(តាកែវ)៖ ប្រជាពលរដ្ឋដែលរស់នៅ ក្នុងក្រុងដូនកែវ ដែលបានប្រើប្រាស់ទឹកស្អាតរបស់ក្រុមហ៊ុនទឹកស្អាតក្រុងដូនកែវ បាននាំគ្នាស្នើសុំ ឲ្យអាជ្ញាធរខេត្តជាពិសេសលោកអភិបាលខេត្តតាកែវ ឡាយ វណ្ណៈ ជួយអន្តរាគមន៍ធ្វើយ៉ាងណាបញ្ចុះតម្លៃទឹក ដែលបច្ចុប្បន្នមានតម្លៃខ្ពស់រហូតដល់២ពាន់រៀល ក្នុងមួយម៉ែត្រគូប។

ប្រជាពលរដ្ឋម្នាក់នៅសង្កាត់បារាយណ៍ ក្រុងដូនកែវ លោកស្រី ពៅ បានលើកឡើងថា តម្លៃទឹកបច្ចុប្បន្នមានតម្លៃរហូតដល់២ពាន់រៀល ក្នុងមួយម៉ែត្រគូប ហើយខាងក្រុមហ៊ុនគេបានយកថ្លៃ ថែទាំកុងទ័រ១ពាន់រៀលទៀតក្នុងមួយខែ។ តម្លៃនេះគឺជាតម្លៃដ៏ខ្ពស់មួយ បើប្រៀបធៀបទៅនិងតម្លៃទឹកនៅខេត្តផ្សេងទៀត ជាពិសេសនៅរាជធានីភ្នំពេញ ដែលមានតម្លៃតែជាង ៦រយរៀល ប៉ុណ្ណោះក្នុងមួយម៉ែត្រគូប។ តាមប្រជាពលរដ្ឋខាងលើ តម្លៃភ្លើងត្រូវបានបញ្ចុះតាំងពីខែមេសាមកម្ល៉េះ ចុះហេតុអ្វីបានជាតម្លៃទឹកមិនព្រមចុះដូចភ្លើងដែរ។ ដូច្នោះគាត់សូមឲ្យអាជ្ញាធរខេត្ត ជួយដោះស្រាយទុក្ខលំបាករបស់ប្រជាជនផង។

អ្នកស្រី វី ប្រជាពលរដ្ឋម្នាក់ទៀត ក្រៅពីបានសំណូមពរ ឲ្យអាជ្ញាធជួយអន្តរាគមន៍បញ្ចុះតម្លៃទឹក លោកស្រីក៏បានរិះគន់ក្រុមហ៊ុនទឹកស្អាត ពាក់ព័ន្ធទៅនិងទឹកដែលប្រើប្រាស់នាពេលបច្ចុប្បន្ន មានក្លិនមិនល្អ ហើយម្យ៉ាងទៀតក្រុមហ៊ុន តែងតែពិន័យ និងផ្ដាច់ទឹកប្រើប្រាស់រាល់ការយឺតយ៉ាងទៅបង់ប្រាក់លើសកំណត់១ថ្ងៃទៅ២ថ្ងៃ។ លោកស្រីសង្កត់ធ្ងន់ថា «សូមលោកអភិបាលខេត្ត ឡាយ វណ្ណៈ ជួយប្រជាជនផង។ ក្រុមហ៊ុនទឹកស្អាតនេះកំពុងតែសង្កត់កប្រជាជនហើយ»។

ពាក់ព័ន្ធទៅ និងការលើកឡើងរបស់ប្រជាពលរដ្ឋនេះ លោក យស់ ណាស៊ី អភិបាលរងខេត្ត និងអ្នកនាំពាក្យសាលាខេត្តតាកែវ បានថ្លែងឲ្យដឹងថា កន្លងមកអាជ្ញាធរ បានឃើញការចុះផ្សាយព្រោងព្រាត ពីសំណូមពរបស់ប្រជាពលរដ្ឋ ឲ្យអាជ្ញាធខេត្តជួយអន្តរាគមន៍បញ្ជុះតម្លៃទឹក ក៏ប៉ុន្តែអាជ្ញាធខេត្ត មិនបានទទួលសំណើជាលាយល័ក្ខអក្សណាមួយ នៅឡើយទេពីការស្នើសុំនេះ។

លោកថា «ប្រសិនបើអាជ្ញាធរខេត្ត បានទទួលសំណើ យើងនឹងកោះហៅក្រុមហ៊ុន មកជជែកពិក្សាគ្នា និងរកដំណោះស្រាយអោយសមស្របមួយដែលប្រជាពលរដ្ឋ និងក្រុមហ៊ុនឹកស្អាត អាចទទួលយក បានទាំងអស់គ្នា»។ លោក មូល វិចិត្រ អភិបាលក្រុងដូនកែវ បានថ្លែងឲ្យដឹងថា កន្លងមកបន្ទាប់ពីមានសំណូមពរពីប្រជាជនពលរដ្ឋ ឲ្យមានការចុះតម្លៃទឹកប្រើប្រាស់ យើងបានធ្វើការកោះហៅភាគីក្រុមហ៊ុនមកជជែកពិភាក្សាគ្នា ដោយក្នុងនោះអាជ្ញាធរក្រុង បានស្នើឲ្យភាគីក្រុមហ៊ុនទឹកស្អាតក្រុងដូនកែវ ពិចារណាបញ្ចុះតម្លៃទឹក តាមការស្នើសុំរបស់ប្រជាពលរដ្ឋ។ ក៏ប៉ុន្តែរហូតមកដល់ពេលនេះ ខាងភាគីក្រុមហ៊ុននៅមិនទាន់បានឆ្លើយតបមកខាងអាជ្ញាធរក្រុងនៅឡើយទេ។

លោកអភិបាលក្រុងបានថ្លែងថា « អាជ្ញាធមិនដែរព្រងើយកន្តើយ និងការស្នើសុំឲ្យជួយពីសំណាក់ប្រជាពលរដ្ឋនោះទេ។ បញ្ហានេះខ្ញុំ នឹងធ្វើការកោះហៅខាងភាគីក្រុមហ៊ុន ទឹកស្អាតមកជជែកគ្នា ម្ដងទៀត នៅពេលខាងមុខដើម្បីធ្វើយ៉ាងណា ឲ្យខាងក្រុមហ៊ុនអាច នឹងបញ្ចុះតម្លៃមួយដែលប្រជាពលរដ្ឋ និងខាងក្រុមហ៊ុនអាចទទួលយកបានទាំងអស់គ្នា»។ ពាក់ព័ន្ធទៅ និងការស្នើសុំឲ្យមាន ការបញ្ចុះតម្លៃទឹកនេះ ខាងក្រុមហ៊ុនទឹកស្អាតក្រុងដូនកែវ មិនអាចស្នើសុំអត្ថាធិប្បាយបានទេនៅថ្ងៃនេះ៕