(បាត់ដំបង)៖ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានលើកឡើងថា ឧបករណ៍ចម្រោះស្អាតសម្រាប់ពិសាដែលជាគម្រោងរបស់ក្រសួងបរិស្ថានគាំទ្រថវិកាដោយមូលនិធិសង្គម និងបរិស្ថាន គឺសម្រាប់ផលិតទឹកពិសាចែកជូនដោយឥតគិតថ្លៃដល់ប្រជាពលរដ្ឋក្រីក្រ ព្រះសង្ឃ រដ្ឋបាលឃុំ ប៉ុស្តិ៍រដ្ឋបាល មណ្ឌលសុខភាព និងមន្ត្រីបុគ្គលិកដែលបម្រើការងនៅតំបន់នោះ។

ការលើកឡើងបែបនេះរបស់លោក នេត្រ ភក្ត្រា បានធ្វើឡើងក្នុងឱកាសនៃការប្រកាសដាក់ឱ្យប្រើប្រាស់ឧបករណ៍ចម្រោះទឹកសម្រាប់ពិសាដែល មានសមត្ថភាពផលិតទឹកស្អាតមានគុណភាពបានបរិមាណ ៤ម៉ែត្រគូប ក្នុងរយៈពេល ៨ម៉ោងនៅតំបន់ភូមិបណ្តែតទឹក ព្រែកទាល់ ឃុំកោះជីវាំង ស្រុកឯកភ្នំ ខេត្តបាត់ដំបង នាថ្ងៃទី១០ ខែធ្នូ ឆ្នាំ២០២១ ម្សិលមិញ។

បើតាមអ្នកនាំពាក្យរូបនេះ បានថ្លែងថា ដោយមានឧបករណ៍ចម្រោះទឹកនេះជាជំនួយ ប្រជាពលរដ្ឋដែលរស់នៅលើភូមិបណ្តែតទឹកនៅឃុំកោះជីវាំង ជាង១ម៉ឺននាក់ នឹងអាចជួយសម្រាលការចំណាយ លើការប្រើប្រាស់ទឹកសម្រាប់ពិសា និងជួយចូលរួមកាត់ បន្ថយសំណល់ប្លាស្ទិកដែលកើតចេញពីការពិសាទឹក ដែលច្រកក្នុងដបប្លាស្ទិក។

លោក នេត្រ ភក្ត្រា បានគូសបញ្ជាក់ពីសារៈប្រយោជន៍ នៃឧបករណ៍ចម្រោះទឹកសម្រាប់ពិសានេះដោយលើកឡើងថា៖ «ឧបករណ៍ចម្រោះទឹកនេះបានដើរតួនាទីជា ទី១-អ្នកផលិតទឹក និងផ្តល់ទឹកស្អាតគ្រប់គ្រាន់សម្រាប់ពិសា នៅក្នុងសហគមន៍ជាពិសេសបងប្អូនប្រជាពលរដ្ឋមានជីវភាពក្រីក្រឱ្យពួកគាត់មានទឹកពិសាប្រកបដោយអនាម័យ។ ទី២-ជួយសន្សំសំចៃថវិការបស់ពលរដ្ឋក្នុងការ ចំណាយទិញទឹកដបសម្រាប់ពិសា។ ទី៣-គិតគូរពីសុខភាពរបស់ប្រជាពលរដ្ឋ និងជំរុញលើកកម្ពស់លើការ រស់នៅស្អាត ហូបស្អាត ផឹកស្អាត អនាម័យ។ ទី៤-លើកកម្ពស់តម្លៃបរិស្ថានសហគមន៍ សាលារៀនស្អាត ភូមិឋានស្អាតនិងជាពិសេសកាត់បន្ថយការប្រើប្រាស់ប្លាស្ទិក និងការបំពុលដោយប្លាស្ទិកនៅក្នុងបឹងទន្លេសាបដោយ សារតែការទុកដាក់គ្រប់គ្រងសំណល់ប្លាស្ទិកមិនបានត្រឹមត្រូវ»។

នាឱកាសនោះដែរ មន្ត្រីជាន់ខ្ពស់ក្រសួងបរិស្ថាន បានបន្តថា សំណល់ ប្លាស្ទិកជាក្តីកង្វល់រួមរបស់ពិភពលោក ដោយសារតែការ ប្រើប្រាស់ផលិតផលពីប្លាស្ទិកបន្តមាននិន្នាការកើនឡើង ពីមួយថ្ងៃទៅមួយថ្ងៃដោយសារតែវាមានភាពងាយស្រួល ប្រើ តម្រូវការប្រើប្រាស់វេចខ្ចប់ខ្ពស់ និងមានតម្លៃថោក។

