(វ៉ាស៊ីនតោន)៖ អតីតនាយកការិយាល័យស៊ើបអង្កេតសហព័ន្ធ (FBI) របស់សហរដ្ឋអាមេរិកលោក James Comey បានថ្លែងថា ចំណុចសំខាន់នៃអត្ថបទព័ត៌មានមួយ ចេញផ្សាយដោយកាសែត New York Times កាលពីខែកុម្ភៈកន្លងទៅ ដែលបានអះអាងថា ទីប្រឹក្សាមួយចំនួនរបស់ប្រធានាធិបតី លោក ដូណាល់ ត្រាំ លួចធ្វើការទាក់ទងជាមួយភ្នាក់ងារចារកិច្ចរបស់រុស្ស៊ីនោះ គឺមិនពិតទាំងស្រុង។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅព្រឹកថ្ងៃសុក្រ ទី០៩ ខែមិថុនា ឆ្នាំ២០១៧។
កាលពីប៉ុន្មានខែមុន សារព័ត៌មាន New York Times បានធ្វើសេចក្តីរាយការណ៍ថា ក្រុមទីប្រឹក្សារបស់ លោក ត្រាំ បានធ្វើការទាក់ទងជាច្រើនលើកច្រើនសារជាមួយភ្នាក់ងារចារកិច្ចរបស់ប្រទេសរុស្ស៊ី នៅអំឡុងពេល ១២ខែមុន ការបោះឆ្នោតជ្រើសរើសប្រធានាធិបតីអាមេរិក។ អត្ថបទរាយការណ៍ដដែលបានអះអាងថា ទំនាក់ទំនងនោះ ត្រូវបានធ្វើឡើងស្របពេលលោក ដូណាល់ ត្រាំ ចាប់ផ្តើមនិយាយពាក្យល្អៗ អំពីប្រធានាធិបតីរុស្ស៊ី លោក វ៉្លាឌីមៀ ពូទីន ថែមទៀត។ ម៉្យាងវិញទៀតសេចក្តីរាយការណ៍នេះ បានគូសបញ្ជាក់ថា ទំនាក់ទំនងទាំងនេះ បានកើតឡើងបន្ទាប់ពីបណ្តេញភ្នាក់ងារចារកម្មរុស្ស៊ី លួច និងចេញផ្សាយសារអ៊ីម៉ែលរបស់គូប្រជែងរបស់ខ្លួននាពេលនោះ គឺលោកស្រី ហ៊ីលឡារី គ្លីនតុន។
បន្ថែមពីនេះអត្ថបទព័ត៌មានខាងលើរបស់ New York Times បានសង្កត់ធ្ងន់លើចំណុចមួយទៀត ដោយរដ្ឋបាលលោក ដូណាល់ ត្រាំ បានដកបុគ្គលមួយចំនួនរួមមាន លោក Roger Stone, លោក Paul Manafort, លោក Carter Page, និងលោក Michael Flynn ចេញពីក្រុមមន្រ្តីជំនិតរបស់លោក ត្រាំ ដែលពួកគេបានទទួលការសង្ស័យថា បានធ្វើការសន្ទនាជាមួយជនជាតិរុស្ស៊ី ដែលអាចជាអ្នកធ្វើការឲ្យរដ្ឋាភិបាលរុស្ស៊ីតែម្តង។
យ៉ាងណាមិញសារព័ត៌មាន New York Times បានចេញមុខឆ្លើយតបថា ប្រភពព័ត៌មានរបស់ពួកគេ មានភាពរឹងមាំត្រឹមត្រូវ និងអាចជឿទុកចិត្ត ទោះបីជាលោក Comey បានបដិសេធចោល ចំពោះភាពត្រឹមត្រូវនៃសេចក្តីរាយការណ៍នេះយ៉ាងណាក្តី។
គួរបញ្ជាក់ថា អតីតនាយកការិយាល័យស៊ើបអង្កេតសហព័ន្ធ (FBI) របស់សហរដ្ឋអាមេរិកលោក James Comey បានចូលផ្តល់ សក្ខីកម្មនៅចំពោះមុខ គណៈកម្មាធិការស៊ើបការណ៍សម្ងាត់ព្រឹទ្ធសភាកាលពីថ្ងៃព្រហស្បតិ៍ ពាក់ព័ន្ធកិច្ចសន្ទនារវាងលោក និងប្រធានាធិបតីលោក ដូណាល់ ត្រាំ ជុំវិញការស៊ើបអង្កេតរបស់ FBI ទៅលើអតីតទីប្រឹក្សាសន្តិសុខជាតិលោក Michael Flynn ដែលត្រូវបានគេសង្ស័យ និងចោទប្រកាន់ថា លួចធ្វើទំនាក់ទំនងជាមួយរដ្ឋាភិបាលរុស្ស៊ី៕
