(ត្បូងឃ្មុំ)៖ លោកបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ និងស្រី ម៉េង វ៉ាន់ដានីន នៅព្រឹកថ្ងៃទី១៨ ខែកុម្ភៈ ឆ្នាំ២០២២នេះ បានដឹកនាំប្រតិភូថ្នាក់ខេត្ត-ស្រុក អញ្ជើញចុះពិនិត្យទីតាំងបូជនីយដ្ឋានប្រវត្តិសាស្រ្ត ហ្លួងព្រះស្តេចកន រួមមានកស្សិនទឹកខាងលិច និងបឹងប្រាក់ (ជាទីកន្លែងផលិតប្រាក់ស្លឹងខ្មែរតាំងពីសតវត្សទី១៥ ដល់ដើមសតវត្សទី២០) រួមទាំងរូបសំណាក់ និងទីតាំងសក្ការៈមួយចំនួនទៀត។

បន្ទាប់មកបានបន្តជួបសំណេះសំណាលជាមួយបងប្អូនប្រជាពលរដ្ឋ និងជនចាស់ជរាចំនួន២០០គ្រួសារ ដែលមានជីវភាពខ្វះខាត ក្រោយរងផលប៉ះពាល់ពីជំងឺរាតត្បាតកូវីដ-១៩ ដោយចែកអំណោយជាសារ៉ុងម្នាក់១ និងថវិកាមួយចំនួនផងដែរ។

ថ្លែងក្នុងពិធីសំណេះសំណាលទៅកាន់លោកតាលោកយាយបងប្អូនប្រជាពលរដ្ឋ នាក្នុងបរិវេណវត្តព្រៃអង្គរក្នុង ឃុំដូនតី ស្រុកពញាក្រែក លោកបណ្ឌិត ជាម ច័ន្ទសោភ័ណ បានបញ្ជាក់ថា ការចែកអំណោយនាពេលនេះ ដើម្បីឆ្លើយតបតាមតម្រូវការចាំបាច់របស់បងប្អូន ជាពិសេសតបតាមការអំពាវនាវរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានឱ្យអាជ្ញាធរត្រូវយកចិត្តទុកដាក់ចំពោះសុខទុក្ខជនងាយរងគ្រោះ ដែលរងផលប៉ះពាល់ក្នុងពេលមានការឆ្លងរាតត្បាតនៃជំងឺកូវីដ១៩ ដើម្បីរក្សាសុខុមាលភាពសង្គម និងសុខសុវត្ថិភាពនៅក្នុងសហគមន៍។

លោកបណ្ឌិត បានបន្តថា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានខិតខំប្រឹងប្រែងរំដោះប្រទេសជាតិឲ្យមានសុខសន្តិភាព ហើយធ្វើការអភិវឌ្ឍមានការរីកចម្រើនឥតឈប់ឈរ បើទោះបីក្នុងកាលៈទេសៈការឆ្លងរីករាលដាលនៃជំងឺកូវីដ-១៩ក្តី ទន្ទឹមនោះសម្តេចតែងតែគិតគូរពីសុខទុក្ខរបស់ប្រជាពលរដ្ឋក្រីក្រ និងចាស់ជរាគ្មានទីពឹង ទោះបីសម្តេចនៅឆ្ងាយក៏សម្តចនៅតែគិតគូរអំពីសុខទុក្ខ ប្រជាពលរដ្ឋគ្រប់ពេលវេលា។

លោកបណ្ឌិត ជាម ច័ន្ទសោភ័ណ បានបន្ថែមថា ទន្ទឹមនឹងមានការរីកចម្រើននេះ សូមឱ្យមន្ទីរអង្គភាពជំនាញ អាជ្ញាធរមូលដ្ឋាន រួមជាមួយបងប្អូនប្រជាពលរដ្ឋ ត្រូវរួមគ្នាអភិរក្សថែរក្សា វប្បធម៌ ប្រពៃណី ជំនឿ ឱ្យបានគង់វង្ស និងលើកស្ទួយតម្លៃកេរ្តិ៍តំណែលបុព្វបុរសបានបន្សល់ទុកឱ្យនៅលើទឹកដីប្រវត្តិសាស្រ្តនៃយើង។

តួយ៉ាងដូចជាទីតាំងកស្សិនទឹកបឹងប្រាក់ និងរមណីយដ្ឋានប្រវត្តិសាស្រ្តហ្លួងព្រះស្តេចកននេះ ដើម្បីបង្ហាញដល់ភ្ញៀវជាតិ អន្តជាតិថាខ្មែរមានជំនឿ វប្បធម៌ ប្រពៃណីតាំងពីយូរយាណាស់មកហើយ និងអាចបង្កើតអោយមានជាការប្រណាំងទូក (ទូកត្នោត) សម្រាប់រដ្ឋបាលខេត្ត ក្នុងឱកាសពិធីបុណ្យអុំទូក ដែលជាបុណ្យជាតិផងដែរ។

ឆ្លៀតក្នុងឱកាសនោះដែរ លោកបណ្ឌិត អភិបាលខេត្ត បានបន្តអំពាវនាវក្រើនរំលឹកដល់លោកតាលោកយាយ បងប្អូនប្រជាពលរដ្ឋទាំងអស់ ត្រូវថែរក្សាសុខភាព និងបន្តអនុវត្តន៍វិធានការ៣កុំ ៣ការពារ ដើម្បីជៀសឆ្ងាយពីជំងឺកូវីដ១៩ ជាពិសេសនោះបន្តបោះឆ្នោតជូនរាជរដ្ឋាភិបាលកម្ពុជា គណបក្សប្រជាជនកម្ពុជា ដែលមានសម្តេចតេជោ ជាប្រមុខដឹកនាំ បន្តរស់នៅប្រកបដោយសុខសន្តិភាព និងការអភិវឌ្ឍន៍ជានិរន្តន៍៕