(ភ្នំពេញ)៖ ប្រធានផ្សារទួលទំពូងអំពាវនាវ បានអំពាវនាវឲ្យអាជីវករ និងប្រជាពលរដ្ឋ ដែលមានទីលំនៅដ្ឋានក្បែរទីតាំងផ្សារ សូមមកចាក់វ៉ាក់សាំងការពារកូវីដ១៩ ក្រោយក្រសួងសុខាភិបាល បានបង្កើតទីតាំងនៅតាមផ្សារ សំដៅជំរុញឲ្យប្រជាពលរដ្ឋមានភាពងាយស្រួលមកធ្វើការចាក់វ៉ាក់សាំង។
លោក ចំរើន សុខលីម ប្រធានផ្សារទួលទំពូង បានឲ្យដឹងនៅព្រឹកថ្ងៃទី២៧ ខែមេសា ឆ្នាំ២០២២នេះថា ដោយមានការយកចិត្តទុកដាក់ពីលោក ឃួង ស្រេង អភិបាលរាជធានីភ្នំពេញ, ទីតាំងចាក់វ៉ាក់សាំងត្រូវបានរៀបចំនៅតាម ផ្សារមួយចំនួន ក្នុងរាជធានីភ្នំពេញ ដើម្បីជួយសំរួល និងអាចបង្កភាពងាយស្រួលដល់ប្រជាពលរដ្ឋ និងអាជីវកដែលរវល់ ក្នុងការប្រកបអាជីវកម្ម អាចឆ្លៀតពេលបានចាក់វ៉ាក់សាំងបានគ្រប់គ្នា។
លោកប្រធានផ្សារ បានបន្តថា ការចាក់វ៉ាក់សាំងនៅពេលនេះ គឺមានគ្រប់ទាំងអ្នកដែលមិនទាន់បានចាក់សោះ និងដូសជំរុញទាំងលើកទី៣ និងលើកទី៤ ហើយការចាក់ធ្វើឡើងដោយក្រុមគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ ដោយមានរយៈពេល៧ថ្ងៃ ដែលចាប់ផ្តើមចាក់នៅព្រឹកថ្ងៃទី២៧ ខែមេសានេះតទៅ។
បើតាមមន្ត្រីរដ្ឋបាលខណ្ឌចំការមន ទីតាំងសំរាប់ចាក់វ៉ាក់សាំង ក្រៅពីផ្សារទួលទំពូងនៅមានផ្សារបឹងត្របែកផ្លាស្សា ក៏បានបង្កើតទីតាំងចាក់វ៉ាក់សាំងជូនអាជីវករ និងប្រជាពលរដ្ឋផងដែរ រីឯនៅក្នុងសង្កាត់ទន្លេបាសាក់ ក្រុមគ្រូពេទ្យធ្វើការចុះចាក់នៅតាមផ្ទះជូន ប្រជាពលរដ្ឋតែម្តង។
បើតាមលោក សាន់ ប៊ុនណា ប្រធានផ្សារបន្លែ បានឲ្យដឹងថា នៅផ្សារបន្លែច្បារអំពៅ មានរៀបចំឲ្យក្រុមគ្រូពេទ្យ នៅទីស្នាក់ការផ្សារតែម្តង ហើយមានប្រជាពលរដ្ឋ ក៏ដូចអាជីវករ និងអតិថិជន មកទទួលការចាក់វ៉ាក់សាំង រយៈពេល ២ថ្ងៃមកនេះ មាន២២៥នាក់។
ដោយឡែកចំពោះផ្សារច្បារអំពៅលោក គួច ចំណាន បានឲ្យដឹងថា ប្រជាពលរដ្ឋ ក៏ដូចអាជីវករ និងអតិថិជនមកទទួលការចាក់វ៉ាក់សាំង រយៈពេល២ថ្ងៃមកនេះ បានជាង២០០នាក់ផងដែរ។ ដោយក្រុមគ្រូពេទ្យ បានរៀបចំកន្លែងចាក់ នៅក្និងផ្សារតែម្តង។
គួរបញ្ជាក់ថា ក្រសួងសុខាភិបាល នៅថ្ងៃទី២៦ ខែមេសា ឆ្នាំ២០២២ បានជូនដំណឹង ពីការបញ្ជូនក្រុមគ្រូពេទ្យចាក់វ៉ាក់សាំងចំនួន១៦០០នាក់ ដើម្បីបង្កើនល្បឿនចាក់ដូសជំរុញ ជូនពលរដ្ឋ កម្មករ សិស្សនិសិ្សត អ្នកលក់ដូរ នៅតាមបណ្តារាជធានី-ខេត្ត ដើម្បីបង្កើនល្បឿនចាក់វ៉ាក់សាំងកូវីដ-១៩ ក្នុងយុទ្ធនាការចាក់វ៉ាក់សាំងកូវីដ-១៩ ដូសជំរុញ (ទាំងដូសទី៣ និង ដូសទី៤) ជូនប្រជាពលរដ្ឋ កម្មករ កម្មការិនី តាមរោងចក្រ ក្រៅប្រព័ន្ធ សិស្ស និសិ្សត អ្នកលក់ដូរតាមទីផ្សារ នៅតាមបណ្ដារាជធានី-ខេត្ត៕
