(ភ្នំពេញ)៖ ទិវានៃក្តីស្រឡាញ់ (Valentine's Day) គឺជាថ្ងៃគ្រួសារនៃក្តីស្រឡាញ់ដ៏កក់ក្តៅ ក្តីស្រឡាញ់ពិត និងក្តីស្រឡាញ់ដ៏យូរអង្វែង ចំពោះសមាជិកក្រុមគ្រួសារ ឪពុកម្តាយ កូនៗ និងក្តីស្រឡាញ់ចំពោះចាស់ទុំ និងមនុស្សជាទីគោរព។ នេះជាការលើកឡើងរបស់ អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិក្រុមហ៊ុន ម៉េងលី ជេ. គួច អេឌ្យូខេសិន នៅថ្ងៃទី១៤ ខែកុម្ភៈ ឆ្នាំ២០២២ នៅថ្ងៃទិវានៃក្តីស្រលាញ់។

អ្នកឧកញ៉ា គួច ម៉េងលី បានបន្ថែមថា «ទិវានៃក្តីស្រឡាញ់គឺជាថ្ងៃនៃសុភមង្គលគ្រួសារ។ វាគឺជាថ្ងៃនៃការបង្ហាញអំពីការដឹងគុណដោយក្ដី ស្រឡាញ់ចំពោះអ្នកដែលស្រឡាញ់ និងគោរពអ្នកយ៉ាងពិតប្រាកដ និងជារៀងរហូត»។

ទោះបីជាយ៉ាងណាក៏ដោយ អ្នកជំនាញលើវិស័យអប់រំរូបនេះ បានថ្លែងសារដាស់តឿនថា ទិវានៃក្តីស្រឡាញ់ មិនមែនជាថ្ងៃនៃក្តីស្រឡាញ់តែមួយពេលនោះទេ។ វាមិនមែនជាថ្ងៃនៃការលះបង់រូបរាងកាយព្រហ្មចារីយ៍ និងកិត្តិយសរបស់អ្នកទេ។ ទិវានៃក្តីស្រឡាញ់មិនមែនជាថ្ងៃនៃការមិនទទួលខុសត្រូវ មិនមែនជាថ្ងៃនៃការសោកស្ដាយពេញមួយជីវិត និងមិនមែនជាថ្ងៃនៃភាពអាម៉ាសនៃខ្លួនឯងនោះទេ។

ដូចគ្នានេះដែរ អ្នកដែលមានជំនាញផ្នែកសុខភាពផងដែរនោះ បានថ្លែងទៀតថា ទិវានៃក្តីស្រឡាញ់ មិនមែនជាថ្ងៃដែលនាំឱ្យកើតជំងឺអស់មួយជីវិតនោះទេ ដូចជាជំងឺប៉េស ជំងឺកាមរោគ និងការមានផ្ទៃពោះដែលមិនចង់បាន។លោកបន្តថា៖ ទិវានៃក្តីស្រឡាញ់មិនមែនជាថ្ងៃចាប់ផ្តើមនៃកំហុសពេញមួយជីវិតរបស់អ្នកដោយសារសកម្មភាពដែលមិនប្រុងប្រយ័ត្ននោះទេ។ ទិវានៃក្តីស្រឡាញ់មិនមែនជាថ្ងៃដែលត្រូវឆ្លង Delta ឬ Omicron នោះទេ។ វាមិនមែនជាថ្ងៃបង្ករឱ្យមានជំងឺសម្រាប់សប្តាហ៍ខាងមុខនេះទេ។ ទិវានៃក្តីស្រឡាញ់ មិនមែនជាថ្ងៃចាប់ផ្តើមដើម្បីបញ្ឈប់អាជីពរបស់អ្នក ឬថ្ងៃបំផ្លាញជីវិតរបស់អ្នកជារៀងរហូត ដោយសារតែការសម្រេចចិត្តខុសមួយប៉ប្រិចភ្នែក ដោយសារការសេពគ្រឿងស្រវឹង ការចាញ់បោកការនិយាយលួងលោមផ្អែម និងតណ្ហានោះទេ។

«ដូច្នេះ សូមគិតឱ្យបានវែងឆ្ងាយ ដោយឈ្លាសវៃ មានការទំនួលខុសត្រូវ និងមានភាពចាស់ទុំ។ សូមកុំធ្វើរឿងអត់ប្រយោជន៍ រឿងឆ្កួតៗ ដែលធ្វើឱ្យអ្នកសោកស្ដាយពេញមួយជីវិត»។ នេះជាការសំណូមពរ របស់អ្នកឧកញ៉ា គួច ម៉េងលី។

លោកបានបន្តថា អ្នកមានតម្លៃលើសពីការប្រញាប់ប្រញាល់ជ្រួលជ្រើមនៃអ័រម៉ូនមួយថ្ងៃនេះទៅទៀត។ អ្នកមានតម្លៃជាងផ្កាមួយបាច់ទៅទៀត។ អ្នកមានតម្លៃសម្រាប់អនាគតដ៏ភ្លឺស្វាងនៅខាងមុខអ្នក! អ្នកគឺខ្លាំង! អ្នកគ្រប់គ្រងអ្នកបាន! អ្នកស្រឡាញ់ គោរពខ្លួនឯង និងរាងកាយរបស់អ្នក។ គ្មានអ្នកណាអាចឱ្យតម្លៃអ្នកជាងខ្លួនអ្នកនោះទេ។ ដូច្នេះ សូមផ្តល់ការគោរព ស្រឡាញ់ និងកិត្តិយសឱ្យខ្លួនឯងពេញលេញដែលអ្នកសមនឹងទទួលបាន។

លោកក៏បានផ្តល់គំនិតអប់រំថា ស្រឡាញ់ខ្លួនឯង ស្រឡាញ់គ្រួសាររបស់អ្នក ហើយស្រឡាញ់កិត្តិយសរបស់អ្នក៕