(ភ្នំពេញ)៖ ក្រសួងទេសចរណ៍បាននិងកំពុងបន្តជំរុញផ្សព្វផ្សាយទេសចរណ៍ក្នុងស្រុកជាមួយនឹងសកម្មភាពជាបន្តបន្ទាប់ ក្នុងនោះគម្រោង «ស្វែងរកនូវភាពអច្ឆរិយៈរបស់ប្រទេសកម្ពុជា» គឺជាយុទ្ធនាការថ្មីមួយទៀតក្នុងការចូលរួមផ្សព្វផ្សាយទេសចរណ៍ក្នុងស្រុក។

តាមសេចក្ដីប្រកាសព័ត៌មានរបស់ក្រសួងទេសចរណ៍ដែលបណ្ដាញព័ត៌មាន Fresh News ទទួលបាននាថ្ងៃទី១១ ខែកុម្ភៈ ឆ្នាំ២០២២នេះ បានបញ្ជាក់ថា ក្រសួងទេសចរណ៍បាននិងកំពុងបន្តជំរុញផ្សព្វផ្សាយទេសចរណ៍ក្នុងស្រុកជាមួយនឹងសកម្មភាពជាបន្តបន្ទាប់ ដើម្បីធ្វើពិពិធកម្មកិត្តិនាមរបស់កម្ពុជាតាមរយៈការផ្សព្វផ្សាយម្ហូបអាហារខ្មែរ និងគោលដៅអេកូទេសចរណ៍នានារបស់កម្ពុជា។

វិស័យទេសចរណ៍ គឺជាសសរស្តម្ភមួយយ៉ាងសំខាន់ក្នុងការទ្រទ្រង់សេដ្ឋកិច្ចកម្ពុជា ហើយវិស័យនេះបានទទួលរងឥទ្ធិពលយ៉ាងខ្លាំងពីវិបត្តិជំងឺកូវីដ-១៩ ដូចគ្នានឹងវិស័យទេសចរណ៍នៅកម្រិតសកល។ ខណៈដែលការធ្វើដំណើរអន្តរជាតិនៅតែមិនទាន់ប្រាកដប្រជា ក្រសួងទេសចរណ៍បាននិងកំពុងបន្តពង្រឹងចំណាប់អារម្មណ៍ប្រជាជនដែលរស់ក្នុងប្រទេសលើភាពទាក់ទាញរបស់តំបន់ទេសចរណ៍ក្នុងស្រុក។

ជាមួយនឹងជំនួយហិរញ្ញប្បទានពីទីភ្នាក់ងារអភិវឌ្ឍន៍បារាំង AFD និងកិច្ចសហការជាមួយក្រុមហ៊ុនប្រឹក្សាយោបល់ Redhill Communications ក្រសួងទេសចរណ៍បាននិងកំពុងចាប់ផ្តើមផ្សព្វផ្សាយយុទ្ធនាការទីផ្សារឌីជីថលដែលមានឈ្មោះថា «យុទ្ធនាការស្វែងរកនូវភាពអច្ឆរិយៈរបស់ប្រទេសកម្ពុជា» ដែលប្រព្រឹត្តទៅចាប់ពីខែមករាដល់ខែកុម្ភៈ ឆ្នាំ២០២២នេះ។

