(ភ្នំពេញ)៖ យោងតាមរបាយការណ៍បូកសរុបការងារឆ្នាំ២០១៦ និងទិសដៅអនុវត្តឆ្នាំ២០១៧ របស់ក្រសួងការពារជាតិ បានឲ្យដឹងថា ពេញមួយឆ្នាំ២០១៦នេះ ជនជាតិវៀតណាមជាង ៦០នាក់ បានបង្កជម្លោះបញ្ហាជាច្រើនជាមួយពលរដ្ឋ និងមន្រ្តីកម្ពុជា នៅតាមតំបន់ព្រំដែនកម្ពុជា-វៀតណាម ដែលបណ្ដាលឲ្យយោធាផ្នែកសឹករងខ្មែរម្នាក់រងរបួស និងជនជាតិវៀតណាម ២នាក់ បានស្លាប់។
របាយការណ៍ដដែលបានឲ្យដឹងថា មានកងទ័ពវៀតណាមជាច្រើន បានចូលមកច្ការព្រៃក្នុងទឹកដីកម្ពុជា ចម្ងាយ ៤៥០មែត្រ និងបានបុកគ្រឹះសាងសង់ខ្លោងទ្វារប៉ុស្ដិ៍នៅច្រកអន្តរជាតិចម្ងាយ ៣០ម៉ែត្រ ពីបង្គោលព្រំដែនលេខ៣០ និងមានជនជាតិវៀតណាម ៥នាក់ បានចូលមកកាប់ព្រៃឈើ ក្នុងស្រុកអូរយ៉ាដាវ ខេត្តរតនគិរី។
ករណីមួយទៀត មានទូកនេសាទវៀតណាមដល់ទៅ ១០គ្រឿង ផ្ទុកមនុស្ស ៤០នាក់ បានចូលមកនេសាទក្នុងដែនទឹកកម្ពុជា ចម្ងាយ៦គីឡូម៉ែត្រពីព្រំដែនកម្ពុជា-វៀតណាម ក្នុងស្រុកបុរីជលសា និងបានប៉ះទង្គិចជាមួយកម្លាំងចម្រុះកម្ពុជា បណ្ដាលឲ្យយោធាសឹករងខ្មែរម្នាក់រងរបួស ឯខាងភាគីវៀតណាមស្លាប់ម្នាក់ និងរបួស ៣នាក់។
ក្រៅពីនេះ មានពលរដ្ឋវៀតណាម បានយកបង្គោលថ្មចំនួន ៤ដើម មកដាំចូលដីកម្ពុជាទាំងគគ្លើន ចម្ងាយ ៣ម៉ែត្រ ពីខ្សែបន្ទាត់ព្រំដែនកម្ពុជា-វៀតណាម តែត្រូវបានកម្លាំងសមត្ថកិច្ចកម្ពុជា សហការជាមួយភាគីវៀតណាម ចុះត្រួតពិនិត្យ និងដកចេញវិញ។ កម្លាំងសមត្ថកិច្ចកម្ពុជា ក៏បានសហការជាមួយកម្លាំងវៀតណាម ចុះលុបស្រះទឹក ១កន្លែង ទំហំ ២.៥ម៉ែត្រ គុណ ៤ម៉ែត្រ ជម្រៅ ៣ម៉ែត្រ នៅស្រុកអូរ យ៉ាដាវ ខេត្តរតនគិរី។
របាយការណ៍ខាងលើបានបន្តថា កម្លាំងសមត្ថកិច្ចកម្ពុជា បានឃាត់ខ្លួនជនជាតិវៀតណាម ៤នាក់ទៀត ដែលរស់នៅលើទូកនេសាទ ២គ្រឿង និងបានដុតបំផ្លាញឧបករណ៍នេសាទទាំងអស់ លើទូកនោះទៀតផង។
ទន្ទឹមនឹងនេះ កម្លាំងសមត្ថកិច្ច ក៏បានចុះឃាត់ខ្លួនវៀតណាម ៥នាក់ ដែលបានលួចឆ្លងដែនជីករ៉ែមាស និងចូលអារឈើក្នុងទឹកដីកម្ពុជា និងបានដកដើមស្វាយចន្ទី ដែលពួកគេបានលួចដាំនៅឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ព្រមទាំងបានរកឃើញវៀតណាមមួយចំនួនទៀត លួចចូលបាញ់ថ្នាំក្នុងតំបន់ហាមឃាត់ នៅចន្លោះបង្គោលព្រំដែនលេខ២៨៥-២៨៣ ដោយបានរារាំងឲ្យបញ្ឈប់ជាបន្ទាប់៕
