(ភ្នំពេញ)៖ លោកស្រី ម៉ានូអេឡា វ. ហ្វឺរ៉ូ (Manuela V. Ferro) អនុប្រធានធនាគារពិភពលោក សម្រាប់តំបន់អាស៊ីបូព៌ា និងប៉ាស៊ីហ្វ៊ិក បានផ្តល់តម្លៃខ្ពស់ចំពោះចំណាត់ការមានប្រសិទ្ធភាពរបស់កម្ពុជា ក្នុងការឆ្លើយតបទៅនឹងជំងឺកូវីដ-១៩ ហើយលោកស្រី បានលើកទឹកចិត្តផងដែរ ឲ្យមានការបន្តជំរុញការវិនិយោគលើវិស័យអប់រំថែមទៀត ក្នុងខណៈដែលរដ្ឋាភិបាល ខិតខំស្តារសេដ្ឋកិច្ចឲ្យងើបឡើងវិញ ក្នុងឱកាសដែលលោកស្រី បានបំពេញទស្សនកិច្ចនៅកម្ពុជា ពីថ្ងៃទី១៣ ដល់ថ្ងៃទី១៧ ខែមីនា ឆ្នាំ២០២២។ នេះបើតាមសេចក្ដីប្រកាសព័ត៌មាន របស់ធនាគារពិភពលោក ដែលបណ្ដាញព័ត៌មាន Fresh News ទទួលបាននៅថ្ងៃនេះ។

នៅក្នុងដំណើរទស្សនកិច្ចនេះ លោកស្រី ហ្វេរ៉ូ បានជួបធ្វើកិច្ចពិភាក្សាជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា, លោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, លោក វង្សី វិសុទ្ធ រដ្ឋលេខាធិការអចិន្ត្រៃយ៍នៃក្រសួងសេដ្ឋកិច្ច និង ហិរញ្ញវត្ថុ, លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា, លោក ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូន, និងលោក ជា សុផារ៉ា រដ្ឋមន្ត្រីក្រសួងគ្រប់គ្រងដែនដី នគរូបនីយកម្ម និងសំណង់។

លោកស្រី ហ្វឺរ៉ូ បានថ្លែងថា «កម្ពុជានៅមិនទាន់រួចផុតពីផលប៉ះពាល់អវិជ្ជមានរបស់ជំងឺកូវីដ-១៩ ទៅលើសេដ្ឋកិច្ច នៅឡើយទេ ដែលពេលនេះ កំពុងជួបនឹងរឿងមិនសូវល្អមួយទៀត ដោយសារប្រេងឥន្ធនៈ និង ស្បៀងអាហារឡើងថ្លៃ។ យ៉ាងណាក្តី អត្រាចាក់វ៉ាក់សាំងខ្ពស់ និង ការបើកប្រទេសឡើងវិញ ជាកត្តាធ្វើឲ្យកម្ពុជា មានភាពប្រសើរមួយ ក្នុងការស្តារសេដ្ឋកិច្ចឲ្យបានរឹងមាំសាជាថ្មី»។

លោកស្រីបន្ថែមទៀតថា «ធនាគារពិភពលោកកំពុងតែបន្តជួយកម្ពុជា លើផ្នែកសេវាកម្មអប់រំ និងសុខាភិបាល, ការកែទម្រង់សេដ្ឋកិច្ចដើម្បីបង្កើនការវិនិយោគ និង បង្កើតការងារថ្មីៗ, និងដើម្បីពង្រីកលទ្ធភាពទទួលបាន សេវាសាធារណៈប្រកប ដោយគុណភាព»។

នៅក្នុងជំនួបជាមួយមន្ត្រីរដ្ឋាភិបាល និងតំណាងវិស័យឯកជន លោកស្រី ហ្វឺរ៉ូ បានស្វាគមន៍ចំពោះការគ្រប់គ្រង មានប្រសិទ្ធភាពរបស់កម្ពុជា លើការរាតត្បាតវីរុសកូវីដ-១៩ ក៏ដូចជាចំពោះកម្មវិធីស្តារសេដ្ឋកិច្ចដែលរដ្ឋាភិបាលកំពុងអនុវត្ត។