គួរបញ្ជាក់ថា ស្ថានីយ៍ផលិតទឹកពិសាសហគមន៍ព្រែកទាល់ ត្រូវបានសាងសង់ឡើងនៅឆ្នាំ២០១១ ដោយមានការឧបត្ថម្ភពីអង្គការដៃគូដើម្បីផលិតនិងផ្គត់ផ្គង់ទឹកហូបជូនប្រជាសហគមន៍ព្រែកទាល់។ ស្ថានីយ៍ផលិតទឹកពិសាសហគមន៍ព្រែកទាល់ដំបូងឡើយបានបំពាក់ចម្រោះទឹកធ្វើពីស្រទាប់ខ្សាច់ ធ្យូង និងដុំគ្រួសតូចៗ ឬគេអាចហៅថា តម្រងខ្សាច់ជីវសាស្ត្រ- Bio-sand Filter។ ស្ថានីយ៍ផលិតទឹកពិសាសហគមន៍ព្រែកទាល់ត្រូវបានផ្ទេរឱ្យសហគមន៍ព្រែកទាល់ គណៈកម្មាការឃុំកោះជីវាំង ជាអ្នកគ្រប់គ្រងផ្ទាល់ពីឆ្នាំ២០១៧ ដល់ឆ្នាំ២០២១។

តាមរយៈកិច្ចសន្យាប្រគល់ទទួលផែទឹក ចុះថ្ងៃទី២០ ខែមករា ឆ្នាំ២០២១ មន្ទីរបរិស្ថានខេត្តបាត់ដំបងមានភារកិច្ច ដឹកនាំ កែលម្អជួសជុល និងគ្រប់គ្រងស្ថានីយ៍ផលិតទឹកពិសាសហគមន៍ព្រែកទាល់។ ផែទឹកត្រូវបានជួសជុលបច្ចេកវិទ្យា Ultrafilter (UF) Reverse Osmosis (RO) និង Ultra Violet (UV) ត្រូវបានបំពាក់ជាប្រព័ន្ធចម្រោះទឹកហូប។ ប្រព័ន្ធថាមពលអ៊ីប្រ៊ីត (ថាមពលកកើតឡើងវិញ ឬ សូឡាព្រះអាទិត្យ និងម៉ាស៊ីនភ្លើង) ត្រូវបានតំឡើងនិងប្រើប្រាស់។

លោក នេត្រ ភក្ត្រា បានថ្លែងថា យោងតាមគោលការណ៍ ចំពោះវត្តអារាម សាលាឃុំ មណ្ឌលសុខភាព ស្នាក់ការ និងមន្ត្រីឧទ្យានុរក្ស មនុស្សចាស់ គ្រួសារ និងជនក្រីក្រ សិស្សសាលា អាចប្រើប្រាស់ទឹកដោយមិនគិតថ្លៃ។ ជាមួយគ្នានេះ គម្រោងឧបករណ៍ចម្រោះទឹកស្អាតសម្រាប់ពិសានេះក៏បាននិងកំពុងរៀបចំគោលការណ៍យកសំណល់ដបទឹក និងថង់ប្លាស្ទិកប្តូរទឹកស្អាតសម្រាប់ ពិសាផងដែរ។

នៅចំពោះមុខប្រជាពលរដ្ឋ សិស្សានុសិស្ស និងអាជ្ញាធរនៃឃុំកោះជីវាំងដែលបានចូលរួមក្នុងពិធីដាក់ឱ្យប្រើប្រាស់ឧបករណ៍ចម្រោះទឹកពិសានៅសហគមន៍ព្រែកទាល់ រដ្ឋលេខាធិការក្រសួងបរិស្ថាន បានគូសបញ្ជាក់ថា ការចូលរួមរបស់ពលរដ្ឋទាំង អស់ក្នុងការប្រើប្រាស់ទឹកពិសាផលិតពីឧបករណ៍ចម្រោះ នេះនឹងចូលរួមកាន់តែច្រើនក្និងការកាត់បន្ថយសំណល់ប្លាស្ទិកនៅលើបឹងទន្លេសាប កាត់បន្ថយការបំពុលបរិស្ថាន និងការបំពុលជីវៈចម្រុះ។

«សំណល់ប្លាស្ទិកនៅ លើបឹងទន្លេសាបមាន ២ ប្រភេទគឺសំណល់ដែលចេញពី ការប្រើប្រាស់ក្នុងជីវភាពប្រចាំថ្ងៃរបស់ពលរដ្ឋនៅលើទីតាំងភូមិបណ្តែតទឹក និងសំណល់ប្លាស្ទិកក្នុងបរិស្ថានដែលបានហូរនាំសំណល់ប្លាស្ទិកពីតំបន់ជុំវិញបឹងទន្លេ សាបនៅរដូវទឹកឡើងនាខែវស្សាតាមស្ទឹងព្រែកនានា»។ នេះគឺជាការគូសបញ្ជាក់បន្ថែមរបស់លោក នេត្រ ភក្ត្រា។