(ភ្នំពេញ)៖ បន្ទាប់ពីមានការចុះផ្សាយព័ត៌មានដែលទម្លាយដោយមន្រ្តីជាន់ខ្ពស់រាជរដ្ឋាភិបាលមួយរូបថា តាមរបាយការណ៍ពីមូលដ្ឋាន និងការពិនិត្យជាបឋមរបស់ព្រះបរមរាជវាំង បង្ហាញឱយឃើញថា ស្នាមមេផ្តិតដៃប្រជាពលរដ្ឋដែលដាក់ថ្វាយព្រះករុណា ព្រះបាទ នរោត្តម សីហមុនី ព្រះមហាក្សត្រនៃកម្ពុជា មានភាពមិនប្រក្រតីរហូតជាង៤០ភាគរយ, ស្របពេលដែលបញ្ហាស្នាមមេដៃកំពុងកើតឡើងនោះ នៅថ្ងៃព្រឹកនេះក៏មានករណីបែកធ្លាយវិដេអូ នៃភាពមិនប្រក្រតីលើការផ្តិតស្នាមមេដៃពីប្រជាពលរដ្ឋ ឲ្យគណបក្សសង្គ្រោះជាតិ។

វិដេអូដែលបង្ហោះនៅលើបណ្តាញទំនាក់ទំនងសង្គម Facebook និងទទួលបានពីមន្រ្តីតូចតាចរបស់គណបក្សសង្គ្រោះជាតិ មានរយៈពេល៣៥វិនាទី បានបង្ហាញយ៉ាងដូច្នេះថា «ខ្ចីឈ្មោះ បងប្អូនយើងដាក់ឲ្យអស់ៗមោក....ឈ្មោះបងប្អូន​ដាក់ចូលៗឲ្យអស់ៗ​ទៅ ពិបាកអី....គេមិនស្គាល់មុខយើងណា...សរសេរកុំឲ្យដូចគ្នា»។ 

សកម្មភាពប្រមូលស្នាមមេដៃរបស់បក្សសង្គ្រោះជាតិ ត្រូវបានគេបញ្ជាក់ថា ធ្វើឡើងនៅក្នុងមូលដ្ឋានខេត្តកណ្ដាល។

សូមបញ្ជាក់ថា មន្រ្តីជាន់ខ្ពស់រាជរដ្ឋាភិបាលរូបនោះបានទម្លាយអាថ៌កំបាំង ប្រាប់អង្គភាពព័ត៌មាន Fresh News ថា តាមរបាយការណ៍ពីមូលដ្ឋាន និងការពិនិត្យជាបឋមរបស់ព្រះបរមរាជវាំង បង្ហាញឱយឃើញនូវភាពមិនប្រក្រតី លើស្នាមមេដៃដែលថ្វាយព្រះមហាក្សត្រ។ ព្រោះថាមន្រ្តីគណបក្សសង្គ្រោះជាតិ បានដើរបោកប្រាស់ប្រជាពលរដ្ឋថា ផ្តិតមេដៃដើម្បីយកទៅសុំនេះសុំនោះ តែតាមការពិតយកមកថ្វាយព្រះមហាក្សត្រ និងជាពិសេសនោះគឺមនុស្សម្នាក់ បានផ្តិតមេដៃជាច្រើន និងដាក់ឈ្មោះប្រជាជនដែលគាត់មិនបានដឹងអី ដែលរឿងទាំងពីរនេះគឺជាការបោកប្រាស់ប្រជាពលរដ្ឋ និងប្រមាថព្រះចេស្តា ព្រះមហាក្សត្ររបស់កម្ពុជា និងមួយទៀតនោះគឺអាចជាប់ចោទពីបទ បង្កើតឯកសារក្លែង និងប្រើប្រាស់ក្លែងស្នាមមេដៃ។

មន្រ្តីដដែលរូបនោះបានអះអាងថា ភាពមិនប្រក្រតីក្នុងញត្តិដែលថ្វាយព្រះមហាក្សត្រនៅថ្ងៃនេះ មានរហូតដល់ជាង៤០ភាគរយឯណោះ។

ចំពោះបញ្ហាក្លែងស្នាមមេដៃនេះត្រូវបានមន្រ្តីជាន់ខ្ពស់ទម្លាយថា តាមគាត់ដឹង នៅពេលខាងមុខនេះក្រសួងមហាផ្ទៃ នឹងឈានដល់បង្កើត គណៈកម្មាការមួយ ដើម្បីស្រាវជ្រាវ ធ្វើកោសល្យវិច័យស្នាមមេដៃប្រជាពលរដ្ឋដែលផ្តិតថ្វាយព្រះមហាក្សត្រ ថាតើជាស្នាមមេដៃពិតប្រាកដ ឬយ៉ាងណា? ហើយកន្លងមកបញ្ហាស្នាមមេដៃនេះ ក៏ធ្លាប់បានបោកប្រាស់ប្រជាពលរដ្ឋ ផ្តិតយកទៅអង្គការសហប្រជាជាតិផងដែរ។

ពិតណាស់ ប្រសិនគណៈកម្មាការរបស់ក្រសួងមហាផ្ទៃ ធ្វើកោសល្យវិច័យស្នាមដៃរកឃើញថា ក្លែងក្លាយនោះ គណបក្សសង្គ្រោះជាតិរឹតតែ ធ្ងន់កហើយ ព្រោះបានបោកប្រាស់ប្រជាពលរដ្ឋដែលមិនដឹងអី និងធ្ងន់ធ្ងរបំផុតនោះគឺ ប្រមាថព្រះចេស្តា ព្រះមហាក្សត្រដ៏ឧត្តុង្គឧត្តមរបស់យើង ហើយចំពោះផ្លូវច្បាប់វិញ អាចនឹងជាប់ចោទពីបទក្លែងឯកសារយ៉ាងច្បាស់ក្រឡោត។ ដូច្នេះគណបក្សសង្រ្គោះជាតិ បានឱបគ្រាប់បែកមួយគ្រាប់ទៀត ជាប់នឹងដើមទ្រូង ត្រៀមតែថ្ងៃផ្ទុះនោះទេ៕