(កំពត)៖ មន្រ្តីជាន់ខ្ពស់ក្រសួងបរិស្ថាន បានគូសបញ្ជាក់ថា គ្មានជនណាម្នាក់មានសិទ្ធិទិញ ឬលក់ដីធ្លីនៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះនៅតាមខេត្តនានាបានឡើយ ហើយក្រសួងបរិស្ថានស្នើឱ្យពលរដ្ឋ ឈប់ចាញ់ បោកមេខ្យល់ ឬក្រុមជនខិលខូច ដោយនាំគ្នាទៅទិញដី ឬទន្ទ្រានយកដីរដ្ឋធ្វើជាកម្មសិទ្ធិ ព្រោះមិនមានការទទួលស្គាល់ឡើយ មិនតែប៉ុណ្ណោះអាចនឹងប្រឈមមុខនឹងវិធានការច្បាប់ថែមទៀតផង។

លោក នេត្រ ភក្ត្រា រដ្ឋលេខាធិការក្រសួងបរិស្ថាន បានឱ្យដឹងថា មានក្រុមជនខិលខូចមួយចំនួន បានប្រើប្រាស់ប្រជាពលរដ្ឋដោយការជួលឱ្យទន្ទ្រានដីឱ្យខ្លួនលក់ក្នុងតម្លៃថោកៗ និងពេលខ្លះប្រើប្រាស់ពលរដ្ឋដើម្បីជាខែលក្នុងការ តវ៉ាជាមួយអាជ្ញាធរដើម្បីស្នើសុំកាត់ឆ្វៀលដីឱ្យខ្លួនថែមទៀតផង។ លោក នេត្រ ភក្ត្រា បានអំពាវនាវដល់ក្រុមជនខិលខូចគួរបញ្ឈប់វប្បធម៌ចូលទន្ទ្រានដីព្រៃរដ្ឋដោយខុសច្បាប់ ហើយពេលខ្លះប្រើប្រាស់ឯកសារក្លែងក្លាយដើម្បី ទាមទារកាត់ឆ្វៀលដីមកធ្វើកម្មសិទ្ធិ។ លោកបានថ្លែងថា មានករណីមិនប្រក្រតីជាច្រើនត្រូវបានរកឃើញ ហើយសមត្ថកិច្ចបាននិងកំពុងចាត់ការតាមនីតិវិធីច្បាប់។

ការបញ្ជាក់ទាំងនេះ បានធ្វើឡើងនៅព្រឹកថ្ងៃទី១៥ ខែមីនា ឆ្នាំ២០២២ ខណៈលោក នេត្រ ភក្ត្រា បានអញ្ជើញពិធីបើកសិក្ខាសាលាផ្សព្វផ្សាយច្បាប់ពាក់ព័ន្ធនឹងវិស័យបរិស្ថាន និងធនធានធម្មជាតិនៅរដ្ឋបាលខេត្តកែប។ សិក្ខាសាលានេះមានរយៈពេល០២ថ្ងៃ ត្រូវបានរៀបចំឡើងដោយក្រុមមេធាវីក្រសួងបរិស្ថាន ដើម្បីផ្សព្វផ្សាយច្បាប់ពាក់ព័ន្ធនឹងវិស័យបរិស្ថាន និងធនធានធម្មជាតិដល់មន្ត្រីនៃស្ថាប័នតុលាការ កងកម្លាំងប្រដាប់អាវុធ មន្ត្រីឧទ្យានុរក្ស មន្ត្រីអនុវត្តច្បាប់ និងអាជ្ញាធរដែនដីពាក់ព័ន្ធដែលមកពីខេត្តកែប និងខេត្តកំពត សរុបប្រមាណ១៦០នាក់។ អភិបាលខេត្តកែប និងតំណាងរដ្ឋបាលខេត្តកំពត ក៏បានចូលរួមជាអធិបតីនៃពិធីបើកសិក្ខាសាលានេះផងដែរ។

