(មណ្ឌលគិរី)៖ ដោយសារមានការខិតខំប្រឹងប្រែងស្តារ និងការអភិវឌ្ឍន៍លើវិស័យនានា ឥតឈប់ឈររបស់រាជរដ្ឋាភិបាល ដើម្បីឆ្លើយតបតាមតម្រូវការ របស់ប្រជាពលរដ្ឋគ្រប់ទិសទី បច្ចុប្បន្នបានធ្វើឲ្យបណ្តាខេត្តដែលធ្លាប់តែនៅឆ្ងាយ ពីរាជធានីដាច់អាល័យនោះ ពេលនេះហាក់បីដូចជា នៅកៀកលែងឆ្ងាយ ដូចមុនទៀតហើយ។
នាសម័យអតីតកាល ខេត្តមណ្ឌលគិរី ក្នុងទស្សវត្សឆ្នាំ១៩៨០-១៩៩០ ការរស់នៅរបស់មន្រ្តីរាជការ ក៏ដូចប្រជាពលរដ្ឋក្នុងតំបន់នេះផ្ទាល់ ស្ថិតនៅក្នុងសភាពស្ងាត់ជ្រងំ ស្ទើរតែគ្មានប្រព័ន្ធគមនាគមន៍ (ផ្លូវថ្នល់) សម្រាប់ធ្វើចរាចរណ៍ទៅកាន់ទីប្រជុំជន និងរាជធានីនោះឡើយ។ រាល់ពេលធ្វើដំណើរ ទៅកាន់បណ្តាខេត្តផ្សេងៗ និងរាជធានីភ្នំពេញកាលណោះ ភាគច្រើនគឺធ្វើដំណើរឆ្លងកាត់ប្រទេសវៀតណាម ទម្រាំតែបានដល់គោលដៅម្តងៗ គឺត្រូវចំណាយពេលវេលា មិនតិចជាង៥ទៅ៦ថ្ងៃ។ ដោយសារកាលណោះមានអភិវឌ្ឍន៍យឺតយ៉ាវបែបនេះ គឺដោយសារយើងទើបតែងើបពីសង្រ្គាម ដែលគេហៅថា «សម័យគុកឥតជញ្ជាំង»។
ដោយឡែក ខេត្តមណ្ឌលគិរីនាពេលនេះ ជាមួយការអភិវឌ្ឍន៍លើវិស័យនានាកំពុងរីកលូតលាស់ល្អប្រសើរ ខុសប្លែកដាច់ស្រឡះកាលពី
ពេលមុន ទាំងការរស់នៅរបស់ប្រជាពលរដ្ឋ មន្រ្តីរាជការ និងការធ្វើដំណើរទៅកាន់បណ្តាខេត្តផ្សេងៗ និងរាជធានីភ្នំពេញផង នោះត្រូវចំណាយពេលវេលា តែត្រឹម៥ទៅ៦ម៉ោងប៉ុណ្ណោះ ដោយសារមានប្រព័ន្ធគមនាគមន៍ (ផ្លូវថ្នល់) ខ្វាត់ខ្វែង ពុះជ្រែកភ្នំ និងជ្រោះយ៉ាងល្អប្រណីតឆ្លងកាត់ ទៅកាន់គ្រប់បណ្តាខេត្តក្រុងផ្សេងៗ រួមទាំងរាជធានីភ្នំពេញ គ្មានការព្រួយបារម្ភ។
មណ្ឌលគិរីនាពេលនេះ ដោយសារការខិតខំប្រឹងប្រែងយ៉ាងយកចិត្តទុកដាក់ ពីសំណាក់ប្រមុខរាជរដ្ឋាភិបាល សម្តេចតេជោ ហ៊ុន សែន រួមជាមួយអាជ្ញាធរខេត្តទាំងមូលផងនោះ បានធ្វើឱ្យខេត្តមួយនេះកំពុងបន្តការអភិវឌ្ឍន៍របស់ខ្លួនបោះ ជំហានទៅមុខជានិច្ចដើម្បី ធ្វើការប្រឡងប្រណាំងជាមួយបណ្តាខេត្តផ្សេងៗ ប្រយោជន៍ធ្វើឲ្យសង្គមជាតិ មានការរីកចំរើន។
