(ហូជីមិញ)៖ ជីវិតរស់នៅរបស់ប្រជាជនវៀតណាម ជាពិសេសកសិករដែលពឹងផ្អែកលើទឹក ដើម្បីដាំ ដំណាំនានានោះ បានក្លាយជាភាពលំបាកខ្លាំងលើសកាលពីមួយខែ ទៅពីរខែមុនទៅទៀត បើទោះបីជា ប្រទេសចិន បានបង្ហូរទឹកពីទំនប់របស់ខ្លួន ក៏ឲ្យប្រទេសតាមដងទន្លេមេគង្គក៏ដោយ។ នេះបើតាមការ ចេញផ្សាយដោយសារព័ត៌មាន Channel News Asia នៅមុននេះបន្តិច នារសៀលថ្ងៃចន្ទ ទី០៤ ខែមេសា ឆ្នាំ២០១៦។

តាមតួលេខពីក្រសួងកសិកម្ម និង ធនធានទឹករបស់វៀតណាមឲ្យដឹងថា ប្រជាជននៅភាគខាងត្បូង ប្រមាណជិត ២លាននាក់កំពុងទទួលរងគ្រោះខ្លាំង ដោយសារការអត់ទឹកប្រើប្រាស់ ជាពិសេសគឺ ៨០ភាគរយក្នុងចំណោមនោះ កំពុងត្រូវការទឹកស្អាតបរិភោគជាបន្ទាន់។ រហូតមកដល់ពេលនេះ បណ្តាខេត្តនៅវៀតណាមចំនួន៦៣ហើយ បានប្រកាសអាសន្នពីការខ្វះខាតទឹកប្រើប្រាស់។

បើតាមសម្តីលោក Nguyen Dan Guang ប្រធាននៃមជ្ឈមណ្ឌលព្យាករណ៍អាកាសធាតុជាតិ (NHFC) ឲ្យដឹងថា ភាពរាំងស្ងួតនេះនឹងកើនឡើងខ្លាំងពីចម្លោះខែមេសា ដល់ឧសភា ប៉ុន្តែវានឹងមិនអូស បន្លាយដល់ខែមិថុនានោះឡើយ។ គួរបញ្ជាក់ថា ភាពរាំងស្ងួតនេះ ជាបទពិសោធន៍ឆ្នាំទីពីរហើយ សម្រាប់ប្រទេសវៀតណាម៕