(ឧត្តរមានជ័យ)៖ ព្រឹកថ្ងៃទី៣០ ខែមីនា ឆ្នាំ២០១៧ នេះ កាកបាទក្រហមកម្ពុជា ដែល មាន សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន  បានចែកអំណោយមនុស្សធម៌ជូនដល់ គ្រួសារចាស់ជរាគ្មានទីពឹង ស្ត្រីមេម៉ាយកូនច្រើន កុមារកំព្រា ជនពិការ និងអ្នករស់ នៅជាមួយមេរោគអេដស៍ ចំនួន៦៣៦គ្រួសារ មកពីស្រុកត្រពាំងប្រាសាទ ស្រុកចុងកាល់ ស្រុកបន្ទាយអំពិល និងស្រុកអន្លង់វែង ខេត្តឧត្តរមានជ័យ។

នៅក្នុងឱកាសសំណេះសំណាលជាមួយគ្រួសារទទួលផល លោកវេជ្ជ. អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយ កាកបាទក្រហម​កម្ពុជា បានពាំនាំប្រសាសន៍ សម្ដេចកិត្តិព្រឹទ្ធបណ្ឌិតប្រធាន ផ្ដាំផ្ញើសួរសុខទុក្ខ ដល់បងប្អូនប្រជាពលរដ្ឋទាំងអស់ និងបានណែនាំដល់បងប្អូន សូមថែរក្សាសុខភាព និងមានអនាម័យល្អក្នុងការរស់នៅ ត្រូវពិសារទឹកឆ្អិន និងគេងក្នុងមុងជានិច្ច និងត្រូវការពារខ្លួនកុំឲ្យឆ្លងមេរោគអេដស៍ និងកុំរើសអើងអ្នករស់នៅជាមួយមេរោគអេដស៍ ហើយត្រូវ មានស្មារតីប្រុងប្រយ័ត្នជានិច្ចនៅពេលធ្វើដំណើរទៅទីជិតឬឆ្ងាយ ដើម្បីជៀសវាងនូវគ្រោះថ្នាក់ចរាចរណ៍ដែលកើតមានឡើងជាយថាហេតុ។ ជាពិសេស ត្រូវជៀសឲ្យឆ្ងាយពីគ្រឿងញៀន និងកុំពិសារគ្រឿងស្រវឹង ដែលជាកត្តាបង្កឲ្យមានអំពើហិង្សា ចោរកម្ម និងអសន្តិសុខក្នុងសង្គម។

ប្រជាពលរដ្ឋដែលមកទទួលអំណោយមាន ក្ដីរំភើបរីករាយក្រៃលែង ព្រោះកាកបាទក្រហមកម្ពុជា ក្រោមការដឹកនាំរបស់ សម្ដេចកិត្តិព្រឹទ្ធបណ្ឌិត តែងបានជួយពួកគាត់បានទាន់ពេលវេលា ដោយមិនប្រកាន់វណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ។

សូមបញ្ជាក់ថា អំណោយដែលចែកជូនក្នុង គ្រួសារនីមួយៗទទួលបាន៖ អង្ករ ៣០គីឡូក្រាម មី ១កេស ត្រីខ ១០កំប៉ុង មុង១ ភួយ១ សារុង១ ក្រមា១។ ដោយឡែកសម្រាប់អ្នកពិការ និងចាស់ជរាមួយចំនួន ទទួលបានថវិកាមួយចំនួនបន្ថែមទៀត៕