(ភ្នំពេញ)៖ លោក ថោង ខុន រដ្ឋមន្រ្តីក្រសួងទេសចរណ៍ នៅល្ងាចថ្ងៃទី១៩ ខែកញ្ញា ឆ្នាំ២០១៦នេះ បានចេញគាំទ្រយ៉ាងពេញទំហឹងទៅនឹងគម្រោងវិនិយោគសាងសង់រោងចក្រស្ថានីយថាមពលអគ្គីសនី ដែលបានមកពីការដុតកាកសំណល់ (Waste Power Plant) និងស្ថានីយថាមពលអគ្គីសនីដើរដោយថាមពលព្រះអាទិត្យ (Solar Power Plant) និងជឿជាក់ថា គម្រោងទាំងនេះ នឹងអភិវឌ្ឍន៍ប្រទេសកម្ពុជា ឱ្យក្លាយជាគោលដៅទេសចរណ៍បៃតង និងកាន់តែស្រស់ស្អាត។

ការគាំទ្រនេះ ត្រូវបានលើកឡើងក្នុងជំនួបពិភាក្សាការងាររវាង លោករដ្ឋមន្រ្តី​ ថោង ខុន​ ជាមួយគណៈប្រតិភូក្រុមហ៊ុន Quadran International នៃសាធារណរដ្ឋបារាំង និងដៃគូរវិនិយោគ គឺក្រុមហ៊ុន Shanghai SUS Environment Co.Ltd ដឹកនាំដោយ លោក Jean-Phillipe HENRY និងលោកស្រី Cindy Li ព្រមទាំងសហការីមួយចំនួន។

ក្នុងនាមក្រសួងទេសចរណ៍ និងជាគណៈកម្មាធិការជាតិវាយតម្លៃទីក្រុង​ស្អាត លោករដ្ឋមន្រ្តីបាន​ជម្រាបជូនពីសារសំខាន់ នៃគោលនយោបាយនៃការអភិវឌ្ឍបៃតងនៅកម្ពុជា សំដៅប្រែក្លាយកម្ពុជា ជាគោលដៅទេសចរណ៍បៃតង និងស្អាត ដើម្បីឈានឆ្ពោះទៅសម្រេចបានជោគជ័យរបស់ ទីក្រុងទេសចរណ៍នានារបស់កម្ពុជា នៅក្នុងការប្រឡងប្រណាំងទីក្រុងទេសចរណ៍ស្អាតអាស៊ាន នៅ​ឆ្នាំ២០១៨ ខាងមុខ។

លោករដ្ឋមន្រ្តី បានសម្ដែងនូវការជឿជាក់ និងគាំទ្រលើការវិនិយោគរបស់ក្រុមហ៊ុន Quadran និងដៃគូ ហើយក្នុងនាមក្រសូងទេសចរណ៍ និងគណៈកម្មាធិការជាតិវាយតំលៃទីក្រុង​ស្អាត បានគូសបញ្ជាក់ពីជំហរគាំទ្រយ៉ាងពេញទំហឹង លើគម្រោងវិនិយោគដ៏មានសារៈសំខាន់នេះផងដែរ។​

លោករដ្ឋមន្រ្តី ក៏បានស្នើឱ្យក្រុមហ៊ុនខាងលើ ត្រូវយកចិត្តទុកដាក់បន្តធ្វើការជាមួយបណ្តាក្រសួង ស្ថាប័នបច្ចេកទេសពាក់ព័ន្ធ អាជ្ញាធរដែនដី រួមមានសាលារាជធានីភ្នំពេញ និងសាលាខេត្តសៀមរាប ដើម្បីសម្រេចបាននូវប្រសិទ្ធភាពរបស់គម្រោង នាពេលអនាគត។

សូមជម្រាបថា គម្រោងវិនិយោគទាំង២នេះ រួមមានទី១.រោងចក្រថាមពលអគ្គីសនី ដែលបានមកពីការដុតកាកសំណល់ មានទីតាំងក្នុងរាជធានីភ្នំពេញ ​មានអានុភាពដំឡើង៣០មេហ្គាវ៉ាត់ ប្រើទុនវិនិយោគប្រមាណ ១៥០លានអឺរ៉ូ និងទី២.រោងចក្រថាមពលអគ្គីសនី ដើរដោយថាមពលព្រះអាទិត្យ ស្ថិតក្នុងខេត្តសៀមរាប ដែលមានអានុភាពដំឡើង ៥៥មេហ្គាវ៉ាត់ ប្រើទុនវិនិយោគគ្រោងប្រមាណ ៨០លានអឺរ៉ូ៕