(ភ្នំពេញ)៖ តារារូបស្រស់ប្រចាំផលិតកម្ម ហង្សមាស កញ្ញា ឱក សុគន្ធកញ្ញា កាលពីថ្ងៃទី២២ ខែកក្កដា ឆ្នាំ២០១៦នេះ បាននាំយកថវិកាចំនួន១ម៉ឺនដុល្លារ ដែលបានមកពីការឧបត្ថម្ភ របស់សប្បុរសជន ទៅប្រគល់ជូនមន្ទីរពេទ្យគន្ធបុប្ផា ដែលជាមន្ទីរពេទ្យធំជាងគេនៅកម្ពុជា ក្នុងការជួយសង្គ្រោះអាយុជីវិតកុមារ។
កញ្ញា ឱក សុគន្ធកញ្ញា បានសរសេរបង្ហោះនៅលើហ្វេសប៊ុកមុននេះបន្តិចថា «ថ្ងៃនេះនាងខ្ញុំបានទៅដល់មន្ទីរពេទ្យគន្ធបុប្ផា ដោយនាំយកថវិកាចំនួន ៤០,០០០,០០០ រៀលដែលស្មើរនឹងទឹកប្រាក់ ១ម៉ឺនដុល្លារ ផ្តល់ដោយខនដូ The View Residence សូមថ្លែងអំណរគុណដល់ម្ចាស់ក្រុមហ៊ុន ដែលបានផ្តល់ក្តីស្រឡាញ់ និងយកចិត្តទុកដាក់ដល់កុមារកម្ពុជា សូមជូនពរឲ្យក្រុហ៊ុន The View Residence ទទួលបាននូវភាពជោគជ័យ សូមអរគុណ!»។
នេះមិនមែនទើបជាលើកទី១នោះទេ ដែលតារាសម្តែងរូបស្រស់ កញ្ញា ឱក សុគន្ធកញ្ញា បានបង្ហាញក្នុងតាមរយៈសកម្មភាពមនុស្សធម៌ ជួយសង្គម ពោលជារឿយៗ នាងតែងតែចូលរួមធ្វើអំពើមនុស្សធ៌នានា ដូចជា ចុះចែកអំណោយដល់កុមារកំព្រា និងប្រជាពលរដ្ឋក្រីក្រ នៅតាមសមគមន៍មួយចំនួន។
សូមបញ្ជាក់ថា មន្ទីរពេទ្យគន្ធបុប្ផា គឺជាមន្ទីពេទ្យធំជាងគេ នៅប្រទេសកម្ពុជា ដែលមានគោលការណ៍មនុស្សធម៌ផ្តោតសំខាន់ លើការព្យាបាល និងសេវាសុខភាពដោយឥតគិតថ្លៃ សម្រាប់កុមារនៅកម្ពុជាអស់រយៈពេលជាច្រើនឆ្នាំមកហើយ ក្រោមជំនួយថវិកាពីរាជរដ្ឋាភិបាលកម្ពុជា និងរដ្ឋាភិបាលប្រទេសស្វីស ព្រមទាំងសប្បុរសជនទាំងក្នុង និងក្រៅប្រទេស។ មន្ទីរពេទ្យនេះបានដើរតួនាទីយ៉ាងសំខាន់ និងជាកកន្លែងផ្តល់ក្តីសង្ឃឹម ដល់កុមារនៅប្រទេសកម្ពុជា ជាពិសេសកុមារក្រីក្ររាប់ម៉ឺននាក់ ដែលឪពុកម្តាយពួកគេទាំងនោះ ខ្វះលទ្ធភាព ដើម្បីស្វែងរកសេវាព្យាបាលជំងឺ ដល់កូនៗ៕
