(បន្ទាយមានជ័យ)៖ ដើម្បីជួយសម្រួលដល់ការលំបាករបស់ប្រជាពលរដ្ឋ ដែលរងគ្រោះដោយសារកត្តាធម្មជាតិនោះ នៅថ្ងៃទី៤ ខែមិថុនា ឆ្នាំ២០១៩នេះ លោក អ៊ុ រាត្រី អភិបាលខេត្តបន្ទាយមានជ័យ និងលោក គឹង វណ្ណៈ អភិបាលរងខេត្ត ព្រមទាំងកងកម្លាំងទាំង ៣ប្រភេទបំពាក់ដោយរណា ពូថៅ ដែកគាស់ ពូថៅ បានចុះអន្តរាគមន៍នាំយកសង្ក័សី និងសម្ភារជួសជុលផ្ទះ រងគ្រោះដោយសារខ្យល់កន្ត្រាក់ចំនួន ៣៤គ្រួសារ នៅក្នុងឃុំតាបែន ស្រុកស្វាយចេក ខេត្តបន្ទាយមានជ័យ។ សម្ភារទាំងនោះជាអំណោយរបស់ឧបនាយករដ្ឋមន្រ្តី កែ គឹមយ៉ាន ប្រធានក្រុមការងារថ្នាក់ជាតិចុះជួយ ខេត្តបន្ទាយមានជ័យ។
នៅក្នុងឱកាសនោះដែរលោក អ៊ុ រាត្រី បានឱ្យដឹងថា កាលពីល្ងាចថ្ងៃទី០៣ ខែមិថុនា ឆ្នាំ២០១៩ម្សិលមិញ ពេលមេឃកំពុងភ្លៀង និងខ្យល់ខ្លាំងបង្កឱ្យខ្យល់កន្រ្តាក់បានបណ្តាលឱ្យខូចខាតផ្ទះរបស់ ប្រជាពលរដ្ឋចំនួន៣៤គ្រួសារ ក្នុងភូមិចំនួននៅឃុំឃុំតាបែន ខេត្តបន្ទាយមានជ័យ ក្នុងនោះរួមមានទី១៖ ភូមិតាបែន ១៣ខ្នង, ទី២៖ ភូមិអូរវែងត្បូង ១២ខ្នង, ទី៣៖ ភូមិតាឯក ៦ខ្នង និងទី៤៖ ភូមិគោករកា ៦ខ្នង។
លោកអភិបាលខេត្តបន្ទាយមានជ័យ បានបន្តថា រាជដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានធ្វើឱ្យប្រទេស មានសុខសន្តិភាព និងបានកសាងអភិវឌ្ឍន៍ ហេដ្ឋារចនាសម្ព័នលើគ្រប់វិស័យ ព្រមទាំងបានយកចិត្តទុកដាក់គិតគូពីសុខទុក្ខរបស់បងប្អូនប្រជាពលរដ្ឋ ទូទាំងប្រទេស ដោយមិនបណ្តោយឲ្យប្រជាពលរដ្ឋណាម្នាក់ ស្លាប់ដាច់ពោះស្លាប់ដោយមិនបានដឹងឡើយ និងមិនបានដោះស្រាយនោះឡើយ។
អភិបាលខេត្តបានបន្តថា ជាក់ស្តែង ការចុះសួរសុខទុក្ខ និងការចែកអំណោយសង្គ្រោះបន្ទាន់ដល់បងប្អូនរងគ្រោះនៅពេលនេះ គឺជាការផ្តល់កម្លាំងចិត្ត និងចូលរួមចំណែកដោះស្រាយនូវការលំបាក របស់បងប្អូនបានមួយកម្រិត បើទោះបីជាអំណោយទាំងនេះ មិនបានបំពេញតាមតម្រូវការ របស់បងប្អូនក៏ពិតមែន ក៏អាចដោះស្រាយបានមួយកម្រិតផងដែរ។ ដូច្នេះបងប្អូនទាំងអស់ត្រូវខិតខំប្រឹងប្រែង ប្រកបមុខរបរចិញ្ចឹមជីវិត និងបង្កបង្កើនផលការងារកសិកម្ម ក្នុងការលើកកម្ពស់ជីវភាពគ្រួសារឱ្យបានធូរធាឡើង។
នៅក្នុងឱកាសនោះ លោកអភិបាលខេត្ត ក៏បានផ្តាំដល់បងប្អូនប្រជាពលរដ្ឋទាំងអស់ត្រូវមានការប្រុងប្រយ័ត្នខ្ពស់ពីសុវត្ថិភាពផ្ទាល់ខ្លួន និងក្រុមគ្រួសារ ដោយរដូវនេះ មានភ្លៀងធ្លាក់លាយឡំជាមួយខ្យល់ និងផ្គររន្ទះ ដែលងាយបង្កគ្រោះថ្នាក់ ហើយបើបងប្អូនមានបញ្ហាអ្វីកើតឡើង ត្រូវរាយការណ៍មកកាន់អាជ្ញាធរមូលដ្ឋាន ដែលនៅជិតកៀកជាមួយបងប្អូនផ្ទាល់ ដើម្បីឱ្យក្រុមការងារចុះជួយដល់បងប្អូនបានឆាប់រហ័ស និងទាន់ពេលវេលា។
អំណោយដែលយកទៅចែកជូននៅពេលនេះរួមមាន៖ សង្ក័សី ៥១៣សន្លឹក ហើយក្នុងមួយគ្រួសារទទួលបានថវិកា១០មឺនរៀល ផងដែរ៕
