(ភ្នំពេញ)៖ នារសៀលថ្ងៃទី២០ ខែមករានេះ ស្ថានីយ៍ទូរទស្សន៍នាគព័ន្ឋ សហការជាមួយសាកលវិទ្យាល័យអន្តរជាតិ IU និងគាំទ្រដោយសហភាព​សហព័ន្ឋអ្នកសារ​ព័ត៌មានកម្ពុជា (ស.ស.ស.ក) និង សហភាពសហព័ន្ធយុវជនកម្ពុជា (ស.ស.យ.ក) បានរៀបចំកម្មវិធីលើកកម្ពស់ ការផ្សព្វផ្សាយក្រោមប្រធានបទ «យុវជន និងព័ត៌មាន»។

លោក ហ៊ុយ វណ្ណៈ អនុរដ្ឋលេខាធិការក្រសួងមហាផ្ទៃ និងជាប្រធាន ស.ស.ស.ក ដែលអញ្ជើញជាវាគ្មិន បានផ្តល់ការណែនាំទាក់ទងនឹងវិស័យព័ត៌មានដល់និស្សិត IU ប្រមាណ២៥០នាក់ ដែលបានចូលរួមស្តាប់បឋកថានេះ។

លោក ហ៊ុយ វណ្ណៈ បានលើកឡើងថា ក្នុងនាមយើងជានិសិ្សត សូមប្អូនៗអាចសៀវភៅឲ្យបានច្រើន ពីព្រោះយើងត្រូវការចំណេះដឹងទូទៅឲ្យបានច្រើន មិនត្រូវការព័ត៌មាន​បែបស៊ីអារម្មណ៍នោះ ប្អូនៗត្រូវខិតខំរៀនសូត្រ ច្រើនជាងមើល Facebook ។ យើងត្រូវផ្ចង់អារម្មណ៍លើជំនាញរបស់យើងដូចជា ជំនាញពេទ្យ ឬភាសាអង់គ្លេស ឱកាសនៅនឹងមុខ​យើងច្រើនណាស់ កុំរវល់នឹងសង្គម ដែលវាឲ្យរឿងយើងចម្រុះ ហើយពិបាកចាប់យកមួយណាពិតប្រាកដ៕