(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងរំលឹកទៅដល់មន្រ្តីឲ្យបញ្ចប់នូវវប្បធម៌ប្តីស័ក្តិ៣ ប្រពន្ធស័ក្តិ៤ និងកូនស័ក្តិ៥។ បើតាមសម្តេចតេជោ វប្បធម៌នេះ ជាវប្បធម៌ដែលប្រជាពលរដ្ឋខ្មែរស្អប់ខ្ពើមខ្លាំង ហើយសម្តេចក៏ជាអ្នកស្អប់បំផុតផងដែរ។

សារក្រើនរំលឹករបស់សម្តេចតេជោ ហ៊ុន សែន បានធ្វើឡើងក្នុងពេលសម្តេចអញ្ជើញចូលរួមក្នុងពិធីប្រគល់វិញ្ញាបនបត្រជូនសិស្សសាលាភូមិន្ទរដ្ឋបាលសរុប ៧៥១អង្គ/នាក់ នៅវិទ្យាស្ថានជាតិអប់រំ នាព្រឹកថ្ងៃទី២៦ ខែមិថុនា ឆ្នាំ២០១៧នេះ។ សម្តេចតេជោ បានបញ្ជាក់ថា ព្រោះតែហេតុនេះទើបពេលសម្តេចដឹកនាំប្រទេស កូនចៅរបស់សម្តេច ត្រូវតែជាកូនល្អ ចៅល្អ ដើម្បីចៀសបញ្ហាទាំងអស់នេះ។

សម្តេចតេជោ ហ៊ុន សែន បានបញ្ជាក់យ៉ាងដូច្នេះថា «រឿងប្តីស័ក្តិ៣ ប្រពន្ធស័ក្តិ៤ និងកូនស័ក្តិ៥ គឺខ្មែរស្អប់ណាស់ ប្រយ័ត្នអាកន្លែងហ្នឹង ខ្ញុំខ្លួនឯង គឺជាអ្នកដែលស្អប់ជាទីបំផុតអាហ្នឹង ចឹងបានជាពេលខ្ញុំមានលទ្ធភាពគ្រប់គ្រងប្រទេស កូនរបស់ខ្ញុំ ចៅរបស់ខ្ញុំ ត្រូវតែជាមនុស្សល្អ មិនអាចប្រើប្រាស់ឥទ្ធិពលរបស់ឪពុកម្តាយ ទៅប៉ះពាល់ទៅគំរាមគំហែងអ្នកដទៃទេ ត្រូវចាំចំណុចនេះឲ្យបាន»

សម្តេចបន្តថា «ពាក្យខ្មែរ បាននិយាយថា សំណាបយោងដី ស្រីយោងប្រុស ការរីកធំធាត់របស់យើង ក៏ចាប់ផ្តើមពីការដែលយើង មានភរិយា ដែលជួយកិច្ចការប្តី ទៅលើបញ្ហានានាទាក់ទងមនុស្សធម៌តែមិនទាក់ទងនឹងដំណើរការងាររបស់ប្តីនោះទេ។ អារឿងបាតុភាពកូនរបស់មន្រ្តី ប្រពន្ធរបស់មន្រ្តី ដែលធ្វើផ្តេសផ្តាសនៅតែមាន ទោះបីវានៅតិចតួច នៅតែមាន។ កន្លែងខ្លះគេក៏បានលើកឡើងពីបញ្ហាត្រីមួយកន្រ្តក ស្អុយមួយ ស្អុយទាំងអស់ មិនមែនយ៉ាងដូច្នេះទេភាគច្រើន នៃមន្រ្តីរបស់យើងធ្វើកិច្ចការទាំងអស់នេះ បានយ៉ាងល្អហើយ»

ជាមួយគ្នានោះប្រមុខរាជរដ្ឋាភិបាលកម្ពុជា សម្តេចតេជោ បានរំលឹកថា ត្រូវអប់រំកូន និងភរិយាឲ្យធ្វើរឿងនូវគុណធម៌។ សម្តេចបានបញ្ជាក់ថា ប្រសិនបើមានកូន និងភរិយា ទៅសាងកំហុសហើយ អាចនឹងធ្វើឲ្យការសម្រេចចិត្តរបស់ឪពុក ឬ ស្វាមី អាចនឹងមិនយុត្តិធម៌។

សម្តេចតេជោ ហ៊ុន សែន បានផ្តាំផ្ញើដល់សិស្សដែលត្រូវចេញបំពេញការងារជាមន្រ្តីរាជការ ត្រូវចេះរួមសុខរួមទុក្ខ ជាមួយប្រជាពលរដ្ឋ មិនត្រូវនិយាយស្រឡាញ់តែបបូរមាត់នោះទេ៕

សូមស្តាប់ប្រសាសន៍សម្តេចតេជោ ហ៊ុន សែន នៅខាងលើ៖