(ក្រចេះ)៖ ករណីស្រ្ដីម្នាក់បានស្រែទ្រហោយំ ក្រោយបាត់កូនស្រីរបស់ខ្លួន អាយុទើបតែ៣ឆ្នាំ បណ្ដាលឲ្យមានការភ្ញាក់ផ្អើលពេញផ្សារក្រចេះ ទីរួមខេត្តក្រចេះ នាព្រឹកមិញនោះ ពេលនេះសមត្ថកិច្ចបានរកឃើញក្មេងស្រីនោះវិញហើយ បន្ទាប់ពីក្មេងស្រីនោះបានដើរចូលទៅក្នុងតូបលក់ខោអាវមួយក្នុងផ្សារ។

ករណីខាងលើនេះ បានកើតឡើងនៅព្រឹកថ្ងៃទី២៧ ខែកក្កដា ឆ្នាំ២០១៧នេះ នៅចំណុចផ្សារក្រចេះ ទីរួមខេត្តក្រចេះ បន្ទាប់ពីមានស្រ្ដីម្នាក់បានស្រែទ្រហោយំ ក្រោយបាត់កូនស្រីរបស់ខ្លួន អាយុទើបតែ៣ឆ្នាំ ខណៈបានដើរ ចូលផ្សារ ហើយឲ្យកូនស្រីនៅចាំម៉ូតូនៅខាងក្រៅផ្សារតែម្នាក់ឯង។

សមត្ថកិច្ចមូលដ្ឋានបានប្រាប់ភ្នាក់ងារ Fresh News មុននេះបន្តិចថា ក្មេងស្រីដែលបានម្ដាយបានស្រែទ្រហោយំ បណ្ដាលឲ្យមានការភ្ញាក់ផ្អើលពេញ ផ្សារក្រចេះ នាព្រឹកមិញនេះ បានរកឃើញវិញហើយ បន្ទាប់ពីក្មេងស្រីនោះ បានរត់នៅពួនក្នុងតូបលក់ខោអាវ។

ស្រ្ដីជាម្តាយខាងលើនេះ មានឈ្មោះ ស៊ីន សូនីតា អាយុ៤៨ឆ្នាំនិងកូនស្រីដែល បានបាត់ មានឈ្មោះ អ៊ិន ព្រហ្មដាលីស អាយុ៣ឆ្នាំ អ្នកទាំងពីររស់នៅ ភូមិស្រែស្ដៅ សង្កាត់អូរឫស្សី ក្រុងក្រចេះ។

តាមការរៀបរាប់របស់ស្រ្ដីរូបនោះ បានឲ្យដឹងថា មុនកើតហេតុ គាត់បានឌុបកូនស្រីមកផ្សារដើម្បីទិញម្ហូប ហើយក៏ឲ្យកូនស្រីអង្គុយចាំ ម៉ូតូតែម្នាក់ឯង នៅឯខាងក្រៅផ្សារ បន្ទាប់គាត់ក៏បានចូលផ្សារបានតែមួយភ្លែត ក៏ស្រាប់តែចេញពីផ្សារវិញ មិនបានឃើញកូនស្រី ទើបបង្កឲ្យមានការភ្ញាក់ផ្អើលស្រែកទ្រហោយំ ផ្អើលពេញផ្សារតែម្ដង៕