ក្នុងអំឡុងខែមករាកន្លងទៅថ្មីៗនេះ តារាល្បីឈ្មោះតាមប្រព័ន្ធអ៉ីនថឺរណេត ដូចជា លោក ថន តុលា កញ្ញា ឃន លាងអេង កញ្ញា ឌី ចាន់ស្រីមុំ លោក ផេង រតនៈ និងកុ្រមផ្សងព្រេងដានជើងបានចូលរួមក្នុងកម្មវិធី «ដំណើរកម្សាន្តអាថ៌កំបាំង» ដែលបានរៀបចំនៅទូទាំងព្រះរាជាណាចក្រអច្ឆរិយៈ។ លិខិតអញ្ជើញត្រូវបានផ្ញើទៅកាន់ពួកគាត់ ដោយមានព័ត៌មានលម្អិតអំពីអ្វីដែលត្រូវត្រៀមសម្រាប់ការធ្វើដំណើរ ប៉ុន្តែទិសដៅដំណើរកម្សាន្តត្រូវបានរក្សាជាសម្ងាត់ ដើម្បីបង្កើតបរិយាកាសភ្ញាក់ផ្អើលដល់ពួកគាត់។ ដោយមានកិច្ចសហការជាមួយដៃគូពាក់ព័ន្ធផ្នែកអេកូទេសចរណ៍ និងទេសចរណ៍ធម្មជាតិនៅទូទាំងប្រទេស តារាកិត្តិយសត្រូវបាននាំទៅកាន់កន្លែងទេសចរណ៍ធម្មជាតិផ្សេងៗគ្នា ដែលគេមិនសូវស្គាល់នៅក្នុងប្រទេស ដើម្បីឱ្យពួកគេផ្សព្វផ្សាយចែករំលែកពីទីកន្លែងទាំងនោះទៅកាន់អ្នកដទៃ។ ជាមួយនឹងដំណើរកម្សាន្តអាថ៌កំបាំងដែលកំពុងរៀបចំនេះ ក៏អាចនឹងមានតារាកិត្តិយសជាច្រើនរូបទៀតនឹងចូលរួម ហើយដំណើរកម្សាន្តកាន់តែច្រើនអាចត្រូវបានរៀបចំ ដោយពាំនាំការបង្ហាញនូវតំបន់ទេសចរណ៍ជាច្រើនទៀតជូនសាធារណជនទស្សនាកម្សាន្ត។

ក្រសួងទេសចរណ៍បានលើកទឹកចិត្តដល់ប្រជាពលរដ្ឋក្នុងស្រុកសូមតាមដានដំណើរកម្សាន្តទៅកាន់តំបន់ទេសចរណ៍ទាំងនេះ នៅលើទំព័រ Facebook និង Instagram https://www.facebook.com/tastethewondersofcambodia ដែលស្ថិតនៅក្រោមការគ្រប់គ្រងរបស់ក្រសួង។ លើសពីនេះទៀត ក្រសួងទេសចរណ៍ក៏បានណែនាំគេហទំព័រថ្មី២ទៀត សម្រាប់ផ្សព្វផ្សាយពីអេកូទេសចរណ៍នៅកម្ពុជា www.ecocambodia.org  និងម្ហូបអាហារខ្មែរ www.tastecambodia.org ។

បន្ទាប់ពីដំណើរកម្សាន្តអាថ៌កំបាំង ក្រុមការងារប្រតិបត្តិនឹងចាប់ផ្តើមកម្មវិធី «មហោស្រពម្ហូបអាហារនិម្មិត ឬ Virtual Food Festival» ដើម្បីផ្សព្វផ្សាយម្ហូបខ្មែរបែបប្រពៃណីដ៏ឈ្ងុយឆ្ងាញ់នៅទូទាំងប្រទេសកម្ពុជា។ មហោស្រពនេះនឹងរៀបចំផ្សាយផ្ទាល់នៅលើទំព័រ Facebook ថ្មីរបស់ក្រសួងទេសចរណ៍ https://www.facebook.com/tastethewondersofcambodia។ កម្មវិធីមហោស្រពម្ហូបអាហារនិម្មិតបានចាប់ផ្តើមពីថ្ងៃទី១០ ខែកុម្ភៈ ឆ្នាំ២០២២ ដោយមានការចូលរួមពីពិធីការនី កញ្ញា សុភ័ក្រ្ដ កុសុមា ហើយនឹងត្រូវរៀបចំក្នុងមួយសប្តាហ៍ម្តង សម្រាប់រយៈពេល៤សប្តាហ៍ជាប់ៗគ្នា។ ភោជនីយដ្ឋានដៃគូដែលនឹងបង្ហាញម្ហូបខ្មែរតាមតំបន់ជាច្រើន រួមមាន ភោជនីយដ្ឋាន One More ភោជនីយដ្ឋាន Eleven One Kitchen ភោជនីយដ្ឋាន Labaab ភោជនីយដ្ឋាន 123 Pig ភោជនីយដ្ឋាន Mahob និងភោជនីយដ្ឋានជាច្រើនទៀត។ នៅសប្តាហ៍ទីពីរ មេចុងភៅ ម៉ក់ ម៉េងលី នឹងបង្ហាញស្នាដៃរបស់គាត់ពីរបៀបចម្អិនម្ហូបខ្មែរ តាមរយៈ master class។

