(តាកែវ)៖ លោកស្រីបណ្ឌិត កុយ ពិសី ប្រធានក្រុមការងារគណបក្សចុះមូលដ្ឋានឃុំព្រៃអំពក និងជាអនុប្រធានអចិន្រ្តៃយ៍លេខាធិការរដ្ឋានអាជ្ញាធរជាតិទទួលបន្ទុកកិច្ចការព្រំដែន ហើយក៏ជា រដ្ឋលេខាធិការក្រសួងទេសចរណ៍នោះ បានថ្លែងថា បើគ្មានសុខសន្តិភាពទេ យើងមិនអាចមកជុំគ្នា និងយកទៀនវស្សាមកប្រគេនព្រះសង្ឃនៅទីនេះបានទេ

លោកស្រីបានថ្លែងបែបនេះ នៅព្រឹកថ្ងៃទី០៩ ខែកក្កដា ឆ្នាំ២០២០ ក្នុងឱកាសដែលលោកស្រីបណ្ឌិត និងលោក អ៊ូច ភា អភិបាលខេត្តតាកែវ និងភរិយា ព្រមទាំងទាំងសហការី បាននាំយកនូវទៀនវស្សា ទេយ្យវត្ថុ និងថវិកាមួយចំនួន ដើម្បីប្រគេនព្រះសង្ឃគង្គចាំព្រះវស្សា ក្នុងវត្តចំនួន០៣ គឺវត្តព្រះធាតុ វត្តគិរីតាល់ផាត់ (ហៅវត្តភ្នំផ្លិត) និងវត្តឧកញ៉ារតនារាម (ហៅវត្តទ្រមូង) ស្ថិតក្នុងឃុំព្រៃអំពក ស្រុកគិរីវង់ ខេត្តតាកែវ។

ក្នុងឱកាសសំណេះសំណាលជាមួយប្រជាពលរដ្ឋនោះទីនោះ លោកស្រី កុយ ពិសី បានសង្កត់ធ្ងន់ថា «ការដែលយើង អាចដាក់ទានវស្សាបាននាថ្ងៃនេះ គឺដោយសារមាន សុខសន្តិភាព ហើយសន្តិភាពនេះ ត្រូវបានការការពារដោយប្តូរផ្តាច់ ស្លាប់រស់ ដោយសម្តេចតេជោ នាយករដ្ឋមន្រ្តី និងថ្នាក់ដឹកនាំ ក៏ដូចជាសមាជិកសមាជិការគណបក្សប្រជាជនគ្រប់ជាន់ថ្នាក់ ហើយយើងទាំងអស់គ្នាជាពលរដ្ឋក៏ចាំបាច់ត្រូវរួមគ្នាការពារថែរក្សា និងស្រលាញសន្តិភាព ឲ្យដូចជាយើងស្រលាញអាយុជិវិតរបស់យើងដូច្នេះដែរ»

បន្ទាប់ពីប្រគេនទេយ្យវត្ថុ និងបច្ច័យរួចមក លោកស្រី និងក្រុមការងារ បានចូលរួមដាំកូនឈើក្រញ៉ូង ចំនួន ១០០ដើម, ឈើទាល ២៥ដើម និងគគី ២៥ដើម ព្រមទាំងបានចុះសួរសុខទុក្ខស្រី្តឆ្លងទន្លេនៅក្នុងមណ្ឌលសុខភាពឃុំ និងជួបពិភាក្សាការងារជាមួយក្រុមប្រឹក្សាឃុំផងដែរ៕