(កំពង់ស្ពឺ)៖ ក្បួនដង្ហែរយុទ្ធនាការឃោសនា បោះឆ្នោតជ្រើសតាំងក្រុមប្រឹក្សាឃុំ-សង្កាត់ អាណត្តិទី៤ ឈានដល់ថ្ងៃបញ្ចប់នាថ្ងៃទី០២ ខែមិថុនា ឆ្នាំ២០១៧នេះហើយ។ សម្រាប់គណបក្សប្រជាជនកម្ពុជាទូទាំងខេត្តកំពង់ស្ពឺ បានរៀបក្បួនដង្ហែរតាមឃុំ-សង្កាត់នានា ដើម្បីបិទយុទ្ធការ ដែលមានការចូលរួមពីមហាគ្រួសារ គណបក្សប្រជាជនរាប់ពាន់នាក់។

ដោយឡែក សម្រាប់សង្កាត់រកាធំ ក្រុងច្បារមន លោក វ៉ី សំណាង ប្រធានគណបក្សខេត្តកំពង់ស្ពឺ និងលោកឧត្តមសេនីយ៍ ជួ សារុន ប្រធានក្រុមការងារថ្នាក់ខេត្តចុះជួយ សង្កាត់រការធំ បានដឹកនាំក្រុមការងារ សមាជិកសមាជិកាជាង៥០០នាក់ ចុះឃោសនាតាមគ្រប់ភូមិដើម្បីបង្ហាញពី សុខសន្តិភាព ស្ថេរភាពនយោបាយ ការរីកចំរើន ការអភិវឌ្ឍន៍លើគ្រប់វិស័យ ដែលកើតឡើងដោយស្នាដៃរបស់ថ្នាក់ដឹកនាំគណបក្សប្រជាជនកម្ពុជា។

លោក វ៉ី សំណាង ប្រធានគណបក្សប្រជាជនកម្ពុជា បានលើកឡើងថា រាល់សមិទិ្ធផលនានាទូទាំងប្រទេស​កម្ពុជាដូចសព្វថ្ងៃនេះ បានមកពីការខិតខំប្រប្រែង របស់រាជរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជា បានរំដោះប្រទេសជាតិចេញពី របបបនប្រល័យពួជសាសន៍ ប៉ុល ពត នាថ្ងៃ ៧មករា ឆ្នាំ១៩៧៩ ហើយបានស្តារប្រទេសជាតិពីបាតដែទទេរហូតមានការអភិវឌ្ឍន៍លើគ្រប់វិស័យ ទាំងផ្នែកអាណាចក្រ និងពុទ្ធចក្រ មានសាលារៀន គ្រឹះស្ថានសិក្សា ស្ពានថ្នល់ មណ្ឌលសុខភាព ទីអារាមសាសនា ព្រមទាំងសមិទ្ធិផលជាច្រើនទៀត។

លោក វ៉ី សំណាង បានអំពាវនាវដល់មហាគ្រួសារនៃគណបក្សប្រជាជនកម្ពុជា ទាំងអស់អញ្ជើញទៅចូលរួមបោះឆ្នោតជ្រើសតាំងក្រុមប្រឹក្សាឃុំ សង្កាត់ឱ្យបានគ្រប់គ្នា នៅថ្ងៃទី០៤ ខែមិថុនា ឆ្នាំ២០១៧ខាងមុខ ដើម្បីបន្តការគាំទ្របេក្ខភាពក្រុមប្រឹក្សាឃុំ សង្កាត់ របស់គណបក្សប្រជាជនកម្ពុជា ដឹកនាំការអភិវឌ្ឃលើគ្រប់វិស័យទាំងអស់ សម្រាប់កូនចៅជំនាន់ក្រោយៗទៀត៕