លោក ថោង ខុន រដ្ឋមន្ត្រីក្រសួងទេសចរណ៍ បានលើកឡើងថា ក្រសួងទេសចរណ៍មានក្តីសោមនស្សក្នុងការបង្ហាញពីអច្ឆរិយៈភាពរបស់កម្ពុជា តាមរយៈការណែនាំពីគោលដៅអេកូទេសចរណ៍ និងទេសចរណ៍ធម្មជាតិនៅទូទាំងប្រទេស ដែលមិនសូវមានអ្នកស្គាល់ច្រើននៅឡើយ រួមជាមួយនឹងការបង្ហាញពីម្ហូបអាហារខ្មែរដ៏អស្ចារ្យដែលមាននៅកម្ពុជា។ តាមរយៈ «កម្មវិធីពង្រឹងសមត្ថភាពពាណិជ្ជកម្មក្នុងវិស័យទេសចរណ៍ ហៅកាត់ TCBP» ដែលផ្តល់មូលនិធិដោយទីភ្នាក់ងារអភិវឌ្ឍន៍បារាំង (AFD) និងដោយមានកិច្ចសហការពីក្រុមហ៊ុន Redhill Communications លោករដ្ឋមន្ត្រីសង្ឃឹមថាកម្មវិធី «ដំណើរកម្សាន្តអាថ៌កំបាំង» និង «មហោស្រពម្ហូបអាហារនិម្មិត» នឹងជួយបង្កើនចំណាប់អារម្មណ៍របស់ពលរដ្ឋខ្មែរក្នុងស្រុក និងជនបរទេសដែលរស់នៅកម្ពុជាទាំងអស់ ក្នុងការស្វែងយល់អំពីកម្ពុជាកាន់តែស៊ីជម្រៅបន្ថែមទៀត លើសពីតំបន់ដែលមានកេរ្តិ៍ឈ្មោះស្រាប់ ក៏ដូចជាលើកទឹកចិត្តពួកគាត់ឱ្យភ្លក់រសជាតិម្ហូបអាហារខ្មែរ។ សកម្មភាពនេះនឹងមិនត្រឹមតែលើកទឹកចិត្តប្រជាជនឱ្យស្វែងរកនូវភាពអច្ឆរិយៈរបស់ប្រទេសកម្ពុជាតែប៉ុណ្ណោះទេ ប៉ុន្តែក៏នឹងជួយជំរុញការស្តារសេដ្ឋកិច្ចកម្ពុជាក្រោយពីរងផលប៉ះពាល់ដ៏ធ្ងន់ធ្ងរពីវិបត្តិជំងឺកូវីដ-១៩។

