(កណ្តាល)៖ នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង ​នាយករងខុទ្ធកាល័យសម្ដេចតេជោ ហ៊ុន សែន បានបន្តប្រកាសប្រឆាំងដាច់ខាតមិនឲ្យមានបដិវត្តន៍ពណ៌កើតឡើងនៅកម្ពុជា បង្រ្កាប និងកម្ទេចឲ្យអស់រាល់សកម្មភាព​បំពានទាំឡាយណា ដែលមានបំណងមិនល្អបំពុលបរិយាកាសសង្គម ឈានដល់ការបំផ្លាញសន្តិភាព សន្តិសុខ និងសង្គមជាតិ។

នាយឧត្តមសេនីយ៍បានគូសបញ្ជាក់ថា «សមិទ្ធផល សន្តិភាព មានតម្លៃពុំអាចកាត់ថ្លៃបានឡើយ សន្តិភាពទទួលបានដោយសារការប្តូរសាច់ឈាមស្រស់ របស់វីរៈជនស្នេហាជាតិជាច្រើនរូប ក្នុងបុព្វហេតុការពារបូរណៈភាពទឹកដី ជាតិ សាសនា ព្រះមហាក្សត្រ»

ការប្រកាសយ៉ាងម៉ឺងម៉ាត់ខាងលើនេះ បានធ្វើឡើងខណៈនាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង នៅថ្ងៃទី១២ ខែតុលា ឆ្នាំ២០១៧នេះ បានជួបសំណេះសំណាលជាមួយប្រជាពលរដ្ឋ យាយជី តាជី ក្រុមប្រឹក្សា៦សង្កាត់ ក្រុងតាខ្មៅ ខេត្តកណ្ដាល ចំនួន៦៧០នាក់។

នាយឧត្តមសេនីយ៍ បានថ្លែងទៀតថា សុខសន្តិភាពមិនត្រូវបំផ្លាញបាត់បង់ទៅវិញ ដោយសារក្រុមជ្រុលនិយមមួយចំនួនតូច ដែលគាំទ្រពីបរទេសនោះបានទេ សូមប្រជាពលរដ្ឋទាំងអស់ រួមគ្នាថែរក្សាសន្តិភាពនេះឲ្យបានស្ថិតស្ថេរ គង់វង្សដើម្បីរក្សាសេចក្ដីសុខសាន្តរបស់ប្រជាពលរដ្ឋ និងបន្តការកសាង និងអភិវឌ្ឍន៍ប្រទេសជាតិ ឱ្យមានការរីកចំរើនឆាប់រហ័ស។ ថ្ងៃ៧មករាជាមូលដ្ឋានគ្រឹះ នាំឱ្យមានថ្ងៃ២៣ តុលា ទីក្រុងបារីស និង នយោបាយ​ឈ្នះឈ្នះរបស់សម្តេចតេជោ ហ៊ុន សែន បានធ្វើឱ្យប្រទេសជាតិទាំងមូល ទទួលបាននូវសុខសន្តិភាពពេញបរិបូរណ៍ គ្របដណ្ដប់ពេញផ្ទៃប្រទេស បំផ្លាញចោល នូវអង្គការចាត់តាំងខ្មែរក្រហមគ្មានតំបន់អប្បគមន៍កងទព័តែមួយ ប្រជាពលរដ្ឋគ្រប់ៗរូប បានរស់នៅជ្រកក្រោមរដ្ឋធម្មនុញ្ញតែមួយ ម្លប់សន្តិភាព យ៉ាងសុខសាន្ត ។

នាយឧត្តមសេនីយ៍ បានលើកឡើងទៀតថា «បច្ចុប្បន្ននេះមានអ្នក​វិនិយោគិនបរទេសធំៗ មកបណ្ដាក់ទុនវិនិយោគជាច្រើននៅកម្ពុជា លើហេដ្ឋារចនាសម្ពន្ធ័សង្គមសំណង់អគារខ្ពស់ៗ ផ្លូវថ្នល់ស្ពានអាកាស​ខ្វាត់ខ្វែងក្នុងក្រុងនៅតាមជនបទកំណើនភ្ញៀវទេសចរ មកទស្សនាកម្ពុជាជារៀង​រាល់​ឆ្នាំ ធ្វើឱ្យមានកំណើនសេដ្ឋកិច្ចនៅរក្សាបាន៨.៩។ ថ្មីៗនេះប្រមុខរាជរដ្ឋាភិបាល បានប្រកាសផ្ដល់អត្ថប្រយោជន៍ដល់ កម្មករ-កម្មការិនីមានប្រាក់ខែគោលឡើងដល់១៧០ដុល្លារនៅឆ្នាំ២០១៨ និងទទួលបានអត្ថប្រយោជន៍ផ្សេងៗជាច្រើនទៀត កម្មករ-កម្មការិនីរោងចក្រ និងកីឡាករ និងកីឡាការនីជិះរថយន្តក្រុងមិនយកលុយ ថែទាំសុខភាពពិនិត្យព្យាបាលតាមមន្ទីរពេទ្យរដ្ឋ មិនយកលុយកម្មការនីមានប្រាក់ឧបត្ថម្ភពេលឆ្លងទន្លេកូនមួយ៤០ម៉ឺនរៀល កូនភ្លោះ៨០ម៉ឺនរៀល មន្រី្តរាជការ ស្ថាបន័កងទព័នគរបាលជាស្រ្តីពេលឆ្លងទន្លេ ទទួលបានប្រាក់គោល​នយោបាយ​​គាំពារ​សង្គម ធ្វើឱ្យប្រជាពលរដ្ឋមានជីវភាពរស់នៅកាន់តែប្រសើរឡើង»

ក្នុងរដូវនៃថ្ងៃបុណ្យកឋិនទាន នាយឧត្តមសេនីយ៍ ហ៊ីង ប៊ុនហៀង និងលោកស្រី បានផ្ដួចផ្ដើមធ្វើបុណ្យកឋិនទានដង្ហែ ទៅវត្តប្រជុំនទីហៅវត្តក្រពើហាស្ថិតក្នុងក្រុងតាខ្មៅ ខេត្តកណ្ដាល ព្រមទាំងបាននាំយកបច្ច័យរបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប្រគេនវត្តបច្ច័យសង្កត់ត្រៃ១២០លានរៀល សម្រាប់បន្តកសាងសមិទ្ធផលនានាក្នុងវត្ត ចែកក្រណាត់ស និងថវិការជូនយាយជីតាជី គណៈកម្មការវត្តក្រុមយុវជនកាកបាទក្រហម កាយរិទ្ធសិស្សានុសិស្សលោកគ្រូ អ្នកគ្រូ ក្រុមប្រឹក្សាសង្កាត់កម្លាំងសមត្ថកិច្ច៕