(ភ្នំពេញ)៖ រយៈពេលជាង១១ខែ ឆ្នាំ២០១៩នេះ (ចាប់ពីថ្ងៃទី០១ ខែមករា ដល់ ថ្ងៃទី០៨ ខែធ្នូ ឆ្នាំ២០១៩) កម្លាំងនគរបាលមន្ទីរប្រឆាំងគ្រឿងញៀន បានចុះបង្ក្រាបគ្រឿងញៀន១,៦៨៨ករណី ឃាត់ខ្លួនជនសង្ស័យជាង២ពាន់នាក់ ក្នុងនោះមានស្រី២២៤នាក់ និងដកហូតបានថ្នាំញៀនជាង៤៥៣គីឡូក្រាម។

របាយការណ៍នេះបានបង្ហាញនៅក្នុងកិច្ចប្រជុំ បូកសរុបលទ្ធផល ប្រចាំខែវិច្ឆិកា ឆ្នាំ២០១៩ និងលើកទិសដៅការងារបន្តក្រោមវត្ដមាន នាយឧត្តមសេនីយ៍ ម៉ក់ ជីតូ អគ្គស្នងការរង ទទួលផែនប្រឆាំងបទល្មើសគ្រឿងញៀន ដែលរៀបចំធ្វើឡើងនៅមន្ទីរប្រឆាំងគ្រឿងញៀន នៃអគ្គស្នងការនគរបាលជាតិ នាព្រឹកថ្ងៃទី០៩ ខែធ្នូ ឆ្នាំ២០១៩នេះ។

ក្នុងកិច្ចប្រជុំនេះ ក៏មានអញ្ជើញចូលរួមពីលោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន, លោកនាយករងមន្ទីរ និង នាយការិយាល័យចំណុះ សរុបចំនួន៤១រូប។ ក្នុងកិច្ចប្រជុំនេះ វាយតម្លៃអំពីសភាពការណ៍ បទល្មើសគ្រឿងញៀន នៅបណ្តាប្រទេសក្នុងតំបន់ និងនៅកម្ពុជា។

របាយការណ៍បានឲ្យដឹងយ៉ាងដូច្នេះថា ចាប់ពីថ្ងៃទី០១ ខែមករា ដល់ថ្ងៃទី០៨ ខែធ្នូ ឆ្នាំ២០១៩ មន្ទីរប្រឆាំងគ្រឿងញៀន បង្ក្រាបករណីគ្រឿងញៀន បាន១,៦៨៨ករណី ឃាត់ខ្លួនជនសង្ស័យ២,៧០៨នាក់ (ស្រី២២៤នាក់) និងចាប់យកសារធាតុញៀនគ្រប់ប្រភេទទម្ងន់ជាង៤៥៣គីឡូក្រាម។

ក្នុងឱកាសនោះ នាយឧត្តមសេនីយ៍ ម៉ក់ ជីតូ និងលោកឧត្តមសេនីយ៍ឯក ឡឹក វណ្ណៈ បានលើកឡើង និងសង្កត់ធ្ងន់ថា ក្នុងពេលចុះប្រតិបត្ដិការ ត្រូវប្រកាន់ភ្ជាប់វិន័យកងកម្លាំងនគរបាលជាតិ ក្រមសីលធម៌ អនុវត្តន៍តាមនីតិវិធី និងច្បាប់៕