(បាត់ដំបង)៖ នាព្រឹកថ្ងៃទី៩ ខែមករា ឆ្នាំ២០១៦ លោក ហែម ថេង ប្រធានក្រុមការងារចុះជួយ ឃុំភ្នំសំពៅ ស្រុកបាណន់ ខេត្តបាត់ដំបង  បាននាំថវិកាមូលនិធិ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ១៦លាន៦សែនរៀល ត្រូវបានយកទៅ ចែកជូនស្រ្តីសម្រាលកូន និងក្រុមគ្រួសារអ្នកទទួលមរណភាពប្រមាណ៨៣នាក់ នៅក្នុងឃុំភ្នំសំពៅស្រុកបាណន់ខេត្តបាត់ដំបង។

ក្នុងឱកាសនាំថវិកាជូនស្រ្តីឆ្លងទន្លេ និងក្រុមគ្រួសារអ្នកមរណភាពនេះ លោក ហែម ថេង បាននាំយកប្រសាសន៍ផ្តាំផ្ញើសាកសួរសុខទុក្ខ ពីសំណាក់សម្តេច តេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា និងសម្តេច ក្រឡាហោម ស ខេង អនុប្រធានគណ បក្សប្រជាជនកម្ពុជា ប្រធានក្រុមការងារចុះជួយខេត្ត និង ជាតំណាងរាស្រ្តមណ្ឌលបាត់ដំបង និងលោក សុខ ផល ប្រធានក្រុមការងារចុះជួយស្រុកបាណន់ ខេត្តបាត់ដំបង ទៅជម្រាបជូនប្រជាពលរដ្ឋផងដែរ។

លោក ហែម ថេង បានលើកឡើងថា ប្រមុខដឹកនាំរាជរដ្ឋាភិបាលកម្ពុជាសម្តេចតេជោ ហ៊ុន សែន ក៏ដូចសម្តេចក្រឡាហោម ស ខេង តែងតែយកចិត្តទុក្ខដាក់គិតគូរ ពីសុខទុក្ខ និង ស្ថានភាពជីវភាពរស់នៅរបស់បងប្អូន ជានិច្ចរហូតមក។ «នេះជាវប្បធម៌ចែករំលែក ដ៏ល្អ មួយរបស់គណបក្ស គឺនៅទីណាមានទុក្ខ គឺតែងមានមុខក្រុមការងារគណបក្សចាំជួយប្រជាពលរដ្ឋនៅតាមមូលដ្ឋានយើងជានិច្ច»។

លោក ហែម ថេង បានបន្តថា រាជរដ្ឋាភិបាលកម្ពុជា ដែលកើតចេញពី គណបក្សប្រជាជនកម្ពុជា មានសម្តេចតេជោ ហ៊ុន សែន ជាប្រមុខ និងថ្នាក់ដឹកនាំគ្រប់លំដាប់ថ្នាក់ ចាំជួយ ប្រជាពលរដ្ឋគ្រប់កាលៈទេសៈ។

លោក ហែម ថេង បានផ្តាំផ្ញើដល់មាតាទាំងអស់ដែលទើបសម្រាលកូន ត្រូវមើលថែកូនឲ្យមានសុខភាពល្អ មានអនាម័យក្នុងការរស់ នៅ និងត្រូវនាំកូនទៅចាក់ថ្នាំវ៉ាក់សាំងការពារឲ្យបានទៀងទាត់ តាមពេទ្យណែនាំ។  

ស្ត្រីសម្រាលកូន និងក្រុមគ្រួសារជនមរណភាព ដែលទទួលបានថវិកាពីមូលនិធិសម្តេចក្រឡាហោម ស ខេង បានគោរពថ្លែងអំណរ គុណដល់សម្តេចក្រុមក្រឡាហោម សខេង និងក្រុមការងារគណបក្សប្រជាជនកម្ពុជាដែលចុះពង្រឹងមូលដ្ឋានឃុំភ្នំសំពៅ បានលះបង់ ពេលវេលា ព្រមទាំង ថវិកា ចែកជូន ពួកគាត់ដោយមិន ប្រកាន់និន្នាការបក្សនយោបាយណាឡើយ។

លោកបានបញ្ជាក់ថា ថវិកាមូលនិធិសម្តេចក្រឡាហោម ស ខេង បានចែកជូនដល់ស្រ្តីសម្រាលកូន និងក្រុមគ្រួសារជនមរណភាព ក្នុងម្នាក់ៗ ទទួលបាន ២០ម៉ឺនរៀល។

បន្ទាប់មកលោកប្រធានក្រុមការងារបាន ជួបសំណេះសំណាលសមាជិក សមាជិកា បក្ស ឃុំ សាខាបក្សភូមិទាំង១០នៅទីស្នាក់ការបក្ស ដោយលោកបានសំណូមពរឲ្យសកម្មជនយើងចុះពង្រឹងនិងក្តាប់ឲ្យបានពីស្ថានភាពដែលកើតមានឡើងភ្លាមៗ និងរាយាការណ៍ដល់ ក្រុមការងារ ដើម្បីចាត់វិធានការបានទាន់ពេលវេលាជូនប្រជាពលរដ្ឋយើង និងបានចែកថវិកាសមាជិកបក្សទាំង៤២នាក់ ក្នុងម្នាក់ទទួល បាន៤ម៉ឺនរៀលនិងឧត្ថមដល់បុគ្គលិកប្រចាំការ ទីស្នាការបក្សឃុំនិងសម្រាប់ចិញ្ចឹមចលនាបក្សទាំងអស់ សរុបចំណាយ ថវិកាចំនួន ៦.២៥៤ដុល្លារផងដែរ៕

​