(ភ្នំពេញ)៖ ម​កដល់ឆ្នាំ២០១៦ ទៅហើយ សិស្សសាលា «ស្នាសង្រ្គាម» ​ក្នុងស្រុកប្រាសាទបា​គង ខេត្តសៀមរាប នៅតែបន្តក្រេបយកចំណេះដឹង ក្រោមដើមឈើនៅឡើយ ដែលមើលទៅហាក់បី​ដូចជា​កម្សត់ រកអ្វីនិយាយពុំបាន។ ជាការពិតរដូវនេះ ជារដូវប្រាំង គ្មានភ្លៀងធ្លាក់ អាចឲ្យពួកគេ បន្តរៀន បើទោះបីស្ថិតនៅក្រោមកំដៅថ្ងៃ ដ៏ក្ដៅហែងក្ដី ចុះបើឈានចូលដល់រដូវវស្សា មានភ្លៀងធ្លាក់ទៀតនោះ តើពួកគេនឹងទៅជ្រករៀននៅឯណា។

ដោយក្ដីអាណិអាសូរ និងបានឃើញជាស្ដែងផ្ទាល់ភ្នែកបែបនេះ តារាសម្តែងប្រុសលេចធ្លោ លើសកម្មភាពមនុស្សធម៌ ជួយកុមារជនក្រីក្រ និងចាស់ជ​រាគ្មានទីពឹង លោក សាវិន ហ្វីលីព បានអំពាវនាវ​ស្វែង​​រកសប្បុរជនទាំងរស់ នៅក្នុងស្រុក ​និងក្រៅ​ស្រុក ដើម្បីជួយ​ដល់កុមារប្រមាណ ជាង២០០នាក់ នៅសាលាបឋមសិក្សា «ស្នាសង្រ្គាម» ស្រុកប្រា​សាទបាគង មានចម្ងាយ ប្រមាណ៣០គីទ្បូម៉ែត្រ ពីខេត្តសៀមរាប ដែលកំពុងខ្វះខាត និង​ត្រូ​វការ​សាលារៀនជាបន្ទាន់ ខណៈដែលសព្វថ្ងៃ មានសិស្សចំនួន២ថ្នាក់ បានអង្គុយ​រៀន នៅក្រោមដើម​ឈើ ​គួរឲ្យសង្វេគ។

នៅលើបណ្តាញសង្គមហ្វេសប៊ុក របស់តារាសម្តែងប្រុស លោក សាវិន ហ្វីលីព ប្រហែលជា១​ម៉ោងមុននេះ បានសរសេរបង្ហោះភ្ជាប់ជាមួយ ឃ្លីបវីដេអូ ចេញពីទឹកដីខេត្តសៀមរាប មកថា សិស្សក្រីក្រ​ទាំងនេះ រៀនក្រោមដើមឈើ ២ថ្នាក់ នៅសាលាបឋមសិក្ស «ស្នាសង្រ្គាម» ស្រុកប្រាសាទបា​គង ខេត្តសៀមរាប ហើយពួកគេត្រូវការ សាលារៀនបន្ថែម។

តាមរយៈបណ្តាញសង្គមហ្វេសប៊ុក របស់លោក សាវិន ហ្វីលីព ដដែលនេះ បានអំពាវនាវថា ក្នុ​ងនាមលោកជាប្រធានមូលនិធី សាវិនកុមារកម្ពុជា សូមធ្វើការអំពាវនាវ ដល់សប្បុរសជនមេត្តាជួយ ផ្តល់ជាថវិកា សាងសង់សាលារៀនថ្មី ឲ្យកុមារមានចំនួន២១០នាក់ នៅសាលាបឋមសិក្ស «ស្នាសង្រ្គាម» ស្រុកប្រា​សាទបាគង ខេត្តសៀមរាបផង ព្រោះបច្ចុប្បន្ន​ពួកគាត់ កំពុងខ្វះសាលារៀ​ន និងត្រូវរៀនក្រោមដើមឈើ​។

ការអំពាវនាវពីសំណាក់ លោក សាវិន ហ្វីលីព ខាងលើនេះ បានធ្វើឡើង ខណៈដែលរូបលោក បានចំណាយពេលធ្វើដំណើរ ដីរាប់រយគីឡូម៉ែត្រ ចេញពីរាជធានីភ្នំពេញ ឆ្ពោះទៅចែកសំភារៈសិក្សា ដល់កុមារដែលកំពុងតែសិក្សា នៅសាលាបឋមសិក្ស «ស្នាសង្រ្គាម» ខេត្តសៀមរាប៕