(រតនគិរី)៖ លោក ញ៉ែម សំអឿន អភិបាលខេត្តរតនគិរី និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត នៅព្រឹកថ្ងៃទី១១ ខែកុម្ភៈ ឆ្នាំ២០២២នេះ បានអញ្ជើញសម្ពោធដាក់ឱ្យប្រើប្រាស់ជាផ្លូវការ អគារអនុសាខាកាកបាទក្រហមកម្ពុជា នៅស្រុកអូរយ៉ាដាវ។

ពិធីនេះក៏មានការអញ្ជើញចូលរួមពីលោក លោកស្រីគណៈកិត្តិយស គណៈកម្មាធិការសាខា គណៈកម្មាធិការសាខា អនុសាខា មន្ត្រីរាជការ អង្គភាពជុំវិញស្រុក យុវជនកាកបាទក្រហម សប្បុរសជន និងប្រជាពលរដ្ឋជាច្រើនរូប។

យោងតាមរបាយការណ៍ពីលោក ម៉ា វិចិត្រ ប្រធានគណៈកម្មាធិការអនុសាខាស្រុក បានឱ្យដឹងថា អគារស្នាក់ការ អនុសាខានេះ មានទំហំ ៦ម៉ែត្រ គុណ១២.៥ម៉ែត្រ មានបន្ទប់ធ្វើការ១ សាលប្រជុំ១ និងបន្ទប់ទឹក១ខ្នង បានដំណើរការសាងសង់ ជាដំណាក់កាលបន្តបន្ទាប់អស់រយៈពេល ៨ខែ ២៦ថ្ងៃ រហូតរួចជាស្ថាពរ នៅថ្ងៃទី៩ ខែសីហា ឆ្នាំ២០២១ ដោយចំណាយថវិការអស់ប្រមាណ ១៥,៨៦០,០០រៀល ដែលទទួលបានពីសប្បុរសជនគ្រប់ទិសទី ដែលជាទឹកចិត្តមនុស្សធម៌ មិនអាចកាត់ថ្លៃបាន។

នៅក្នុងឱកាសនោះលោក ញ៉ែម សំអឿន បានពាំនាំប្រសាសន៍ផ្តាំផ្ញើ សួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់ពុកម៉ែបងប្អូនទាំងអស់ ក្នុងអង្គពិធី និងបានលើកឡើងថា ជាការពិតណាស់ថាប្រទេសជាតិយើង មានសុខសន្តិភាព និងកំពុងឈានឆ្ពោះទៅរកភាពរីកចម្រើនលើគ្រប់វិស័យតាមចក្ខុវិស័យ ឆ្នាំ២០៣០ និងឆ្នាំ២០៥០ នៃរាជរដ្ឋាភិបាលកម្ពុជា តែយ៉ាងណាយើងក៏នៅមានប្រជាជនមួយចំនួននៅតែប្រឈមនឹងភាពងាយរងគ្រោះ និងរងគ្រោះដោយសារគ្រោះមហន្តរាយផ្សេងៗ ដែលចាំបាច់ត្រូវការជួយសង្រ្គោះភ្លាមៗឱ្យទាន់ពេលវេលា។

លោកបានបន្តថា «ហេតុនេះហើយទើបកាកបាទក្រហមកម្ពុជា បានបង្កើតឱ្យមានរចនាសម័្ពន្ធតាំងពីថ្នាក់ខេត្ត រហូតដល់ ក្រុង ស្រុក ឃុំ សង្កាត់ និងអ្នកស្ម័គ្រចិត្តគ្រប់ភូមិ ដើម្បីត្រៀមប្រមូលព័ត៌មានអំពីបញ្ហារបស់ប្រជាពលរដ្ឋ ដែលរងគ្រោះ និងងាយរងគ្រោះ សម្រាប់ជួយពួកគាត់ឱ្យបានទាន់ពេលវេលា និងគ្រប់ទីកន្លែង។ ជាក់ស្តែងនៅថ្ងៃនេះយើងបានសម្ពោធអគារអនុសាខាស្រុកអូរយ៉ាដាវ ដើម្បីបង្កភាពងាយស្រួលដល់គណៈកម្មាធិការអនុសាខាស្រុក បានបម្រើការងារមនុស្សធម៌ជូនប្រជាពលរដ្ឋផងដែរ»។

ជាមួយនឹងការលើកឡើងបែបនេះ លោកក៏បានបញ្ជាក់ដែរថា កាកបាទក្រហម គឺមានប្រភពចំណូលពីសប្បុរសជនតាមរយៈសមាជិកភាពប្រចាំឆ្នាំ និងការរៀបចំព្រឹត្តិការណ៍ ៨ ឧសភា និងរាត្រីសមោសរជាដើម មានន័យថាសកម្មភាពទាំងអស់អាចប្រព្រឹត្តទៅបានលុះត្រាណាមានការប្តេជ្ញាចិត្ត និងលះបង់យ៉ាងខ្ពស់ ដើម្បីលើកស្ទួយចលនាមនុស្សធម៌ ពីសំណាក់មន្រ្តីរាជការ កងកម្លាំង ក្រុមហ៊ុនឯកជន អាជីវករ ប្រជាពលរដ្ឋ មានការចែករលែកជាមួយកាកបាទក្រហម ទើបកាកបាទក្រហម អាចជួយប្រជាពលរដ្ឋងាយរងគ្រោះនានាបាន។

បន្ថែមពីនេះលោក ញ៉ែម សំអឿន សង្ឃឹមយ៉ាងមុតមាំ ក៏ដូចជាជំរុញដល់សមាជិក សមាជិកាអនុសាខាកាកបាទក្រហមស្រុកទាំងអស់ បន្តចូលរួមលើការងារនេះឱ្យកាន់តែខ្លាំងក្លាទ្វេឡើងថែមទៀត បន្ទាប់ពីអគារយ៉ាងថ្មីប្រណិតមួយខ្នងនេះ ត្រូវបានដាក់សម្ពោធឱ្យប្រើប្រាស់ជាផ្លូវការនាថ្ងៃនេះ។

ក្នុងពិធីនោះដែរ សាខាបានចែកជូនអំណោយមនុស្សធម៌ ដល់ប្រជាពលរដ្ឋ ចាស់ជរា កុមារកំព្រា ជនពិការងាយរងគ្រោះបំផុត ចំនួន ៥០គ្រួសារ មកពី៤ឃុំ (ឃុំប៉ាតេ, ឃុំលំជ័រ, ឃុំសោមធំ និងឃុំយ៉ាងទុង) ក្នុងស្រុកអូរយ៉ាដាវ ដែលក្នុង១គ្រួសារ ទទួលបាន៖ អង្ករ ២៥គីឡូក្រាម មី១កេស ត្រីខ១យួរ ទឹកស៊ីអ៉ីវ១យួរ ទឹកត្រី១យួរ ម៉ាស់២ សាប៊ូ២ដុំ ជែលលាងដៃ១ដប និងថវិកាមួយចំនួនផងដែរ៕