(ភ្នំពេញ)៖ «ក្នុងការអនុវត្តគម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា រយៈពេល៦ឆ្នាំ ២០២០-២០២៥) នេះរំពឹងថាការគ្រប់គ្រងធនធានធម្មជាតិនឹងកាន់តែប្រសើរឡើង តាមរយៈយើងអនុវត្តផែនការ អនុវត្តច្បាប់ យើងដាំស្តារឡើងវិញ យើងការពារ»។ នេះបើតាមការឱ្យដឹងរបស់លោក ឃិន ម៉េងឃាង ប្រធាននាយកដ្ឋានទេសចរណ៍ធម្មជាតិ នៃអគ្គនាយកដ្ឋានសហគមន៍មូលដ្ឋានក្រសួងបរិស្ថាន។

ក្រសួងបរិស្ថាន ក្រោមក្របខណ្ឌគម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា បានចុះកុងត្រាជាមួយក្រុមហ៊ុនទីប្រឹក្សាបច្ចេកទេស Emerging360 ដើម្បីធ្វើការសិក្សា ការរៀបចំចក្ខុវិស័យគោលដៅទេសចរណ៍ និងផែនការវិនិយោគទេសចរណ៍ (Destination Vision and Investment Plan) សម្រាប់តំបន់ទេសភាពជួរភ្នំក្រវាញកម្ពុជា ដោយផ្តោតលើកាលានុវត្តភាពនៃការរៀបចំជាតំបន់អេកូទេសចរណ៍នៅក្នុងតំបន់ការពារ សម្រាប់ខេត្តសៀមរាប ខេត្តកំពង់ស្ពឺ និងខេត្តកោះកុង ដែលក្នុងនោះរួមមានទី១៖ តំបន់ឧទ្យានជាតិព្រះជ័យវរ្ម័ន-នរោត្តម “ភ្នំគូលែន”, ទី២៖ ដែនជម្រកសត្វព្រៃភ្នំឱរ៉ាល់ និងឧទ្យានជាតិភ្នំក្រវាញកណ្តាល និងទី៣៖ តំបន់ដែនជម្រកសត្វព្រៃតាតៃ និងពាមក្រសោប។ ដែលគ្រប់ដណ្តប់លើតំបន់ការពារធនធានធម្មជាតិចំនួន១៤។

បើតាមមន្ត្រីអនុវត្តគម្រោងរូបនេះ បានលើកឡើងថា ការអនុវត្តគម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា រយៈពេល៦ឆ្នាំនឹងជួយលើកស្ទួយដល់ជីវភាពប្រជាសហគមន៍ និងពិសេសនៅបានជួយដល់កិច្ចការពារធនធានធម្មជាតិកម្ពុជាឱ្យគង់វង្សយូរអង្វែងទៅថ្ងៃខាងមុខ។

ថ្លែងក្នុងពិធីបើកសិក្ខាសាលាស្តីពីគម្រោង «និរន្តរភាពតំបន់ទេសភាព និងទេសចរណ៍ធម្មជាតិកម្ពុជា» ដែលបានរៀបចំឡើងនាមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) នៃសាកលវិទ្យាល័យភូមិន្ទភ្នំពេញកាលពីថ្ងៃទី០៨ ខែ កុម្ភៈឆ្នាំ ២០២២ លោក ឃិន ម៉េងឃាង បានបញ្ជាក់ថា គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា បានទទួលពីហិរញ្ញទានឥណទានជា កញ្ចប់ថវិកាសរុបចំនួន ៥៧.៥៨លានដុល្លារ ដោយត្រូវអនុវត្តរយៈពេល៦ឆ្នាំ គិតចាប់ពីឆ្នាំ២០២០ ដល់ឆ្នាំ២០២៥។

សម្រាប់កញ្ចប់ថវិកាទាំងនោះក្រសួងបរិស្ថាន ក្រសួងអភិវឌ្ឍន៍ជនបទ ទទួលពីភាគីពាក់ពាក់ព័ន្ធមួយចំនួនដូចជា ថវិកាហិរញ្ញប្បទាន ឥណទានពីធនធាគារពិភពលោកចំនួន៥០.៦០លានដុល្លារ ថវិកាពីមូលនិធិបរិស្ថានសកល ដែលជាថវិកាជំនួយមានចំនួន៤.៤២លានដុល្លារ និងថវិកាបដិភាគពីរាជរដ្ឋាភិបាលមានចំនួន២,៥លានដុល្លារ។

