(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅរសៀលថ្ងៃសុក្រ ទី១៨ ខែមីនា ឆ្នាំ២០២២នេះ បានអនុញ្ញាតឱ្យព្រះអង្គម្ចាស់ ហ្វាសាល់ ប៊ីន ហ្វាហាន់ អាល់ សូដ រដ្ឋមន្ត្រីការបរទេសនៃព្រះរាជាណាចក្រអារ៉ាប៊ីសាអូឌីត យាងចូលជួបសម្តែងការគួរសម នៅវិមានសន្តិភាព។
បើតាមលោក អ៊ាង សុផ្លែត ជំនួយការផ្ទាល់របស់សម្តេចតេជោ ហ៊ុន សែន បានឱ្យដឹងថា សម្តេចតេជោ និងព្រះអង្គម្ចាស់រដ្ឋមន្ត្រីការបរទេសអារ៉ាប៊ីសាអូឌីត បានជជែកយ៉ាងយកចិត្តទុកដាក់ទៅការពង្រឹងទំនាក់ទំនង និងកិច្ចសហប្រតិបត្តិការលើវិស័យនានារវាងប្រទេសទាំងពីរ។
ព្រះអង្គម្ចាស់រដ្ឋមន្ត្រីការបរទេសអារ៉ាប៊ីសាអូឌីត បានមានព្រះបន្ទូលថា ដំណើរទស្សនកិច្ចរបស់ព្រះអង្គមកកាន់ប្រទេសកម្ពុជានាពេលនេះ ដើម្បីពង្រីកចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ។ ព្រះអង្គបានបន្ថែមទៀតថា ឆ្លងតាមកិច្ចពិភាក្សាជាមួយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស បានរកឃើញថា កម្ពុជា និងអារ៉ាប៊ីសាអូឌីត មានសក្តានុពលច្រើនសម្រាប់ធ្វើកិច្ចសហប្រតិបត្តិការ មានដូចជាវិស័យទេសចរណ៍ បច្ចេកវិទ្យា ថាមពល អប់រំ វប្បធម៌ និងកសិកម្មជាដើម។
សម្តេចតេជោ ហ៊ុន សែន បានយល់ស្របទាំងស្រុងចំពោះបន្ទូលរបស់ព្រះអង្គម្ចាស់រដ្ឋមន្ត្រីការបរទេសអារ៉ាប៊ីសាអូឌីត។ សម្តេចតេជោនាយករដ្ឋមន្ត្រី បានលើកទឹកចិត្តឱ្យប្រទេសទាំងពីរ ជំរុញកិច្ចសហប្រតិបត្តិការលើរាល់សក្តានុពលដែលមាន ជាពិសេសលើវិស័យទេសចរណ៍ កសិកម្ម និងពាណិជ្ជកម្ម។
សូមបញ្ជាក់ថា ព្រះអង្គម្ចាស់ ហ្វាសាល់ ប៊ីន ហ្វាហាន់ អាល់ សូដ បានមកដល់កម្ពុជា នៅម៉ោងប្រមាណ ១៖៣០នាទីរសៀល នៅថ្ងៃទី១៨ ខែមីនានេះ ដើម្បីបំពេញព្រះរាជទស្សនកិច្ច តបតាមការយាងរបស់ឧបនាយករដ្ឋមន្ត្រី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិកម្ពុជា។ បន្ទាប់ពីមកដល់ភ្លាមៗ ព្រះអង្គម្ចាស់ បានជួបពិភាក្សាទ្វេភាគីជាមួយឧបនាយករដ្ឋមន្រ្តីប្រាក់ សុខុន ផងដែរ។
សេចក្តីប្រកាសព័ត៌មានរបស់ក្រសួងការបរទេស បានចាត់ទុកថា ព្រះរាជទស្សនកិច្ចរបស់ ព្រះអង្គម្ចាស់ ហ្វាសាល់ ប៊ីន ហ្វាហាន់ អាល់ សូដ មកកាន់កម្ពុជា នឹងពង្រឹង និងពង្រីកបន្ថែមទៀតនូវទំនាក់ទំនង និងកិច្ចសហប្រតិបត្តិការល្អប្រពៃ ដែលមានស្រាប់រវាងព្រះរាជាណាចក្រទាំងពីរ ដើម្បីផលប្រយោជន៍ទៅវិញទៅមកនៃប្រជាជាតិទាំងពីរ៕
