(ដាណឺម៉ាក)៖ បន្ទាប់ពីសហរដ្ឋអាមេរិក និងប្រទេសអូស្រ្តាលី ឥឡូវនេះដល់វេនប្រទេសដាណឺម៉ាក វិញម្ដងដែលជាសមាជិក នៃក្រុមចំរុះអន្តរជាតិ បានអះអាងពីការចូលរួមនៅក្នុងការវាយប្រហារ តាមផ្លូវអាកាសដោយច្រឡំ ទៅលើកងទ័ពរដ្ឋាភិបាលស៊ីរី ហើយថាខ្លួននឹងចូលរួមនៅក្នុងការស៊ើបអង្កេត ដើម្បីរកឲ្យឃើញពីភាពពិត ដែលនាំឲ្យកើតកំហុសនេះ។ នេះបើតាមការចុះផ្សាយ របស់សារព័ត៌មានរុស្ស៊ី Sputnik​ នៅល្ងាចថ្ងៃចន្ទ ទី១៩ ខែកញ្ញា ឆ្នាំ២០១៦។

យោងតាមការិយាល័យព័ត៌មានយោធាដាណឺម៉ាក យន្ដហោះចម្បាំងធុន F-16 ​ពីរគ្រឿងរបស់ កងទ័ពអាកាស ដាណឺម៉ាក បានចូលរួមនៅក្នុងការវាយប្រហារតាមផ្លូវអាកាស ទៅលើមូលដ្ឋានទ័ពស៊ីរី នៅក្បែរទីក្រុង Deir ez Zor ដែលបានផ្ដាច់យកជីវិតកងទ័ពរដ្ឋាភិបាលស៊ីរី ៦២ នាក់ និង ១០០ នាក់ផ្សេងទៀត បានរងរបួស។

កាលពីថ្ងៃសៅរ៍ កន្លងទៅ ក្រសួងការពារជាតិរុស្ស៊ីបានរាយការណ៍ថា យន្ដហោះចម្បំាងរបស់ក្រុមចំរុះ អន្តរជាតិ ដឹកនំាដោយសហរដ្ឋអាមេរិក បានវាយប្រហារតាមផ្លូវអាកាសបួនលើក ទៅលើមូលដ្ឋានទ័ពស៊ីរី ដែលស្ថិតនៅ ក្រោមការឡោមព័ទ្ធដោយក្រុម ISIS​ នៅជិតទីក្រុង Deir ez Zor​។ តែយ៉ាងណាក៏ដោយ អ្នកនាំពាក្យមន្ទី Pentagone បានបញ្ជាក់ថាការវាយប្រហារនេះ គឺមានគោលដៅទៅលើក្រុម ISIS តែប៉ុណ្ណោះ ព្រមទំាងបានបញ្ឈប់ប្រតិបត្តិការយោធាជាបន្ទាន់ នៅក្រោយពេលដឹងថាមានការភ័ន្ដច្រឡំ។ ចំណែកឯរដ្ឋបាលរបស់ លោក បារ៉ាក់ អូបាម៉ា ក៏បានសម្ដែងការសូមទោសជាផ្លូវការផងដែរ។
 
គួរបញ្ជាក់ថា ក្រុមចំរុះអន្តរជាតិដឹកនំា ដោយសហរដ្ឋអាមេរិក បានបើកប្រតិបត្តិការយោធាប្រឆំាងនឹងក្រុម ISIS កាលពីឆ្នាំ២០១៤ ដោយមិនមាន ការយល់ព្រមពីក្រុមប្រឹក្សា សន្តិសុខអង្គការ សហប្រជាជាតិ ឬអាជ្ញាធរស៊ីរី នោះឡើយ៕