(ភ្នំពេញ)៖ ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បំភ្លឺជុំវិញការចុះផ្សាយព័ត៌មានមិនពិតរបស់សារព័ត៌មានមួយ ដែលបានធ្វើការចោទប្រកាន់ដោយគ្មានមូលដ្ឋានច្បាស់លាស់មកលើកម្លាំងការិយាល័យនគរបាលសណ្តាប់ធ្នាប់ដែលបានចុះអនុវត្តការងាររៀបចំសណ្តាប់ធ្នាប់ជាប្រចាំក្នុងភូមិសាស្ត្ររាជធានីភ្នំពេញ ការចុះផ្សាយព័ត៌មានមិនពិតនេះ គឺក្នុងគោលបំណងអាក្រក់ដេីម្បីបង្ខូចកិត្តិយសរបស់មន្ត្រីនគរបាលអនុវត្តច្បាប់ បុគ្គលខ្លួនធ្វេីខុសច្បាប់ហេីយ មិនទទួលស្គាល់កំហុសបែរជាចោទប្រកាន់មកលេីសមត្ថកិច្ចថែមទៀត។

បើតាមលោកវរសេនីយ៍ឯក សាន សុខសីហា អ្នកនាំពាក្យស្នងការស្នងការដ្ឋាននគរបាលរាជធានីភ្នំពេញ បានបញ្ជាក់ប្រាប់បណ្តាញព័ត៌មាន Fresh News នៅព្រឹកថ្ងៃទី២២ ខែកុម្ភៈ ឆ្នាំ២០២២នេះ ថា៖ «ចំពោះករណីនេះ ម្ចាស់រថយន្តបានចតល្មេីសផ្លាកសញ្ញា និងគំនូសសញ្ញាចរាចរណ៍ ចេញមកយកលុយឱ្យសមត្ថកិច្ច ២មុឺនរៀល តែសមត្ថកិច្ចបដិសេធមិនទទួល ត្រូវធ្វេីការផាកពិន័យតាមច្បាប់ បែរជាម្ចាស់រថយន្តល្មេីសខឹងសមត្ថកិច្ច ចោទប្រកាន់ខុសការពិត មកលេីមន្ត្រីអនុវត្តច្បាប់»។

លោកវរសេនីយ៍ឯក សាន សុខសីហា បានបន្តថា ក្នុងការចុះរៀបចំសណ្តាប់ធ្នាប់ចំពោះការឈប់ចតអនាធិបតេយ្យដោយមិនគោរពផ្លាកសញ្ញាគំនូសសញ្ញាចរាចរណ៍នៅតាមដងផ្លូវនៅតាមបណ្តាខណ្ឌមួយចំនួន នៅតែកេីតមានឡេីង ជាក់ស្តែងនៅព្រឹកថ្ងៃសៅរ៍ទី១៩ ខែកុម្ភៈ ឆ្នាំ២០២២ វេលាម៉ោង ១១៖០០នាទី កម្លាំងល្បាតរថយន្តស្ទូចរបស់ការិយាល័យសណ្តាប់ធ្នាប់ បានល្បាតតាមបណ្តោយមហាវិថីព្រះសីហនុ ម្តុំហាងលក់ទូរស័ព្ទគីរីរម្យ ក៏មានរថយន្តឡេចសុីស Nx200t មួយគ្រឿង ពណ៌ស ពាក់ផ្លាកលេខភ្នំពេញ 2BF- 5796 បើកបរដោយនារីវ័យក្មេងម្នាក់ បានឈប់ចតដោយមិនគោរពគំនូស-ផ្លាកសញ្ញាចរាចរណ៍។

បន្ថែមពីនេះ អ្នកនាំពាក្យរូបនេះ បានគូសបញ្ជាក់ថា ឃើញដូច្នេះ កម្លាំងល្បាតបានអែបរថយន្តដើម្បីស្ទូចរថយន្តយកទៅធ្វេីការផាកពិន័យតាមច្បាប់ នៅការិយាល័យសណ្តាប់ធ្នាប់ ប៉ុន្តែនារីជាម្ចាស់រថយន្តមិនព្រមចូលរួមសហការ ហើយថែមទាំងប្រើពាក្យសំដីមិនសមរម្យ ប្រមាទមេីលងាយមកលេីសមត្ថកិច្ច ហេីយថែមទាំងគម្រាមហៅអ្នកសារព័ត៌មានមកឡាយទៀត ដោយមិនឱ្យសមត្ថកិច្ចស្ទូចរថយន្តរបស់ខ្លួនទៅជាដាច់ខាត នៅពេលនោះក៏មានស្ត្រីម្នាក់អះអាងថាជាម្តាយនារីម្ចាស់រថយន្តបានចេញមកនិយាយសុំទោសសមត្ថកិច្ច និងសុំឱ្យសមត្ថកិច្ចធ្វើការអធ្យាស្រ័យ ដោយគ្រាន់តែធ្វេីការអប់រំណែនាំដល់កូនរបស់គាត់ម្តងទៅ ឃេីញដូច្នេះដោយមានការយោគយល់សមត្ថកិច្ចក៏បានធ្វេីការណែនាំអប់រំឱ្យយល់ដឹងអំពីផ្លាក និងគំនូសសញ្ញាចរាចរណ៍ ដោយមិនបានធ្វេីការផាកពិន័យ ឬទទួលយកលុយពីម្ចាស់រថយន្តសូម្បីតែមួយរយរៀលដូចការចោទប្រកាន់នោះទេ។

លោកវរសេនីយ៍ឯក សាន សុខសីហា បានបញ្ជាក់ថា ពេលនេះសមត្ថកិច្ចជំនាញកំពុងតែធ្វេីការស្រាវជ្រាវ ដេីម្បីកោះហៅនារីម្ចាស់រថយន្ត ក៏ដូចជាសារព័ត៌មាន ដែលបានធ្វេីការចុះផ្សាយព័ត៌មានមិនពិត ដោយគ្មានប្រភពច្បាស់លាស់ ដែលធ្វេីឱ្យប៉ះពាល់ដល់កិត្តិយសរបស់មន្ត្រីអនុវត្តច្បាប់៕