(ភ្នំពេញ)៖ ក្នុងដំណើរចុះពិនិត្យមើល កសិដ្ឋានចិញ្ចឹមជ្រូករបស់ក្រុមហ៊ុន ស៉ី ខេ វ៉ាយ អី របស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃម្សិលមិញ, ឆ្លើយតបនឹងសំណូមពរ ពីអ្នកចិញ្ចឹមជ្រូក សុំឲ្យបិទការនាំចូលប្រទេសជិតខាងនោះ លោករដ្ឋមន្ត្រី វេង សាខុន បានសន្យាថា នឹងរៀបចំសេចក្តីជូនដំណឹង ដល់គ្រប់បណ្តារាជធានី-ខេត្តទាំងអស់ អំពីការលុបបំបាត់ការនាំចូលខុសច្បាប់ នៅតាមច្រករបៀង និងស្នើសុំឲ្យអាជ្ញាធរមូលដ្ឋាន ចូលរួមទប់ស្កាត់ទាំងអស់គ្នា។
ឧកញ៉ា ម៉ុង ឬទ្ធី បានលើកឡើងថា ការបិទការនាំចូលជ្រូកខុសច្បាប់ គឺមិនអាចទៅរួចទេ បើក្រសួងកសិកម្មចេញច្បាប់ អនុញ្ញាតឲ្យនាំជ្រូកចូលនោះ។
លោកឧកញ៉ា ម៉ុង ឬទ្ធី បានលើកឡើងយ៉ាងដូច្នេះថា «ចេះតែនិយាយថាជ្រូកនាំចូលខុសច្បាប់ ចុះបើក្រសួងចេញច្បាប់អនុញ្ញាត ឲ្យវាមានអីខុសច្បាប់ទៀត។ ហើយចេះតែសន្យាថា ចាំពិនិត្យសិក្សាសិន បើថែមពាក្យមួយឃ្លាទៀតថា រហូតដល់ដួលរលំអស់សិន»។
សូមជម្រាបថា ការនាំចូលជ្រូកពីប្រទេសជិតខាង នៅតែបន្តជាបញ្ហាប្រឈមដល់កសិករ និងអ្នកចិញ្ចឹមជ្រូករបស់កម្ពុជា ដោយមិនអាចប្រកួតប្រជែងនឹងជ្រូកនាំចូលបាន ព្រោះជ្រូកនាំចូលមានតម្លៃថោកជាង ជ្រូកដែលចឹញ្ចឹមក្នុងស្រុក។ សូមបញ្ជាក់ថា ដើម្បីធានាស្ថិរភាពថ្លៃ និងតម្រូវការផ្គត់ផ្គង់ជ្រូកសាច់ក្នុងទូទាំងប្រទេស ក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឲ្យដឹកជញ្ជូនជ្រូកសាច់រស់នាំចូលជាមធ្យមប្រមាណ១២៥០ក្បាលក្នុងមួយថ្ងៃ៕