* គួរជម្រាបថា៖

កម្មវិធីពង្រឹងសមត្ថភាពពាណិជ្ជកម្មក្នុងវិស័យទេសចរណ៍ (TCBP) ជាគំនិតផ្តួចផ្តើមរបស់ក្រសួងទេសចរណ៍កម្ពុជា ក្រោមការដឹកនាំរបស់លោក ថោង ខុន រដ្ឋមន្ត្រីក្រសួងទេសចរណ៍ ដោយមានជំនួយហិរញ្ញប្បទានពីទីភ្នាក់ងារអភិវឌ្ឍន៍បារាំង (AFD)។ កម្មវិធីរយៈពេល៤ឆ្នាំនេះមានគោលបំណងពង្រឹងវិស័យទេសចរណ៍ ដោយពង្រឹងសមត្ថភាពទាំងក្នុងវិស័យរដ្ឋ និងឯកជន។ កម្មវិធីនេះបានដាក់ចេញនូវសកម្មភាពថ្មីៗរួមមាន ការរៀបចំយុទ្ធនាការវីដេអូផ្សព្វផ្សាយពីម្ហូបអាហារខ្មែរ (Taste Cambodia) ការសិក្សាដើម្បីជួយពង្រឹងការធ្វើទីផ្សារ និងការបណ្ដុះបណ្ដាលដល់មន្ត្រីជំនាញនៃក្រសួងទេសចរណ៍ និងបុគ្គលិកសមាគមទេសចរណ៍ផ្នែកឯកជន។ សកម្មភាពបន្តបន្ទាប់នាពេលអនាគត រួមមានការគាំទ្រដល់ការអភិវឌ្ឍអេកូទេសចរណ៍នៅខេត្តកំពង់ស្ពឺ និងការបង្កើតដំណោះស្រាយសម្រាប់វិស័យទេសចរណ៍ឆ្លាតវៃ (SMART TOURISM) សម្រាប់ទេសចរណ៍ទីក្រុងក្នុងរាជធានីភ្នំពេញ។

ទីភ្នាក់ងារអភិវឌ្ឍន៍បារាំង (Agence Française de Développement - AFD) ជាស្ថាប័នអនុវត្តគោលនយោបាយរបស់ប្រទេសបារាំងស្តីពីការអភិវឌ្ឍអន្តរជាតិ និងសាមគ្គីភាព។ AFD គាំទ្រ និងជំរុញឱ្យមានការផ្លាស់ប្តូរឆ្ពោះទៅកាន់ពិភពលោកដែលមានភាពស្មើគ្នា និងមានភាពធន់ជាងមុន តាមរយៈការផ្តល់ហិរញ្ញប្បទានដល់អង្គការក្រៅរដ្ឋាភិបាល និងវិស័យសាធារណៈ ក៏ដូចជាការសិក្សាស្រាវជ្រាវ និងការបោះពុម្ពផ្សាយរបស់ខ្លួន។ AFD ក៏មានផ្តល់ការបណ្តុះបណ្តាលអំពីការអភិវឌ្ឍប្រកបដោយនិរន្តភាព (នៅ AFD Campus) និងសកម្មភាពលើកកម្ពស់ការយល់ដឹងផ្សេងទៀតនៅប្រទេសបារាំង។
AFD មានវត្តមាននៅប្រទេសកម្ពុជាតាំងពីឆ្នាំ១៩៩៣ និងបានកំពុងគាំទ្ររាជរដ្ឋាភិបាលនៃព្រះរាជាណាចក្រកម្ពុជាដោយផ្តោតលើផ្នែកសំខាន់ៗចំនួន២ គឺការជំរុញការអភិវឌ្ឍមូលដ្ឋានប្រកបដោយតុល្យភាព និងការគាំទ្រវិស័យផលិតកម្ម។

REDHILL Communications គឺជាក្រុមហ៊ុនទំនាក់ទំនងសាធារណៈឌីជីថលដែលបានចុះកិច្ចសន្យាដោយក្រសួងទេសចរណ៍ ដើម្បីអនុវត្តសកម្មភាពទាំងនេះក្រោមក្របខណ្ឌនៃកម្មវិធី TCBP។ ពួកគេផ្តល់ការពិគ្រោះយោបល់ និងយុទ្ធសាស្ត្រសម្រាប់ទំនាក់ទំនងសាធារណៈ ការផ្សាយតាមប្រព័ន្ធឌីជីថល ការគ្រប់គ្រងវិបត្តិ ទំនាក់ទំនងផ្ទៃក្នុង និងការផ្សព្វផ្សាយម៉ាកនៅក្នុងវិស័យជាច្រើន៕