម្តេចតេជោ ហ៊ុន សែន ប្រគល់តាមរយៈលោក លឹម ជាវុត្ថា នាយកប្រតិបត្តិអង្គភាពព័ត៌មាន Fresh News ដើម្បីយកទៅប្រគល់ជូនលោកយាយ ភោគ សេ និងប្អូនប្រុសបង្កើតសពលោកបណ្ឌិត កែម ឡី នៅឯស្រុកកំណើតខេត្តតាកែវ នាថ្ងៃទី២៨ ខែតុលា ឆ្នាំ២០១៧ស្អែកនេះ។

សូមជម្រាបថា នៅថ្ងៃទី២៧ ខែតុលា​ ឆ្នាំ២០១៧នេះ លោកយាយ ភោគ សេ ជាម្តាយបង្កើត និងប្អូនបង្កើតរបស់សពលោកបណ្ឌិត កែម ឡី បានធ្វើលិខិតគោរពជូនសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដោយស្នើសុំបន្ថែមទៀត ដើម្បីបន្តធ្វើការសាងសង់ចេតិយ បន្ទាប់ពីថវិកាឧបត្ថម្ភរបស់សម្តេចចំនួន៥ម៉ឺនដុល្លារលើកទី១ បានចំណាយលើការសាងសង់ជំហានទី១អស់ទៅហើយ។

នៅក្នុងលិខិតគោរពជូនសម្តេចនេះ, លោកយាយ ភោគ សេ និងលោក កែម រិទ្ធិសិត ក៏បានថ្លែងអំណរគុណដ៏ជ្រាលជ្រៅម្តងទៀត ចំពោះសម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា ដែលកន្លងមកបានជួយឧបត្ថម្ភទឹកប្រាក់ចំនួន៥ម៉ឺនដុល្លាររួចហើយ។ រហូតមកដល់ពេលនេះចេតិយសពលោកបណ្ឌិត កែម ឡី បានសាងសង់ចំនួន៣០ភាគរយហើយ។

លោកយាយ ភោគ សេ និងលោក កែម រិទ្ធិសិត បានរៀបរាប់នៅក្នុងលិខិតយ៉ាងដូច្នេះថា៖ «នាងខ្ញុំក្នុងនាមម្តាយ និងប្អូនប្រុសបង្កើតរបស់សពលោកបណ្ឌិត កែម ឡី សូមសម្តេចមេត្តាជួយចូលរួមជា ថវិកាបន្តទៀត ដើម្បីយកទៅសាងសង់ចេតិយ​ ដែលនៅសល់ប្រមាណ៧០ភាគរយទៀត តាមសទ្ធា ជ្រះថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត។ កន្លងទៅក្រុមគ្រួសាររបស់នាងខ្ញុំ និងខ្ញុំបាទក៏ធ្លាប់ បានអំពាវនាវឲ្យសម្បុរជននានាទាំងក្នុង និងក្រៅប្រទេស ជួយឧបត្ថម្ភក្នុងការសាងសង់ចេតិយ ប៉ុន្តែបានថវិកាតិចតួចមិនគ្រប់តម្រូវការ ដើម្បីសាងសង់នោះទេ។ ដូច្នេះមានតែសម្តេចតេជោ និងកិត្តិព្រឹទ្ធបណ្ឌិត ជាក្តីសង្ឃឹមសម្រាប់គ្រួសាររបស់យើងខ្ញុំ ក្នុងការសាងសង់ចេតិយរហូតដល់ចប់ចុងចប់ដើម»។

ខាងក្រោមនេះជាលិខិតរបស់ម្តាយសពលោកបណ្ឌិត កែម ឡី និងប្អូនប្រុសបង្កើត គោរពជូនសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត៖