លោក ឃិន ម៉េងឃាង បានគូសបញ្ជាក់ថា៖ «ចំពោះការអនុវត្តជាទិភាពគឺក្រសួងបានពន្លឿននៃការរៀបចំកំណត់តំបន់គ្រប់គ្រង ធ្វើផែនការគ្រប់គ្រង ពង្រឹងការអនុវត្តច្បាប់ ការចុះបញ្ជីដីធ្លី និងទី២៖ ការរៀបចំតម្លើងព័ត៌មានគ្រប់គ្រង ដើម្បីធ្វើសេចក្តីសម្រេចចិត្ត។ ក្រៅពីនេះចំពោះការងារអនុផលព្រៃឈើវិញយើងបានរៀបចំសហគមន៍រួចហើយ មានរចនាសម្ព័ន្ធគ្រង់គ្រងរួចហើយ យើងបានបណ្តុះបណ្តាល និងធនធានដល់ប្រជាសហគមន៍ដល់គាត់ និងសហគមន៍ខ្លះកំពុងដំណើរការដូចជាករណីគ្រំចំពុះទា កំពុងដំណើរការរួចហើយក្នុងនេះគ្រំចំពុះទាបានចែកចាយលក់ក្នុងប្រទេសជាដើម។ ចំពោះការងារចិញ្ចឹមជ្រូក ការដាំក្រវ៉ាញក៏កំពុងដំណើរការហើយរំពឹងថានឹងទទួលនូវលទ្ធផលឆាប់ៗ ខាងមុខ»

ជាមួយគ្នានេះដែរ លោកបានបន្ថែមថា ចំពោះការងារអេកូទេសចរណ៍ក្រសួងបានរៀបចំរួចហើយ ហើយក្រុមហ៊ុនឯកជនមួយចំនួនក៏បានជួយគាំទ្រការអនុវត្តតំបន់ទេសចរណ៍ និងព្រមទាំងវិនិយោគសប្បទានលើវិស័យ ទេសចរណ៍ក្នុងនេះដូចជាការអនុវត្តផ្លូវធ្វើដំណើរ ទីកន្លែងចំណត កន្លែងបោះតង់ ទឹកស្អាត អនាម័យ កន្លែងម្ហូបអាហារ កន្លែងដើរព្រៃជាដើម។

មន្ត្រីជំនាញរូបនេះ បានបន្តថា ក្រៅពីនេះការអភិវឌ្ឍន៍វិស័យអេកូទេសចរណ៍ទាំងឯកជន និងសហគមន៍ពិតណាស់នឹងជួយបង្កើតការងារជូនប្រជាពលរដ្ឋ ដែលជាផ្នែកមួយកាត់បន្ថយការដាក់សម្ពាធទៅលើការចូលព្រៃកាប់ឈើនិងចាប់សត្វព្រៃពីព្រោះថាកាលណាប្រជាជនគ្មានមុខរបរគាត់អាចចូលព្រៃបំផ្លិតបំផ្លាញធនធានធម្មជាតិ។ ជាមួយគ្នាការអភិរក្សបានប្រសើរជាងមុន និងក្រៅពីនេះការលើកកម្ពស់នូវខ្សែសង្វាក់ផលិតផលក៏ល្អតាមមកជាមួយដែរ។

ដោយឡែកបើតាមលោកស្រី ឆាយ សីវលីន ប្រធានសមាគមទេសចរណ៍កម្ពុជា (CATA) បានលើកឡើងដោយ បានសំណូមដល់ភាគីពាក់ព័ន្ធត្រូវយកចិត្តទុកដាក់ពីការអភិវឌ្ឍន៍លើវិស័យទេសចរណ៍ គន្លងបែបថ្មីក្នុងអំឡុងពេលនៃការរីករាលដាលនៃជំងឺកូវីដ១៩។ ត្រូវប្រើប្រាស់សក្តានុពល ក្នុងទម្រង់ជាគោលដៅអេកូទេសចរណ៍ដែលក្រសួងបរិស្ថានបានអនុវត្តគម្រោងរយៈពេល៦ឆ្នាំនេះដោយបានផ្តោតទីកលើការវិនិយោគ សាធារណៈ ហេដ្ឋារចនាសម្ព័ន្ធ ដែលគាំទ្រដល់សកម្មភាព និងសម្បទានអេកូទេសចរណ៍ដែលចាំបាច់ និងរួមយុទ្ធសាស្រ្តទីផ្សារ ផ្សព្វផ្សាយតាមប្រព័ន្ធឌីជីថល ក្នុងក្រមខណ្ឌគម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា៕