(តូក្យូ)៖ ប្រធានាធិបតីសហរដ្ឋអាមេរិក លោក Barack Obama បានទៅដល់ប្រទេសជប៉ុន នៅថ្ងៃពុធម្សិលមិញ ដើម្បីចូលរួមកិច្ចប្រជុំកំពូល G7។ ដំណើរទស្សនកិច្ចជាប្រវត្តិសាស្ត្រ សម្រាប់លោក Obama ​ទៅកាន់ទីក្រុង Hiroshima ដែលរងការទម្លាប់គ្រាប់បែកប្រល័យលោកពីសំណាក់អាមេរិក នេះបើតាមសារព័ត៌មានស៊ិនហួ ចេញផ្សាយនៅយប់ថ្ងៃទី២៥ ខែឧសភា ឆ្នាំ២០១៦។ ​

ប្រធានាធិបតី និងនាយករដ្ឋមន្រ្តី មកពីចក្រភពអង់គ្លេស, បារាំង, អាល្លឺម៉ង់, អ៊ីតាលី, កាណាដា និងជប៉ុនជាម្ចាស់ផ្ទះ កំពុងស្ថិតនៅតាមផ្លូវរបស់ពួកគេ ទៅកាន់តំបន់ Ise Shima ជាតំបន់ភ្នំ និងមានប្រជាជនរស់នៅរប៉ាត់រប៉ាយ ចម្ងាយប្រមាណ៣០០គីឡូម៉ែត្រ ភាគខាងត្បូងឆៀងខាងលិចទីក្រុង Tokyo ភាគច្រើនប្រជាជនរស់នៅ ទីនោះពឹងផ្អែកលើវិស័យទេសចរ និងវប្បធម៌។

សន្តិសុខត្រូវបានរឹងបន្តឹងនៅទូទាំងតំបន់ ជាមួយនឹងការដាក់ពង្រាយកម្លាំងការពារបន្ថែម រាប់ពាន់នាក់ ដើម្បីការពារស្ថានីយ៍រថភ្លើង និងច្រកចេញចូលផ្លូវទឹក ហើយនឹងចរាចរផ្ទាល់ ឲ្យរក្សាភាពស្ងៀមស្ងាត់ជាធម្មតា នៅអំឡុងពេលកិច្ចប្រជុំរយៈពេល២ថ្ងៃ។ រដ្ឋាភិបាលជប៉ុនថា ខ្លួននឹងមិនឲ្យមានការវាយប្រហារ​ភេរវកម្មកើតឡើង ដូចដែលបានវាយប្រហារទីក្រុង Paris និងទីក្រុង Brussels កាលពីប៉ុន្មានខែថ្មីៗនេះនោះទេ។

លោក Obama នឹងក្លាយជាប្រធានាធិបតីសហរដ្ឋអាមេរិកដំបូង ​កំពុងកាន់តំណែងដែលធ្វើដំណើរទៅកាន់ទីក្រុង Hiroshima ដែលទីនោះជាតំបន់ដំបូងនៅក្នុងពិភពលោក ដែលរងការវាយប្រហារ ដោយអាវុធនុយក្លេអ៊ែ នៅថ្ងៃទី៦ ខែសីហា ឆ្នាំ១៩៤៥។

ប្រធានាធិបតីបារាំង លោក Francois Hollande និងលោកស្រីអធិការបតីអាល្លឺម៉ង់ Angela Merkel ត្រូវបានគេរំពឹងថា នឹងទៅដល់នៅព្រឹកថ្ងៃព្រហស្បតិ៍នេះ។ កិច្ចប្រជុំនេះ ក៏នឹងមានការចូលរួមដោយ នាយករដ្ឋមន្ត្រីអ៊ីតាលី លោក Matteo Renzi និងលោក Justin Trudeau នាយករដ្ឋមន្ត្រីកាណាដា៕