(កណ្ដាល)៖ លោកអគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធាន ក្រុមការងារ រាជរដ្ឋាភិបាលចុះមូលដ្ឋានខេត្តកណ្តាល នាព្រឹកថ្ងៃទី១៩ ខែមីនា ឆ្នាំ២០២២នេះ បានបញ្ជើញប្រកាសសេចក្តីសម្រេចបញ្ចូលសមាជិកបក្សថ្មី នៃគណបក្ស ប្រជាជនកម្ពុជាចំនួន ៧៧៥រូប មកពីតាមបណ្តាឃុំចំនួន ៦ រួមមានឃុំ អរិយក្សត្រ, ឃុំសារិកាកែវ, ឃុំពាមឧកញ៉ាអុង, ឃុំកោះរះ, ឃុំថ្មគរ និងឃុំព្រែកក្មេង នៅស្រុកល្វាឯម ខេត្តកណ្តាល។
លោក អូន ព័ន្ធមុន្នីរ័ត្ន បានថ្លែងបញ្ជាក់ថា ការប្រកាសបញ្ចូលសមាជិកបក្សថ្មីនេះ គឺជាការចូលរួមដោយគោរពតាមគោលការណ៍ស្ម័គ្រចិត្ត និងជឿជាក់ឥតងាករេ ចំពោះការដឹកនាំដ៏ត្រឹមត្រូវរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តីនៃកម្ពុជា និងមានលោកបណ្ឌិត ហ៊ុន ម៉ាណែត ទទួល បន្ទុកជាប្រធានយុវជនគណបក្សប្រជាជនកម្ពុជាថ្នាក់កណ្តាល ជាបេក្ខភាពនាយករដ្ឋមន្រ្តីទៅអនាគត។ គណបក្សប្រជាជនកម្ពុជា គឺជាគណបក្សដែលចាស់ទុំជាងគេ និងរឹងមាំជាងគេ ដែលកើតឡើងដោយសារប្រជាជន, ដើម្បីប្រជាជន និងរួមសុខរួមទុក្ខ ជាមួយប្រជាជនគ្រប់កាលៈទេសៈ។
លោក អូន ព័ន្ធមុន្នីរ័ត្ន បានបន្ថែមថា អ្វីដែលគណបក្សប្រជាជនបាននិងកំពុងធ្វើគឺដើម្បីសម្រេចឱ្យបាននូវបុព្វហេតុចំនួន២ គឺ សន្ដិភាព និងការអភិវឌ្ឍ ដែលទាំងអស់គ្នា ត្រូវតែធានាការពារឱ្យបានជាដាច់ខាត។ សមាជិកបក្សដែលទើបចូលថ្មីភាគច្រើនជាយុវជន ត្រូវយល់ដឹងឱ្យបានច្បាស់អំពីចំណុចនេះ និងត្រូវជួយអប់រំយុវជនដទៃទៀត និងបំផុសយុវជនដទៃទៀតឱ្យមានស្មារតី ស្នេហាជាតិខ្ពស់, គោរពស្រឡាញ់ប្រជាជន រួមសាមគ្គីគ្នាដើម្បីចូលរួមថែរក្សា និងការពារសន្តិភាព និងការអភិវឌ្ឍ ដែលត្រូវបានយុវជនជំនាន់មុន ខិតខំប្រឹងប្រែងតស៊ូស្វែងរកដោយការបូជាអាយុជីវិតរបស់ខ្លួន។
សមាជិកបក្សថ្មីក៏ត្រូវតែជួយលើកកម្ពស់ការអប់រំ និងផ្សព្វផ្សាយឱ្យយុវជនដទៃទៀត ក៏ដូចជាប្រជាពលរដ្ឋទូទៅ កាន់តែយល់ច្បាស់អំពីគុណបំណាច់របស់គណបក្ស ប្រជាជន ដែលបាននាំមកនូវជោគជ័យដ៏មហាធំធេងបំផុតសម្រាប់កម្ពុជា និងបន្តបោះឆ្នោតឱ្យតែគណបក្សប្រជាជនកម្ពុជា ដើម្បីដឹកនាំកសាងប្រទេសជាបន្តទៀត ព្រោះ គណបក្សប្រជាជនកម្ពុជា គឺជាគន្លឹះនៃសន្តិភាពនិងការអភិវឌ្ឍ។
ឧបនាយករដ្ឋមន្ត្រី បានបញ្ជាក់ទៀតថា សមាជិកបក្សថ្មី ជាកម្លាំងថ្មីបន្ថែមដ៏មានសក្តានុពល ក្នុងការចូលរួមធ្វើសកម្មភាពការងារបក្ស ដែលបម្រើដល់ផលប្រយោជន៍ របស់ប្រជាជនទូទៅនៅក្នុងភូមិ ឃុំ របស់ខ្លួន ក៏ដូចជាជួយពន្យល់ដល់ប្រជនពលរដ្ឋទូទៅឱ្យបានយល់ដឹងជ្រួតជ្រាបអំពីបុព្វហេតុ, ស្នាដៃ និងរាល់សមិទ្ធ ផលរបស់រាជ រដ្ឋាភិបាល ក្រោមការដឹកនាំរបស់គណបក្សប្រជាជនកម្ពុជា។ សមាជិកបក្សទាំងអស់ត្រូវគោរពតាមលក្ខន្តិកៈគណបក្ស និងត្រូវធានាឱ្យបានថា សមាជិកម្នាក់ជាសំលេង ឆ្នោត ១សន្លឹកជូនបក្ស និងត្រូវរកសម្លេងឆ្នោតមួយសន្លឹកបន្ថែមទៀតជូនគណបក្ស ពីក្នុងចំណោមមិត្តភ័ក្រ ឬសមាជិកគ្រួសារ។
ក្នុងនាមគណបក្សប្រជាជនកម្ពុជា លោកក៏បានលើកទឹកចិត្តនូវការចូលរួមរបស់យុវជន ដោយហេតុថាយុវជនជំនាន់ក្រោយៗទៀត គឺជាអនាគតរបស់គណបក្ស និងប្រទេសជាតិ ហើយសមាជិកវ័យក្មេងគ្រប់រូប ត្រូវបន្តដើរតួសំខាន់ក្នុងការធ្វើជាសម្លេង និងស្ពានរវាងគណបក្ស និងយុវជនកម្ពុជា ព្រមទាំងអប់រំខ្លួននូវគោលការណ៍ និងកម្មវិធីនយោបាយរបស់គណបក្ស និងបន្តផ្សព្វផ្សាយគោលការណ៍ និងកម្មវិធីនយោបាយរបស់បក្សឱ្យបានកាន់តែទូលំទូលាយផងដែរ៕
