(ភ្នំពេញ)៖ នាឱកាសអញ្ជើញជាអធិបតីសម្ពោធក្រុមហ៊ុន Global Mobility Service Inc. របស់ប្រទេសជប៉ុន នៅថ្ងៃទី២៦ ខែតុលា ឆ្នាំ២០១៧ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបង្ហាញការគាំទ្រចំពោះប្រតិបត្តិការ និងសេវាកម្មរបស់ក្រុមហ៊ុន ដែលបង្កើតឡើង ដើម្បីធ្វើពិពិធកម្មឱកាសការងារ និងប្រាក់ចំណូលបន្ថែមសម្រាប់អ្នកបើកបររថយន្តឈ្នួល (តាក់ស៊ី) នៅកម្ពុជា។

លោករដ្ឋមន្ត្រី បានថ្លែង «ខ្ញុំពិតជាសប្បាយចិត្ត ជាមួយឧបករណ៍ និងប្រព័ន្ធ IoT របស់ក្រុមហ៊ុន Global Mobility Service Inc. ដែលអាចបញ្ជាយានយន្តពីចម្ងាយ ផ្តល់លទ្ធភាពដល់អ្នកបើកបរ ដែលគ្មានគណនីធនាគារ ឬសាច់ប្រាក់គ្រប់គ្រាន់ ដើម្បីទទួលបានប្រាក់កំចីស្វ័យប្រវត្តិសម្រាប់ទិញរថយន្តប្រកបអាជីវកម្មដោយខ្លួនឯង»។

លោករដ្ឋមន្ត្រី បានបង្ហាញជំនឿថា វាពិតជាមានសារៈសំខាន់ ក្នុងការរៀបចំបរិស្ថានអាជីវកម្មប្រភេទយានយន្ត ដូចជាការទិញរថយន្តឈ្នួល ឬតាក់ស៊ី ដែលជាមធ្យោបាយធ្វើដំណើរដ៏សំខាន់ សម្រាប់ការរស់នៅរបស់ប្រជាជននៅក្នុងប្រទេសកម្ពុជា ដែលមានកំណើនសេដ្ឋកិច្ចលូតលាស់ និងរីកចម្រើនជាលំដាប់។

«តាមរយៈសេវាកម្មប្រាក់កំចីរបស់ក្រុមហ៊ុន ដែលមានភាពងាយស្រួល និងភាពបត់បែនក្នុងការសងប្រាក់ត្រលប់មកវិញ នឹងជួយសម្រួលយ៉ាងច្រើន ដល់អ្នកបើករថយន្តឈ្នួល ឬ ម៉ូតូកង់បីទាំងអស់»។ លោក ប៉ាន សូរស័ក្តិ បានគូសបញ្ជាក់បន្ថែម។

បន្ថែមលើនេះ លោករដ្ឋមន្ត្រី ក៏បានសំណូមពរក្រុមហ៊ុន Global Mobility Service Inc. បង្កើតកម្មវិធីបណ្តុះបណ្តាលជំនាញបើកបរ និងច្បាប់ចរាចរណ៍សម្រាប់អ្នកបើកបរទាំងអស់ ដើម្បីលើកកម្ពស់ស្តង់ដារវិជ្ជាជីវៈ និងរួមចំណែកកាត់បន្ថយអត្រាគ្រោះថ្នាក់ចរាចរនៅក្នុងប្រទេសកម្ពុជា។

លោក តូកូស្ហ៊ិ ណាកាស៊ីម៉ា នាយកប្រតិបត្តិ ក្រុមហ៊ុនជប៉ុន Global Mobility Service, Inc បានឲ្យដឹងថា ក្រុមហ៊ុនមានគោលបំណងកាត់បន្ថយការបំពុលបរិយាកាស តាមរយៈបច្ចេកវិទ្យាទំនើបរបស់ជប៉ុន ដើម្បីជួយដល់អ្នកបើកបរនៅក្នុងប្រទេសកម្ពុជា ឲ្យក្លាយជាម្ចាស់យានយន្តពិតប្រាកដ និងសាងប្រាក់ចំណូលកាន់តែខ្ពស់។

«ប្រព័ន្ធ GMS មានសក្តានុពលធំធេង ក្នុងការអភិវឌ្ឍអាជីវកម្មប្រភេទសេវាកម្មថ្មី ដើម្បីបង្កើតការងារ បង្កើនប្រាក់ចំណូល និងលើកកម្ពស់បរិស្ថាន។ នៅក្នុងប្រទេសហ្វីលីពីន មានអ្នកបើកបរជាង ១០០០នាក់ កំពុងប្រើប្រាស់សេវាកម្មនេះ ហើយ GMS នឹងនាំមកជូនប្រជាជនកម្ពុជានូវប្រព័ន្ធ និងសេវាកម្មដូចគ្នា ដើម្បីរួមចំណែកក្នុងការអភិវឌ្ឍន៍ប្រទេសកម្ពុជា»។ លោក តូកូស្ហ៊ិ ណាកាស៊ីម៉ា បានគូសបញ្ជាក់។

សូមបញ្ជាក់ថា ក្រុមហ៊ុន Global Mobility Service Inc. បានបង្កើតឧបករណ៍ IoT ដែលហៅថាប្រព័ន្ធចល័ត ឬ «MCCS» ដែលអាចបិទដំណើរការយានយន្ត តាមរយៈការបញ្ជាពីចម្ងាយ ក្នុងករណីខកខានការបង់សងប្រាក់កម្ចីទាន់ពេលវេលា។ ប្រព័ន្ធនេះ អាចបង្កើតប្រតិបត្តិការប្រាក់កម្ចីស្វ័យប្រវត្តិ ជាពិសេសអ្នកបើកបរដែលមិនមានឥណទានគ្រប់គ្រាន់ ឬគណនីធនាគារ។ សម្រាប់ជំហានដំបូង ក្រុមហ៊ុន GMS នឹងសហការជាមួយធនាគារឯកទេស AEON ក្នុងការផ្តល់សេវាកម្មប្រាក់កំចីជូនអ្នកបើកបរដែលប្រថ្នាចង់បានយានយន្តផ្ទាល់ខ្លួន ដើម្បីសម្រេចបាននូវសង្គមមួយ ដែលមានវឌ្ឍនភាពសេដ្ឋកិច្ច និងបរិស្ថានល្អ៕