មន្រ្តីជាន់ខ្ពស់ក្រសួងបរិស្ថានរូបនេះ ក៏សូមស្នើដល់រដ្ឋបាលឃុំ សង្កាត់ រដ្ឋបាលស្រុកបញ្ឈប់រាល់ការចុះហត្ថលេខាបញ្ជាក់លើលិខិតផ្ទេរសិទ្ធិ ពាក្យស្នើសុំកាន់កាប់ប្រើប្រាស់ដីធ្លី លិខិតទិញលក់ដីរដ្ឋ ឬការបញ្ជាក់លើប្លង់បង្ហាញទីតាំង ដីជាអាទិ៍ នៅលើដីដែលស្ថិតក្នុងតំបន់ការពារធម្មជាតិ និងរបៀងអភិរក្សជីវៈចម្រុះនៃដែនសមត្ថកិច្ចរបស់ខ្លួន។

គួរបញ្ជាក់ថា ការរៀបចំសិក្ខាសាលានេះក្នុងគោលបំណងដើម្បីផ្សព្វផ្សាយនិងបញ្ជ្រៀបការយល់ដឹង ដល់ភាគីពាក់ព័ន្ធ ដើម្បីឱ្យមានការយល់ដឹងអំពីទិដ្ឋភាពច្បាប់ និងលិខិតបទដ្ឋានគតិយុត្តពាក់ព័ន្ធនឹងវិស័យបរិស្ថាន និងធនធានធម្មជាតិ ព្រមទាំងដើម្បីចូលរួមចំណែកទាំងអស់គ្នាក្នុងការការពារ អភិរក្ស និងគ្រប់គ្រងធនធានធម្មជាតិប្រកបដោយចិរភាព នៅក្នុង តំបន់ការពារធម្មជាតិ ដើម្បីជាឧត្តមប្រយោជន៍របស់ព្រះរាជាណាក្រកម្ពុជា កូនចៅជំនាន់ក្រោយ និងមនុស្សជាតិទាំងមូល។

លោករដ្ឋលេខាធិការក្រសួងបរិស្ថាន បានថ្លែងថា «ដើម្បីធ្វើការការពារ អភិរក្ស និងគ្រប់គ្រងធនធានធម្មជាតិឱ្យមានប្រសិទ្ធភាព គឺតម្រូវឱ្យមានការចូលរួមចំណែកពី គ្រប់ភាគីពាក់ព័ន្ធទាំងអស់ ទើបអាចសម្រេចតាមផែនការ និងគោលដៅជាយុទ្ធសាស្ត្ររបស់រាជរដ្ឋាភិបាល និងគោលនយោបាយយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលសម្តេចតែងតែយកចិត្តទុកដាក់ និងគិតគូរដល់ការការពារ និងអភិរក្សធនធានធម្មជាតិ ដើម្បីជាឧត្តមប្រយោជន៍ដល់កូនចៅជំនាន់ក្រោយ»។

សិក្ខាសាលារយៈពេល២ថ្ងៃនេះ សិក្ខាកាមត្រូវរំពឹងថា នឹងទទួលបាននូវចំណេះដឹង និងបទពិសោធពាក់ព័ន្ធនឹងច្បាប់ស្តីពីតំបន់ការពារធម្មជាតិ និងច្បាប់ពាក់ព័ន្ធនានា ដើម្បីពង្រឹងឱ្យកាន់តែប្រសើរថែមទៀត នូវការយល់ដឹងទូលំទូលាយ អំពីច្បាប់ដែលអនុវត្តចំពោះតំបន់ការពារធម្មជាតិ ដែលជាប្រភពនៃសិទ្ធិ កាតព្វកិច្ច និងទំនួលខុសត្រូវរបស់ភាគីពាក់ព័ន្ធទាំងអស់ ព្រមទាំងដំណើរវិវដ្តរនៃបទប្បញ្ញត្តិច្បាប់ដែលពាក់ព័ន្ធ ការយល់ដឹងកាន់តែច្បាស់បន្ថែមទៀត អំពីអំពើដែលត្រូវបានហាមឃាត់ និងចាត់ជាបទល្មើសនៅក្នុងតំបន់ការពារធម្មជាតិ ក៏ដូចជាទោសទណ្ឌ និងជាពិសេសគឺការអនុវត្តនីតិវិធី ព្រមទាំងការរៀបចំសំណុំរឿងដាក់ជូនអាជ្ញាធរតុលាការ ដើម្បីកិច្ចការស៊ើបអង្កេត និងជំនុំជម្រះដើម្បីផ្តន្ទាទោសជនលើ្មសតាមច្បាប់។

