(ឧត្តរមានជ័យ)៖ លោក ប៉ែន កុសល្យ អភិបាលខេត្តឧត្តរមានជ័យ បានអំពាវនាវអាណាព្យាលគ្រប់រូប ត្រូវបង្កលក្ខណៈងាយស្រួលដល់កូន ដើម្បីរៀនសូត្រឲ្យក្លាយខ្លួនជាសិស្សពូកែ។

ការថ្លែងអំពាវនាវបែបនេះក្នុងឱកាសដែលលោក និងលោក ស៊ី ប្រាសិទ្ធ ប្រធានក្រុមប្រឹក្សាខេត្ត ចូលរួមសំណេះសំណាល និងផ្តល់រង្វាន់លើកទឹកចិត្តដល់ជ័យលាភីសិស្សពូកែថ្នាក់ខេត្ត ផ្នែកអក្សរសិល្ប៍ខ្មែរ គណិតវិទ្យា រូបវិទ្យាថ្នាក់ទៅ៩ និងថ្នាក់ទី១២ ប្រចាំឆ្នាំ២០២០ នៅព្រឹកថ្ងៃទី១៦ ខែតុលា ឆ្នាំ២០២០នេះ។

លោក ប៉ែន កុសល្យ បានថ្លែងថា ការចូលរួមចំណែកពីសំណាក់អាណាព្យាលគ្រប់រូប ចំពោះការសិក្សារបស់កូនមានសារះសំខាន់ខ្លាំងណាស់។ លោកសង្កត់ធ្ងន់ថា ទោះបីកូនរៀនសូត្រពូកែនៅ សាលារៀន យ៉ាងណាក៏ដោយ បើត្រឡប់ដល់ផ្ទះវិញឪពុក ម្តាយឈ្លោះប្រកែកគ្នា ឫមានបញ្ហាផ្សេងៗទៀត ក៏ការសិក្សារបស់កូនមិនទទួលបានលទ្ធផលល្អដែរ ដូច្នេះសូមអាណាព្យាបាលគ្រប់រូប ចូលរួមចំណែកលើកទឹកចិត្តដល់កូន តាមរយៈសកម្មភាពនានា ដើម្បីឲ្យកូនក្លាយខ្លួនជាសិស្សពូកែ។

លោកអភិបាលខេត្តឧត្តរមានជ័យ បានជំរុញដល់សិស្សានុសិស្សដែលទទួលបានជយ័លាភីនៅពេលនេះ ត្រូវខិតខំសិក្សាមុខវិជ្ជាផ្សេងៗទៀត ដើម្បីពង្រឹងសមត្ថភាពយើងឲ្យកាន់តែពូកែ ថែមទៀត។

លោកលើកជាឧទាហរណ៍ថា «ពេលនេះយើងមានមាន់មួយក្បាលទោះយកទៅធ្វើម្ហូបអ្វីក៍មិនសូវឆ្ងាញ់ដែរ បើយើងមិនមានគ្រឿងគ្រៅគ្រប់គ្រាន់នោះ ចំពោះការសិក្សាក៍ដូច្នេះដែរ យើងរៀនពូកែតែ១ឫ២មុខវិជ្ជា តើធ្វើម្តេចយើងអាចប្រឡងជាប់សិស្សឆ្នើមបាន?»។

ស្របពេលនឹងការប្រឡងសញ្ញាបត្រ័ទុតិយភូមិ (បាក់ឌុប) ជិតចូលមកដល់ លោកអភិបាលខេត្ត ប៉ែន កុសល្យ បានអំពាវនាវឲ្យម្ចាស់ផ្ទះសំណាក់ឫសណ្ឋាគារនៅក្នុងខេត្ត កុំតម្លើងថ្លៃឈ្នួល ហើយលោកនឹងរៀបចំរង្វាន់លើកទឹកចិត្តសម្រាប់អ្នកជាប់និទ្ទេស A ផងដែរ។ លោកអភិបាលខេត្ត បានប្រកាសជាសាធារណៈជម្រាបជូនលោកគ្រូ អ្នកគ្រូ ក៏ដូចជាបុគ្គលិកអប់រំថា ការតែងតាំងមន្ត្រីគឺមិនអស់លុយនោះទេ បើខាងណាយកលុយសូមប្រាប់លោកមកចុះ៕