(បាត់ដំបង)៖ ដោយទទួលបានការអនុញ្ញាតពីរាជរដ្ឋាភិបាលកម្ពុជា ក្រសួងទេសចរណ៍ នឹងរៀបចំពីធីបុណ្យទន្លេលើកទី៦ នៅខេត្តបាត់ដំបង ចាប់ពីថ្ងៃសុក្រ ០៥ រោច ដល់ថ្ងៃអាទិត្យ ០៧ រោច ខែផល្គុន ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៣-១៥ ខែមីនា ឆ្នាំ២០២០ ក្រោមប្រធានបទ «ទន្លេនៃសន្ដិភាព ទន្លេនៃវិបុលភាព»។

នាឱកាសទៀតទស្សនាកម្សាន្តពិធីបុណ្យខាងលើនេះ ភ្ញៀវទេសចរ និងប្រជាពលរដ្ឋច្បាស់ជាឆ្ងល់ហើយថា បុណ្យទន្លេឆ្នាំនេះមានអ្វីប្លែកខ្លះ មានរៀបចំពិធីអ្វីខ្លះ ហើយអាចបន្តទៅលេងនៅតាមរមណីយដ្ឋានទេសចរណ៍ណាខ្លះទៀត?

ចម្ងល់នេះត្រូវបានលោក ជួន ជ័យសត្យា ប្រធាននាយកដ្ឋានជំរុញទេសចរណ៍ក្នុងស្រុក និងអប់រំការយល់ដឹងជាសាធារណៈ នៃក្រសួងទេសចរណ៍ ពន្យល់យ៉ាងដូច្នេះថា ពិធីបុណ្យទន្លេរយៈពេល៣ថ្ងៃខាងមុខនេះ មានសម្មភាពកម្សាន្តជាច្រើនដូចជាកីឡាប្រណាំងកង់ រត់ប្រណាំង Run For Fun កីឡាប្រដាល់លក្ខណអន្តរជាតិដណ្តើមខ្សែក្រវាត់ និងកីឡាមួយចំនួនទៀត ការសម្តែងទស្សនីយភាពសិល្បៈ ដែលមានការចូលរួមពីសិល្បករ-សិល្បការីជាតិ និងអន្តរជាតិ និងការតាំងពិព័រណ៍ផលិតផលក្នុងស្រុក និងបរទេស និងមហោស្របម្ហូបអាហារជាដើម។

លោក ជួន ជ័យសត្យា បានបន្ថែមទៀតថា ក្រៅពីសកម្មភាពទាំងអស់ក្នុងពិធីបុណ្យទន្លេនេះ គោលដៅទេសចរណ៍ជាច្រើននៅខេត្តបាត់ដំបង បានតៀមខ្លួនរួចរាល់សម្រាប់ទទួលប្រជាពលរដ្ឋ ដែលក្នុងនោះមានដូចជារៀបចំគោលដៅទេសចរណ៍នានាជុំវិញខេត្ត ពិសេសតំបន់អគារបេតិកភណ្ឌក្នុងក្រុងបាត់ដំបង ភ្នំសំពៅ ភ្នំបាណន់ និងជិះឡូរីកម្សាន្ដតាមជើងភ្នំ រូងប្រចៀវ តំបន់ទេសចរណ៍ប្រវត្តិសាស្ត្រ ដូចជាប្រាសាទឯកភ្នំ សហគមន៍ទេសចរណ៍មួយចំនួនទៀត។

លោកបានបន្តទៀតថា ក្រសួងទេសចរណ៍ក៏បានរៀបចំកញ្ចប់ទស្សនកិច្ច ដែលមានតម្លៃសមរម្យរយៈពេល ៤ថ្ងៃ (៣យប់) ក្នុងកំលុងពេលពិធីបុណ្យទន្លេ គឺចាប់ពីថ្ងៃទី១២-១៥ ខែមីនា ឆ្នាំ២០២០ ទៅកាន់តំបន់គោលដៅទេសចរណ៍នានា។

ចំពោះព័ត៌មានបន្ថែមពីគោលដៅទេសចរណ៍ជាច្រើនទៀតរបស់ខេត្ត ភ្ញៀវទេសចរជាតិ-អន្តរជាតិអាចស្វែងរកបាននៅមណ្ឌលព័ត៌មានទេសចរណ៍របស់ខេត្ត។

លោក ជួន ជ័យសត្យា បានសំណូមពរឱ្យប្រជាពលរដ្ឋ និងភ្ញៀវទេសចរទាំងអស់ចូលរួមក្នុងពិធីបុណ្យទន្លេឱ្យបានច្រើនកុះករ និងធ្វើដំណើរកម្សាន្តប្រកបដោយសុវត្ថិភាព ក៏ដូចជាចូលរួមថែរក្សាអនាម័យ បរិស្ថានឱ្យមានល្អ។

សូមជម្រាបថា ពិធីបើកព្រឹត្តិការណ៍បុណ្យទន្លេឆ្នាំនេះនឹងប្រារព្ធឡើងក្រោមអធិបតីភាពសម្តេចក្រឡាហោម ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ តំណាងសម្តេចតេជោ ហ៊ុន សែន និងសម្តេចកិតិ្តព្រឹទ្ធបណ្ឌិត៕

ភ្នំសំពៅ

ព្រះកេសព្រះពុទ្ធបដិមា នៅភ្នំសំពៅ

ប្រាសាទភ្នំបាណន់

ជិះឡូរី

រូងប្រចៀវ

ប្រាសាទឯកភ្នំ

អគារបេតិកភណ្ឌជំនាន់អាណានិគមបារាំង

វត្តដំរីស

វត្តសំរោង