លោករដ្ឋលេខាធិការ នេត្រ ភក្ត្រា បានសំណូមពរដល់រាល់សិក្ខាកាមពីគ្រប់មជ្ឈដ្ឋានទាំងអស់មេត្តាយកចិត្តទុកដាក់ នឹងត្រងត្រាប់ឱ្យបានសកម្មនិងពេញលេញ និងសង្ឃឹមយ៉ាងមុតមាំថា សិក្ខសាលានេះ នឹងផ្តល់ជូនសិក្ខាកាមនូវធាតុចូលបន្ថែមអំពីច្បាប់ដែលអនុវត្តលើតំបន់ការពារធម្មជាតិ ការត្រៀមលក្ខណៈដើម្បីបង្ការ និងបង្រាបបទល្មើស ក្នុងតំបន់ការពារធម្មជាតិ និងការរៀបចំសំណុំរឿងប្រកបដោយប្រសិទ្ធភាព និងអនុលោមភាពផ្លូវច្បាប់ពេញលេញ ដើម្បីដាក់ជូនអាជ្ញាធរតុលាការ។

អភិបាលខេត្តកែប លោក សោម ពិសិដ្ឋ និងលោក នៃ គង់ អភិបាលរងខេត្តកំពត ក៏បានលើកបញ្ជាក់ប្រហាក់ប្រហែលគ្នាថា វគ្គបណ្តុះបណ្តាលច្បាប់ពាក់ព័ន្ធវិស័យបរិស្ថាន និងធនធានធម្មជាតិនេះ ពិតជាមានសារៈសំខាន់ ណាស់ក្នុងការ បញ្ជ្រាបការយល់ដឹងដល់ភាគីពាក់ព័ន្ធ ដើម្បីឲ្យមានការយល់ដឹងអំពីទិដ្ឋភាពច្បាប់ និងលិខិតបទដ្ឋានគតិយុត្តិពាក់ព័ន្ធលើការគ្រប់គ្រងបរិស្ថាន និងធនធានធម្មជាតិ សំដៅឲ្យមានការចូលរួម ទាំងអស់គ្នា ក្នុងការការពារនិងអភិរក្ស និងគ្រប់គ្រងធនធានធម្មជាតិ ប្រកបដោយចិរភាពនៅក្នុងតំបន់ការពារធម្មជាតិ ដើម្បីជាឧត្តមភាព សម្រាប់កូនចៅជំនាន់ក្រោយ និងប្រទេសជាតិទាំងមូល។

នៅក្នុងឱកាសនោះ លោក នេត្រ ភក្ត្រា ក៏បានសំណូមពរដល់រាល់សិក្ខាកាមពីគ្រប់មជ្ឈដ្ឋានទាំងអស់មេត្តាយកចិត្តទុកដាក់ និងត្រងត្រាប់ឱ្យបានសកម្មនិងពេញលេញ និងសង្ឃឹមយ៉ាងមុតមាំថា សិក្ខសាលានេះ នឹងផ្តល់ជូនសិក្ខាកាម នូវធាតុចូលបន្ថែមអំពីច្បាប់ដែលអនុវត្តលើតំបន់ការពារធម្មជាតិ ការត្រៀមលក្ខណៈដើម្បីបង្ការ និងបង្រាបបទល្មើស ក្នុងតំបន់ការពារធម្មជាតិ និងការរៀបចំសំណុំរឿងប្រកបដោយប្រសិទ្ធភាព និងអនុលោមភាពផ្លូវច្បាប់ពេញលេញ ដើម្បីដាក់ជូនអាជ្ញាធរតុលាការ៕