(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវឱ្យប្រជាពលរដ្ឋទូទាំងប្រទេសនាំគ្នាបរិភោគនំបញ្ចុកទាំងអស់គ្នា ដោយយកថ្ងៃទី០៩ ខែមិថុនា ឆ្នាំ២០១៩ ដើម្បីរៀបចំកម្មវិធី ហូបនាំបញ្ចុក រួមគ្នាដោយមិនប្រកាន់ក្រុម ប្រកាន់ជំនឿសាសនា ឬប្រកាន់និន្នាការនយោបាយអ្វីឡើយ។ សម្តេចលើកឡើងថា ការហូប នំបញ្ចុកថ្ងៃនេះ គឺបង្ហាញពីមិត្តភាព សាមគ្គីភាព ការស្រឡាញ់រាប់អាន និងឯកភាពជាតិយើងកាន់តែរឹងមាំថែមទៀត។
ដោយឡែកនៅ ថ្ងៃទី០៩ ខែមិថុនា ឆ្នាំ២០១៩នេះផងដែរ ឧត្តមសេនីយ៍ឯក រ័ត្ន ស្រ៊ាង ក៏បានរៀបចំឲ្យមានកម្មវិធីបរិភោគនំបញ្ចុករួមគ្នា រហូតដល់ទៅពីរលើក ក្នុងថ្ងៃតែមួយ តាមប្រសាសន៍អំពាវនាវដ៏ខ្ពង់ខ្ពស់របស់សម្តេចតេជោ ហ៊ុន សែន។ គឺពេលព្រឹក ឧត្តមសេនីយ៍ រ័ត្ន ស្រ៊ាង បានចុះរៀបចំនិងបរិភោគនំបញ្ចុក ជាមួយបងប្អូនប្រជាពលរដ្ឋដោយផ្ទាល់ នៅសង្កាត់ ព្រែកកំពឹស ខណ្ឌដង្កោ រាជធានីភ្នំពេញ ព្រមទាំងមានការចូលរួមពីមិត្តៗ រួមជំនាន់ជាមួយឯកឧត្តម ដែលជាអតីតសិស្ស សាលាបាក់ទូក ក្នុងអំឡុង ឆ្នាំ១៩៨០ - ១៩៨៩ យ៉ាងច្រើនកុះករ ប្រកបដោយបរិយាកាសសប្បាយរីករាយស្និតស្នាលបំផុត និងបន្តទៅពេលរសៀលលោកឧត្តមសេនីយ៍ បានរៀបចំនិងចូលរួមបរិភោគ នំបញ្ចុកជាលើកទី២ ជាមួយនាយទាហាន នាយទាហានរង និងពលទាហាន នៃកងរាជអាវុធហត្ថរាជធានីភ្នំពេញ ព្រមទាំងមានការចូលរួមពី អតីតលោកគ្រូអ្នកគ្រូ មិត្តរួមជំនាន់ សាលាបាក់ទូក មួយក្រុមផ្សេងទៀត នៅក្នុងទីបញ្ជាការដ្ឋានកងរាជអាវុធហត្ថ រាជធានីភ្នំពេញបន្ថែមផងដែរ។
ឧត្តមសេនីយ៍ឯក រ័ត្ន ស្រ៊ាង បានមានចំណាប់អារម្មណ៍ថា នំបញ្ចុក គឺជាមុខម្ហូបមួយប្រភេទដែលគេចាត់ទុកថា ជាអាហារប្រពៃណី និងជាទីពេញនិយមរបស់ប្រជាពលរដ្ឋខ្មែរ និងជាមុខម្ហូបមួយប្រភេទ ដែលកើតឡើងដោយការរួមផ្សំអំពីភោគផល ដែលមានសម្បូរហូរហៀរនៅក្នុងប្រទេសកម្ពុជា ប្រកបដោយរសជាតិប្លែកមានជីវជាតិសំខាន់ៗច្រើនយ៉ាង តាមរយៈទឹកសម្ល និងរបោយបន្លែច្រើនមុខច្រើនប្រភេទ ជាពិសេស នំបញ្ចុកនេះផលិតចេញពីម្សៅអង្ករ ដែលជាវត្ថុមានគុណបំណាច់ខ្ពស់ ក្នុង ការចិញ្ចឹមមនុស្សលោក ។ ដូច្នេះ ការចូលរួមហូបនំបញ្ចុករួមគ្នា នៅថ្ងៃនេះពិតជាបង្កប់នូវអត្ថន័យជ្រាលជ្រៅ ដូចប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន បានលើកឡើងខាងដើមយ៉ាងពិតប្រាកដ៕