លោកស្រីក៏បានធ្វើការកត់សម្គាល់ដែរថា កិច្ចខិតខំស្តារសេដ្ឋកិច្ចនេះ ក៏ជាឱកាសថ្មីមួយដែរសម្រាប់គិតគូរអំពីគន្លងផ្លូវថ្មី ដើម្បីនាំមកនូវកំណើនសេដ្ឋកិច្ច គឺតាមរយៈការធ្វើកំណែទម្រង់ ដែលនឹងជំរុញថែមទៀត នូវផលិតភាពរបស់ក្រុមហ៊ុន និង របស់កម្មករ ហើយនឹងជួយធ្វើឲ្យការវិនិយោគ និងការនាំចេញកាន់តែរីក និង កាន់តែសម្បូរបែប។

ក្រៅពីជំនួបទាំងនេៈ លោកស្រី ហ្វឺរ៉ូ បានឆ្លៀតពេលទៅធ្វើទស្សនកិច្ចដល់គម្រោងមួយចំនួន ដែលទទួលជំនួយពី ធនាគារពិភពលោក។ លោកស្រី បានសង្កេតមើលសកម្មភាពនៅតាមថ្នាក់រៀន និងនៅតាមមន្ទីរពិសោធន៍ នៅវិទ្យាស្ថានបច្ចេកទេសកម្ពុជា ដែលកំពុងតែសហការគ្នាជាមួយសាកលវិទ្យាល័យអន្តរជាតិនានាជាដៃគូ ដើម្បីអឹបក្រេដកម្មវិធីសិក្សាវិស្វកម្មសម្រាប់កម្រិតបរិញ្ញាបត្រ និង អនុបណ្ឌិត។

លោកស្រីក៏បានធ្វើការសន្ទនាដែរជាមួយគ្រូបង្រៀន មាតាបិតា និង សិស្សានុសិស្សនៅអនុវិទ្យាល័យ ទួលប្រាសាទសែនសុខ ដែលនៅទីនោះកិច្ចប្រឹងប្រែងនានាក្នុងការកែលម្អប្រតិបត្តិការរបស់សាលា និង លទ្ធផលសិក្សារបស់សិស្ស កំពុងតែទទួលបានផលល្អ ក្នុងនោះអត្រាសិស្សឈប់រៀនបានធ្លាក់ចុះ ហើយសិស្សក៏ខិតខំរៀនសូត្រ ក៏ទទួលបានលទ្ធផលប្រសើរជាងមុនដែរ។

នៅក្នុងដំណើរទស្សនកិច្ចទៅកាន់ភូមិ សុខសែនជ័យ ឃុំពាម និងទៅកាន់ភូមិ ខ្សាច់ស ក្នុងឃុំក្រាំងល្វា ខេត្តកំពង់ឆ្នាំង លោកស្រី ហ្វឺរ៉ូ បានជួបសន្ទនាជាមួយមន្ត្រី និង ប្រជាពលរដ្ឋក្នុងមូលដ្ឋាន ដែលបានទទួលកម្មសិទ្ធិដីធ្លី និងអត្ថប្រយោជន៍នានាពីជំនួយដូចជាផ្លូវថ្នល់ ទឹក អនាម័យ និងជំនួយដល់ផ្នែកកសិកម្មបម្រើឲ្យជីវភាពរស់នៅ របស់សហគមន៍នៅទីនោះ។

នាពេលបច្ចុប្បន្ន ធនាគារពិភពលោក កំពុងជួយដល់គម្រោងអភិវឌ្ឍនានារបស់កម្ពុជា ដែលមានតម្លៃជាទឹកប្រាក់ប្រមាណ ជាង ១,១ ប៊ីលានដុល្លារអាមេរិក៕