លោក ស្វាយ សំអ៊ាង អភិបាលខេត្តមណ្ឌលគិរី បានថ្លែងប្រាប់ឲ្យដឹងថា បើទោះបីពេលនេះខេត្តមណ្ឌលគិរី កំពុងមានការអភិវឌ្ឍន៍លើវិស័យនានា បានល្អប្រសើរខុសគ្នា ដាច់ស្រឡះបើប្រៀបធៀបទៅកាលពីទស្សវត្សមុនៗ។ ប៉ុន្តែលោកអភិបាល បានថ្លែងបន្តទៀតថា ក្នុងនាមរដ្ឋបាលសាលាខេត្ត នៅតែស្វាគមន៍ និងកៀងគររកដៃគូរវិនិយោគអភិវឌ្ឍន៍រដ្ឋ និងឯកជនក្នុង និងក្រៅស្រុកបន្ថែមទៀតដែលជាដៃគូរ វិនិយោគពិតប្រាកដ ចូលមកធ្វើការអភិវឌ្ឍនៅលើទឹកដី នៃខេត្តមណ្ឌលគិរីលើវិស័យជាច្រើន នៅក្នុងតំបន់នេះដើម្បីប្រភពចំណូលសេដ្ឋកិច្ចជាតិ និងប្រភពចំណូល ដល់បងប្អូនប្រជាពលរដ្ឋ ក្នុងតំបន់តាមរយៈការវិនិយោគអភិវឌ្ឍន៍ កាត់បន្ថយភាពក្រីក្រដល់ប្រជាពលរដ្ឋ។
ចុងក្រោយលោកអភិបាលខេត្តមណ្ឌលគិរី បានថ្លែងប្រាប់ថា ដើម្បីជួយសម្រួលកន្លែងអង្គុយធ្វើការ របស់មន្រ្តីសាលាខេត្តមណ្ឌលគិរី ទាំងមូលឲ្យបានល្អប្រសើរ លែងមានការភ័យខ្លាចការបាក់ស្រុត នៃអគារចាស់របស់សាលាខេត្ត ដែលបានបានសាងសង់តាំងពីឆ្នាំ១៩៨៣នោះ ខេត្តបានសម្រេចធ្វើការសាសង់អគាររដ្ឋបាលសាលាខេត្តថ្មី ដែលពេលនេះកំពុងចាប់ផ្តើមដំណើរការសាងសង់ អគារថ្មីនេះ សាងសង់ពីថ្ម កំពស់២ជាន់ទទឹង១៨បណ្តោយ៥៤ម៉ែត្រដែលគ្រោងចំណាយថវិកាជាតិ តាមជំហានៗ រហូតទៅដល់ប្រហាក់ប្រហែល១លានដុល្លារ ដែលគ្រោងសាងសង់ឲ្យបានរួចរាល់ និងដាក់សម្ភោធឲ្យប្រើប្រាស់ជាផ្លូវការក្នុងចន្លោះឆ្នាំ២០១៨ឆ្នាំ២០១៩ខាងមុខនេះ។
មហាជន និងមន្រ្តីរាជការទូទាំងខេត្តមណ្ឌលគិរី បានសម្តែងនូវការកោតសរសើរចំពោះលោកអភិបាលខេត្តលោក ស្វាយ សំអ៊ាង ដែលឡើងកាន់ដំណែងជាថ្នាក់ដឹកនាំខេត្ត បានខិតខំប្រឹងប្រែងធ្វើការអភិវឌ្ឍន៍សំណង់ អគាររដ្ឋបាលសាលាខេត្តថ្មីប្រយោជន៍ ជួយសម្រួលដល់មន្រ្តីរាជការសម្រាប់បម្រើការងារ ជូនសង្គម និងប្រជាពលរដ្ឋស្របតាមយុទ្ធសាស្រ្តចតុកោណដំណាក់កាលទី៣ របស់រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជាប្រមុខដឹកនាំ៕
អគារដ្ឋបាលសាលាខេត្តចាស់
អគារសាលាខេត្តថ្មី កំពុងសាងសង់
ផ្លូវនៅខេតរ្តមណ្ឌលគិរីពីពេលមុន
ស្ថានភាពផ្លូវនាពេលបច្ចុប្បន្ន
