(ញូយ៉ក)៖ ប្រព័ន្ធផ្សព្វផ្សាយរបស់សហរដ្ឋអាមេរិក បានរាយការណ៍ នៅថ្ងៃព្រហស្បតិ៍នេះថា​ រថភ្លើងមួយខ្សែ បានរអិលធ្លាក់ផ្លូវ នៅពេលឆ្លងកាត់ស្ថានីយ៍រថភ្លើង ក្នុងទីក្រុង​ Hoboken​​ នៃរដ្ឋ News Jersey​ ខណៈសេចក្ដី រាយការណ៍បឋមបានឱ្យដឹងថា មានមនុស្សម្នាក់បានស្លាប់ និងច្រើនជាង១០០នាក់បានរងរបួស។ នេះបើតាម ការចុះផ្សាយដោយ សារព័ត៌មាន Channel News Asia នៅយប់ថ្ងៃព្រហស្បតិ៍ ទី២៩ ខែកញ្ញា ឆ្នាំ២០១៦។

ភ្លាមៗនោះដែរ ក្រុមប៉ូលិសនៅក្នុងតំបន់ និង ផ្នែកដឹកជញ្ជូននៃរដ្ឋ New Jersey​ មិនបានធ្វើអាត្ថាធិប្បាយអ្វី ឡើយជុំវិញហេតុការណ៍គ្រោះថ្នាក់នេះ ក្រៅតែពីបញ្ជាក់ថាសេវ៉ាកម្មរថភ្លើងទំាងក្នុង និង ក្រៅស្ថានីយ៍រថភ្លើង ត្រូវផ្អាកសកម្មភាពជាបណ្ដោះអាសន្ន ។ ក៏ប៉ុន្តែ បើតាមរូបភាពត្រូវបានបង្ហោះនៅលើបណ្ដាញទំនាក់ទំនង សង្គម គេឃើញថា ដំបូលមួយផ្នែកនៃស្ថានីយ៍រថភ្លើងខាងលើ បានរលំ រីឯទូរថភ្លើងមួយបានរងការខូតខាត។

សូមជម្រាបថា ស្ថានីយ៍រថភ្លើង Hoboken ស្ថិតនៅតាមបណ្ដាយច្រំាងទន្លេ Hudson ហើយដែលត្រូវបាន អ្នក ដំណើរជាច្រើនប្រើប្រាស់ដើម្បីធ្វើដំណើរពីរដ្ឋ New Jersey ចូលទៅកាន់តំបន់ Manhattan។  នៃទីក្រុងញូយ៉ក៕